Read Ninia Yali IBRANI 9 Bible Online

IBRANI 9 - Ninia Yali bible

IBRANI 9

¹Wene atam Allah en Musa hweag-etfag ma duruk kwit, “Allah obahet duruk kwit, airoho duruk kamuhup,” ulug, wene melaleg inim, duruk obam ap homi en wutuk on inim, welatfag.

² Ap Allah il hanim ap homi enobahet duruk kamag ulug, o sabo sum fam kemah wutuk kwit, hwili biren welatfag. Hwili eke dag fil welatfag ai, Ambe Enegma etmano, lampu buhundeg inim, roti Allah obahet foruk katfagma e meja inim, etma welatfag.

³ Ne, sum dagma suknig kweleg, hwili eke ilonggo fil etma, Ambe Mun Amu Enegma,

⁴ hendali hag kemenyan amben ebe on yaldukmu bosie emas fam buhundeg anyo, etma welatfag. Ne, waruk bosie emas fam buhundegma, siburu manna boholman og-esa waharuk katfag anyo foma yohwareg anyo inim, ap Harun andomuk asimit wilipfag anyo inim, ne, Allah wene helep fam lisu baloho Musa og-etfag anyo inim, mundoho e peti dag fil et, ilonggo fil et bosie emas neg dopnoreg welatfag anyo fam yohwaroho, o ilonggoma ousa alongdegma etma welatfag.

⁵ Ne, “Allah ninim wereg,” boukwag ulug, Allah ayonggo mon-enepuk on enunuk kerub ilitdeg, Allah leho ulug, ap homi en yanderuruk anyo, ap homi enesiag elehapdoho forukmu etmano, e peti emberimmu enehwerabul en peti mapnoruruk kweleg, welatfag. Wene ai on foma humdoho ketia bilinggoho furoho hweag-hesa fug alereg.

⁶ O kemah wirig hwili baleg anyo etma, airoho fik-foukdoho welatfag ma, it imam Allah il hanim ap homi enobahet duruk kamag ulug, hwili eke dag fil etma hundig-hundig likia hupmu kweheg neg duruk katfag.

⁷ Airoho duruk katfag famen, hwili eke ilonggo fil welatfagma etma neg de, at ap enowe imam agung anyo neg tahun misig fam nukoho misiham kuruk katfag. Ne, kuruk kwit, hesangge kuruk katfag fug. Ite, Allah en enesiag elehapdoho fesoukwag ulug, at onggwareg siag disi anyo fahet Allah og-ereheg, ne, it ap homi en enapeleg kweleg, siag duswa anyo enobahet Allah og-ereheg, dimin ulug, wam amep walug neg, Allah og-irik kuruk katfag.

⁸Ai duruk katfag fam, at Allah Aheime en fagdoho hweag-nesauk kwit, o kemah dag fil duruk ale eleg am fug angge, owan duruk kwit wereg ma, hwili ilonggo fil Ambe Mun Amu Enegma etma sok husuk fug angge owan lareg welatfag, ulug, hweag-nesauk.

⁹O kemah wirigmu duruk katfag ai, ebe ketia duruk anyo wal-heheg neneluk amag ulug wereg. It di angge su angge Allah obahet feheg, Allah owam waroho og-ereheg, duruk katfag famen, it og-irik lalug, “Nasiag elehapdoho folug, an fanoapdoho nobahakeik,” ulug, uk fug angge, enenda se atuk katfag fug. Ite, enesiag ebereg neg wereg latfag ai fam, we ahut wal-heheg hag duruk katfag.

¹⁰Ai duruk katfag ai, enebe fano welamag ulug, “Henesiburu henahaik airoho debelug, nenggeg, henenggik heneyog ho-debelug neg, deheg, duruk kamek,” ulug, wene melaleg kweleg, fobik Allah en obalma wene keron owan unduhuk fouk fug mu, duruk katfag.

¹¹Airoho duruk katfag famen, at Allah en nik aleroho fanoap nenebuhuk, ulug bebag higitdoho, at Kristus nenowe Imam Agung anyo nenobahet duruk kwit, fanoap nenebikoho mundoho wahasireg wereg.[7] Ne, at nenobahet durukmu etma, o kemah aben wutuk anyo on, Allah en di angge su angge o suma kwenangma on wal-debag anyo on fam wirigmu re fug. Ite, at Kristus en o kemah ebe on along on fam etma nenobahet duruk kaikoho kwisi.

¹²Ne, at Kristus en o kemah ebe on ai ilonggo fil Ambe Mun Amu Enegma kuruk kwit de, kambing yohombuk amep inim, lembu omalik amep inim, walug kwisi fug. Ite, at onggwareg amep neg walug, nukoho misiham feik kwisireg, nit nenahap mundoho wendareg welamuhuk ulug, nenonggo baloho fesi.

¹³ It ap homi en siag duruk esalug, ousa hag wereg anyo, sali baloho hag, Allah il hanim enebe fanoapdoho welamag ulug, kambing sapi omalik inim enamep hwenanggeheg, sapi omalik indok yale folug, ul anyo weheg, dulug, enebene kwesaloho foruk fam, fano atuk katfag.

