Read Ninia Yali YAKOBUS 2 Bible Online

YAKOBUS 2 - Ninia Yali bible

YAKOBUS 2

¹Nori, nerekwi. Hit Tuhan Yesus Kristus mun leho wereg anyo demdoho bolug, obam dip-deberuk kwit, ap homi enorohole fu debeselug, eke fano debeseheg, ne, eke siahap debeseheg, duruk kam fug.

²Ap enggik wereg on eke bosie emas sehene mel, sum mun fano on mel, wan-debelug, hit somban urukmu kwik waheg, ne, ap eke enggik eleg ma, sum mining on wandoho kwik waheg, duruk halug,

³ap sum fano buhundoho wandeg anyo along bolug hweag-utuk kwit, “Nakni. Hweria atukmu fanoma dia huraik ma,” eheg, ne, ap enggik eleg anyo along boruk eleg lit, “We eta inaik lag,” eheg, “We elanma hweniema etma hwerieg lamin,” eheg, duruk kahep halug,

⁴hit henendan ap eke siag, ap eke fano bolug, hweag-esauk kahep anyo eleg a? Ne, enorohole fu debeselug duruk kahep ma, ap en-enepuk on en duruk hag duruk kahep ma, siag at wenggelduk kahep anyo, eleg a?

⁵Nori, nerekwi. Hit an nenda hundig deg ma, wene su furoho holduk kamek. It ap enenggik eleg boruk kweleg, Allah en momal-enepsi anyo re, enenggik wereg hag, enenda mun dem boruk, ne, ap abirangge, “Nakni o,” ulug, “Enenda hundig napuk halug, napma fesehuk o,” ulug, abug hweag-esebag anyo, Allah apma feserukmu enengge hwelowag ulug unduhuk feseheg dukwag ulug, momal-enepsi anyo, eleg a?

⁶Allah en it ap momal-enepsi famen, hiren ap enenggik eleg halug, siahapdoho feseruk kahep. Lal-fal henepuk kwit, lit-heneplug ap wene bilingguruk on enekit og-heneplug lauk anyo re, it ap enenggik wereg on anyo en henepuk anyo eleg a?

⁷Ne, hit at unggul unuk on atuhup unuk leho wereg anyo, siahap biahapdoho foruk ai, it ap enenggik wereg ai en duruk anyo, eleg a?

⁸ Allah wene baleg higitdoho duruk kwit, “Hit henebe henenda hundig dauk kahep hag, hinim welahep on henenda hundig enepuk kamek,” ulug, Tuhan en melal-nenepuk kwit, hweag-nesauk anyo, duruk kahep halug de, fano duruk kahep famen,

⁹ap homi enorohole fam kumu esalug de, duruk kahep halug neg de, siag duruk kahep. Ai duruk kahep fam, wene melaleg sahaloho foruk kahep ma, Allah en, “Hit siag duruk kahep o,” ulug, hweag-hesahu.

¹⁰Hit Allah en wene melaloho hweag-nesasi anyo abirangge duruk kwit en, misig neg eke duruk kahep fug halug neg de, wene ai abirangge duruk kahep fug mu, siag at duruk kahep.

¹¹ At Allah en, “Ap enohwesi baluhup ousa,” ulug, uruk kwit, “Ap waruhup ousa,” inim ebag ma, hit eke hwe baluk fug angge wereg lit, ap neg watuk kahep halug de, Allah wene sahalduk kahep ma, siag duruk kahep.

¹²It ap homi en, “Allah en wene melaloho hweag-nesebag wene anyo fam, feiyaloho wundetdoho nenobahasi mu, wene ai fam en-nenebuhu,” ulug, ebetuk kwit, nenele eheg, dil laheg, duruk hag, duruk kamek.

¹³Hit henori enelaheg en fanoe feseruk kahep fug halug, Allah en en-henepuk kwit, henelaheg en fanoap henobahaku fug. Ne, henori henerekwi enelaheg en fanoap debeseil noruk kahep halug neg, en-henebuhu anyo fahet henakol elegdoho welamuhup.

