Read Ninia Yali YAKOBUS 3 Bible Online

YAKOBUS 3 - Ninia Yali bible

YAKOBUS 3

¹Nori, nerekwi. Allah en en-nenepuk kwit, anggin humon nit ap homi hweag-esauk on guru anyo nenobam nenobahaku neneluk deg ma, hit abirangge en, “An guru welaruhuk neg,” bouk fug.

²Nit abirangge siag duruk kahe. Nit nenele uruk on ambiangma siag atuk kalep fug men, nit mun fano wereg lit, nenenggik neneyog fam siag duk ale nenepuk anyo, abirangge sebeloho foruk kala.

³Wam kuda walug lauk kwit, kumbi ambilik hetdoho folug, nit laul boruk fil anyo og-eneplug lauk kahe.

⁴Ne, kapal oho hum angge famen, o hol omamne firuruk kwit, walug lauk famen, kapal hwaldil lauk on anyo en, “Etma lamin,” bolug, ambiang hwalduk angge ulug, e dorangge anggulumu ililig kemudi anyo fam, hwaloho monde foruk.

⁵Ai hag, nenambilik anggen anyo. Nenenggik neneyog hum angge famen, nenambilik anggen dorangge ai en uruk kahe fam, wene humon saha uruk. Indok anggen dorangge en harep humon nauk anyo, eberiek.

⁶Nenambilik anggen ai re, indok hag o. Di siag su siag unggul unuk domog indip de, nenambilik anggen ai. Nenambilik anggen ai re, nenebe foma deg ma, nenebe abirangge siahapdoho nenobaharuk. Indok ambulbulmen indok anggen walug, nenambilik anggen fam hunduko feik waharuk mu, nit ap homi kwenangma on duruk kahe ale, mundoho dil lauk kwit, siag neg dil lauk kamag ulug, nenobam fisako feil lauk on indip de, nenambilik anggen neg.

⁷Suwe bak mel, huhubi maro mel, yahaye kisu mel, marea ikan mel, di angge su angge waldeg ai, seneko il wat-enepuk angge deg ma, seneko il wat-enepuk famen,

⁸nenambilik anggen neg de il waruk fug alereg. Nenambilik anggen ai re, mun siag. Ap homi nenowarikoho lit, waramag ulug olok angge nauk on fam folduk on hag etma hoporoho wereg ma, sebeloho fouk fug alereg.

⁹ Nenele foma fil en Nenakni Tuhan mot-deheg, ne, foma fil en ap homi Allah orohole hag wal-debag anyo, hururungdoho feseheg, duruk kahe.

¹⁰Nenambilik misigmen wilibik waharuk kwit, ahayeg enobam feseheg, hururungdoho feseheg, duruk kahe ma, airoho duhup mun ousa, nori, nerekwi.

¹¹Ik eleruk misigmen, eke habup on wilibik waheg, eke seram on wilibik waheg, duruk mu, hauk kahe behep? Eleg.

¹²Ne, werema en sak yihikeg, sak en werema yihikeg duk alereg, behep? Ne, ik habup on en ik seram on wilibuk alereg behep? Airoho mundoho duruk eleg, nori nerekwi.

¹³Hit ap eke henenggelegma enda wereg on wereg lit, munangge manangge folo-folo enegdoho hauk on halug, ap ai enda wereg on hauk kahep ma, enda sebeleg wereg lit, fano dil lauk mu, hinil hauk kamuhup en dil lauk kamag.

¹⁴Hit henenda wereg on famen, henare eke ologap deberuk kwit, haperoho noruk kaheg, “An den wenggelduk ale neg dele,” beil noruk kaheg, duruk mu henenda leho fahat-dahup, ai ousa.

¹⁵Hit henere eke ologap deberuk kwit, leho fahat-dil laheg, “An wenggelduk ale neg duhuk,” boruk kwit, dil laheg, duruk halug, mun naleg-haleg atuk kwit, di siag su siag atuk mu, hauk kahe ai, at enda wereg on Allah en henenda wenggeloho henobaharuk kweleg, duruk kahep fug. Ite, at Iblis en ap homi kwenangma on enendama wenggele feseruk kweleg, enenda nauk halug, duruk ale neg duruk mu, hisihi.

¹⁷Ne, at lendi enda wereg on en nenenda wenggeloho feseruk ai, nit siag duk fug angge fano neg wereg lit, ap homi inim suahal uk fug angge fano seberoho welala beheg, nenenda sakoreg lit napma-hapma beheg, ap homi enelaheg en fano debeseheg, e anggen ebe on yihiruk hag, airoho neg fano dil laheg, nenenda hwenaroho deg lit, ap eke fano debeheg, eke siahap debeheg duk fug angge, nenenda bekitdeg lit, higitdoho neg debeseheg, duruk kamuhuk ulug, nenenda wereg apdoho nenobaharuk ai o.

¹⁸It ap homi enenda sebe-debeseil noruk on anyo en, enenda sebereg welamag ulug debeseil noruk kwit, a anggen yatuk hag enendama kwelabil noruk mu, anggen yihig hag ap homi en fano neg duruk kamuhup ai.