Read Ninia Yali YAKOBUS 4 Bible Online

YAKOBUS 4 - Ninia Yali bible

YAKOBUS 4

¹Hit yeik yabeheg, suahal eheg duruk kahep ai, indip de keman? Henenda nauk indip en, “An dam duhuk, hat dam duhun,” ulug, henendaman yeik belaluk duruk kwit anyo, eleg a?

²“Munangge manangge wela e!” ulug, henenda nauk famen, wa fug ale atuk halug, ap at watuk kahep. Ne, di angge su angge suahi boruk kahep famen, wa fug ale atuk halug, suahal eheg, yeik yabeheg, duruk kahep. Hit henenda boruk angge anyo, Allah heng-duk fug angge welahep fam, wa fug angge welahep.

³Ne, hit foman, Allah en og-hesowag ulug, heng-duruk kahep famen, henenda nauk on anyo mutlug lauk kwit, elehapdoho fahat-dako, henenda mun amuroho wenggele folug, uruk kahep ma, og-hesahu mun eleg.

⁴Hwe misig en famen, ap humdoho og-enepuk hag duruk kahep su, it ap homi kwenangma on en duruk ale hinim henenda hundig duruk kahep halug, Allah hinim minggit-dauk anyo re, henapeleg ma, uruk kahep? Aireg ma, ap eke en, “It ap kwenangma on duruk ale ninim hun-da o,” bolug, duruk halug, Allah inim minggit-dauk.

⁵“Allah en Aheime nenendama kwelabe nenobahasi mu, wereg lit en, nenenda nauk on anyo mutlug lauk kahe halug, Allah Aheime anyo en,[2] Yehei, ulug, enda wat-dauk,” ulug, Allah wene lisu baleg anyo, we indip eleg kweleg, baleg wereg behep?

⁶ Allah Aheime endama airoho wat-dauk famen, siag embesoukwag ulug, Allah enda hundig en humdoho nenepuk. “It ap homi enenda winik-wonog uruk on halug, Allah en sebeloho feseruk famen, enenda sebeleg wereg on neg de, Allah enda hundig en debeseruk,” ulug, Allah wene lisu baleg wereg.

⁷Aireg ma, Allah apma sebe iek. Allah apma sebe ulug wereg ma, Iblis siahap henebik waharuk halug, longgo ukwag ulug, hinim yapuk kamek.

⁸Hit Allah apma kabog-aik waharuk halug, at fahat-henesug laruhu. Hit siag duruk kahep su, henenggik horeheg, ne, henenda biren su, henenda misig debelug, henesiag embeseheg, duruk kamek.

⁹Henenda hesilduk kwit, oba yatuk kamek. Hit unda yareheg, henahayeg deheg, duruk kahep ai embeselug, henenda hesilduk kwit, oba yatuk kamek.

¹⁰Allah apma henenda sebe iek. Sebe uruk halug, aren hit leho henobahaku.

¹¹Nori, nerekwi. Nabug-habug uruk ale re ousa. Hiren henare henerek enebug seiale baleheg, enebug uruk kwit, en-enebeheg, duruk kahep ai, “Allah en wene melaloho en wene melaloho hweag-nesebag ai siag ebag,” ulug, duruk kwit, Allah en en-enebuhu hag duruk kahep ma, hit wene melaleg anyo higitdoho duruk kahep fug on. Ne, Allah wene melaloho hweag-nesebag anyo higitdoho duruk kahep fug ai fam, wene melaleg enetuk kahep ma, hisihi.

¹²Ne, wene melaleg hweag-nesebag anyo re, en-nenepuk on at Allah amu wereg. At amu en, nenahap wendareheg, elehapdoho nenobahakeg, duk ale fano famen, hit Allah hag dauk kwit, henere henerek en-enepul, ulug, duruk kahep a? Ousa o, nori, nerekwi.

¹³ Yaho yei! Hit wene balduk kwit, “Ketia ane? sono a? O kota etma lahukdeg, uang andog-dahuk ulug, di angge su angge hundutil lauk kweleg, tahun eke amag,” ulug, uruk kahep anyo, henesanggo holiek.

¹⁴Hit sono henebuhu ale anyo, henapeleg wereg lit, uruk mu hisihi. Neneluk welahe anyo re, soni ahe hag. Soni ahe anyo re, misiham laharuk mu, inil hauk famen, eleg atuk hag ai, nenebe airoho nenepuk.

¹⁵Hiren uruk kwit, “Nenakni en wenggeloho hweag-nesauk halug, nenebe fano wereg lit, diroho dul,” ulug, airoho uruk kam ale neg de, fano.

¹⁶Sono aruhu ale henapelegdeg kweleg, heneluk on hag dauk kwit, leho fahat-dauk kahep ai re siag at duruk mu hisihi.

¹⁷Ne, hit fano duruk ale heneluk deg lit, duruk kahep fug halug ai re, siag at duruk kahep.