¹⁴Ai halug, Kristus amep ai neg de, along humon deg ma, aren Allah owam waroho og-utuk anyo hag, at neg siag duk fug angge mun fano wereg lit, Allah Aheime mundoho eitog eme wereg anyo fam, ebe Allah og-itsi mu, ketia nit Allah mundoho oluk eitog wereg anyo obahet duruk kamuhuk en, wene atam on melaleg duruk kwit, “Nit nenesiag elehapdoho folug, fanoapdoho nenobahakeik,” ulug, uk fug angge nenenda se atuk eleg lit, waratuk katuhuk anyo, at amep fam elehapdoho folug, fanoapdoho nenobahauk ale along deg ma hauk kahe.

¹⁵Airoho deg ma, at Allah en wene atam melaloho hweag-esebag anyo dil lauk kwit, higitdoho duk fug angge en sahaloho folug, duruk katfag ma, sabu hetdeg hag wereg anyo enonggo baloho folug wundet angge lauk kamuhup en, enobahet ap misig mundoho waratsi halug, Allah en hwi-henepuk kwit, “Di angge su angge fano on henoluk mundoho welam on anyo og-hesahuk,” ulug, wene abug hweag-esebag on hwelahup en, at Kristus en wene nigon keron walug, dil wahasi.

¹⁶Ap eke en, “An wararuhuk nealug, nangge it airoho neg akni hiling amuhup,” ulug, wene abug hweag-esauk kwit, lisu balduk famen, Waraha, ulug, furoho enolukdeg fug halug, angge yohwandoho hwelauk fug.

¹⁷At wene abug hweag-esalug lisu balduk on anyo owan oluk wereg kweleg, “Airoho hwelowag,” ulug, lisu baleg[8] higitdoho yohwandoho hwela fug alereg. Ite, ebe waratuk halug neg de, yohwandoho hwelauk.

¹⁸Anyo hag, wene atam Allah en abug hweag-esebag anyo oho, mep hililig kweleg neg dip-uruk katfag.

¹⁹ Ite, at Allah en, “Diroho diyug, airoho diyug,” ulug, wene domog mundoho hweag-etfag ma, at Musa en it ap homi furoho duruk kamag ulug, it mundoho bilinggoho hweag-esebagdeg, sapi omalik mel, kambing yohombuk on mel, enamep ik inim hwenangge folug, domba oruk bolu baleg on inim, hisop enggela musan hag inim fam mep are debelug, Allah wene buku lisu baleg fam inim, ap homi enebene inim, mundoho are debeseil lebag.

²⁰Are debeseil lauk kwit, at Musa anyo en, “At Allah en awene wenggeloho abug hweag-hesasi ai, hit furoho duruk kwit, Awene dipdoho nenebuhu, boukwag ulug, mep su henebene are henobahaki,” ulug, hweag-esebag.

²¹ Ai debag anyo hag, o kemah wirig inim, ne, Allah obahet duruk kwit, duruk on alat di angge su angge inim, mundoho airoho mep areroho febag.

²² Allah wene melaleg Musa hweag-etfag anyo higitdoho duruk kwit, di angge su angge humdoho mep fam neg fanoapdoho fouk alereg ma, mep hililig halug neg, nenesiag elehapdoho nenobahauk alereg.

²³Boholma duruk ale ahut wal-heheg duruk katfag ai, mep airoho areroho fanoapdoho foruk katfag fano famen, boholma duruk ale di angge su angge ai neg de, along deg ma, sapi kambing enamep fam fanoapdoho fouk ale siagdeg. Ite, mep omamne nigon fam fanoapdoho fouk ale fano.

²⁴Aireg ma, Kristus anyo o ebe wirig kweleg, ahut wal-heheg Ambe Enegma ap homi en wirigmu etma kwik lasi fug. At boholma neg kwik lasireg, Allah il hanim hupmu hubet nenobahet duruk kwit wereg.

²⁵Ne, it ap homi Yahudi enowesi leho on Imam Agung omano en Ambe Mun Amu Enegma etma kwik lauk kwit, enonggwareg enemep walug la fug angge, sapi kambing enamep neg walug, di tahun su tahun nukoho misiham feik kweheg neg duruk katfag famen, Kristus neg de onggwareg amep hundig-hundig walug kuruk karuhuk ulug, kwisi fug.

²⁶It airoho duruk katfag hag, Kristus en at amep fam airoho duruk kalep man, at o suma wal-debag li en angge nenek duruk kwit neg welalep famen, at Kristus en, “An namep fam di siag su siag elehapdoho foukwag ulug, an nebe waratuk kwit, Allah og-uruhuk,” ulug, o ahae fotogdoho misiham enam aik wahasi.

²⁷Nit ap homi atam waramuhukdeg, ai en fobik ekenim waramuhuk fug ai, at Allah en, “It ap homi domog misiham waramuhup,” ulug, wenggeloho febag ma, nit misiham waramuhuk, ai en Allah en ayo wiroho eneko nenobahaku.

²⁸ Anyo hag, Kristus de, di ap homi su ap homi mundoho enesiag elehapdoho foukwag ulug wahasireg, nukoho misiham nenobahet waratsi mu, fobik bireneg on waruhu anyo re, nenesiag elehapdoho feikoho waruhu fug. Ite, nit at waruhu en, nangno-hauk kahe anyo, nenahap wendat-nenebikoho waruhu.