¹⁴Nori, nerekwi. Hiren, “An nenda demdoho boruk kahi o,” uruk kahep famen, ebe duruk kahep fug halug, nanggin-dahuk ulug uruk kahep behep? Allah wene ebe duruk eleg lit, we demdoho boruk fam neg henahap wendaruhu behep? Eleg.

¹⁵Herek eke ane, hare eke a, asum inim, hupmu hubet nauk on inim, wereg eleg kweleg,

¹⁶hit eke en ebe fano welamag ulug, og-om fug angge wereg lit, “Hasiburu homoroho nenggeg, hasum buhundoho wan-deheg, dulug, hahayeg fam noruk kamin,” ulug, hweag-utuk kahep halug, ai fam eke fano dowag ulug, uruk kahep behep? Eleg.

¹⁷Nit nenenda demdoho boruk kahe anyo, ebe inim higitdoho duk fug angge wereg lit, demdoho boruk kahe halug, nit eke nenebuhu fug deg ma, we alemaroho demdoho boruk kahe.

¹⁸Airoho famen, hit eke en, “Hat demdoho neg boruk kahen famen, an neg de ebe inim duruk kahi,” ulug, uruk mu hesauihik mu, yaho yei! Hit demdoho boruk kahep anyo, ebe inim duruk kahep fug halug, “Su ap demdoho boruk eleg on,” boruk famen, an neg de, demdoho bolug ebe nim duruk kahi mu, “Su ap demdoho boruk on,” boruk su neauk kahep?

¹⁹Hiren, “Allah ai, amu wereg demdoho boruk kahe,” ulug, boruk kahep ai fano famen, it mungguat oho wene ai airoho demdoho bolug, enakol en enowag elek duruk famen, hit neg demdoho bolug bok neg welahep hisihi.

²⁰Nori, nerekwi. Hit morue hag il lauk kahep ma hisihi o. Ebe duk fug angge en demdoho neg bolug,[1] bok welahep halug, ai, “Su alemaroho demdoho boruk,” ulug, bouk fug angge welahep a?

²¹ Nit nenakni Abraham anyo en Allah owam waroho indok yaldukmu buhun-debelug, at amloho Ishak Allah obahet febag anyo fam at Allah en, “Su ap ebe on,” ulug, fanoapdoho febag anyo, eleg a?

²²Allah demdoho bebagdeg, ebe inim duruk katfag ma, fanoapdoho febag ma, hehe. Ne, ebe at debag fam at enda demdoho bebag anyo dahan atfag fug, mun higitdoho atfag.

²³ Ai debag fam, “Hun Abraham en enda demdoho bolug, Allah fam dip-debebag fam, Allah en fanoapdoho febag,” ulug, Allah wene lisu baleg anyo higit atsi mu, at Allah en, “Ap Abraham anyo re, an nare,” ulug, ebag.

²⁴Ai halug, nenenda demdoho bolug duruk kahe famen, ebe nim duruk eleg kweleg, Allah en fanoapdoho nenobahaku fug. Ite, demdoho bolug ebe inim duruk kahe fam fanoapdoho nenobaharuk hehe.

²⁵ Ai debag hagdoho, hwe hesangge hambena duruk on Rahab anyo en, it ap Israel on o kumu howag ulug, watfag on omano enowaruk no ulug, heraho feselug, kwe amu on kwaniroho monde fesebag anyo fam, at Allah en, “Hwe su ebe on,” ulug, fanoapdoho febag anyo, eleg a?

²⁶Nenahap wereg kweleg, neneheime lisoho lauk halug, “Ap ai waraha,” uruk kahe anyo hagdoho, nenenda demdoho boruk kahe famen, wene ai ebe inim duruk kahe fug halug de, alemaroho demdoho boruhuk boruk kamul.