Read Ninia Yali YAKOBUS 5 Bible Online

YAKOBUS 5 - Ninia Yali bible

YAKOBUS 5

¹Hit ap henenggik wereg on su henesanggo holduk kamek. Hit ouk nenek duruk kamuhup sali horog aik waharuk mu, oba yag-dauk kamek.

² Henangge abirangge omano siag aheg, henesum fano on omano bak en dilipdoho feheg,

³heneuang bosie emas inim, perak inim, buhundeg anyo ip-dil laheg, dil lauk. Heneuang ipdoho fesi ai fam, henenda kiburoho fahat-dalug welatuhup anyo enam aruhu. Ne, ipdoho feil lauk hag, henahap airoho indok en nil lahu. O ahae fotog mun horog aik waharuk kweleg famen, di angge su angge henenda hundig angge andogdoho fahat-dauk katuhup mu, henenggali en oba yag-dauk kamuhup.

⁴ It heneyabuk wiri henobahausa anyo, onggo higitdoho og-esa angge famen duruk katuhup mu, it enele kuk-sal henepuk su, esakiek. It foma anggen yihig walug og-hesa waharuk anyo oho enele uruk ai, nenakni mun along wereg ahun Allah anyo esanggo holduk.

⁵Hit kwenangma mun fano neg wereg lit, henahayeg halug neg dil lauk kahep. Wam sei kwelap-atuk halug, warukoho lit, siburu hililoho og-esauk hag, hit di angge su angge ahalue wereg on neg nele beil lauk kahep fam, henesei werehap dauk kahep ma, henowaruhu.

⁶It ap homi fano on siag duswa fug on[3] famen, it wene onggo hweag-hesauk eleg kweleg, hiren neg seiale wene enobam feselug, enowatuk katuhup.

⁷Aireg ma, nori, nerekwi. Ai henobaharuk anyo wenggelukwag ulug, Tuhan waruhu mu, henenda hwerie folug welamek. Ap eke en siburu a yaho folug, osit wareheg, hebi fu heheg, duruk kwit, wirik amag ulug enda hwerie folug, nangno-hauk anyo, furebeiyek.

⁸Ai hag hit oho henenda hwerie folug welamek o. Tuhan waruhu sali mun horog aik wahasireg wereg ma, henenda hambuk dobahat-dalug welamek.

⁹Nori, nerekwi. Allah en siag onggo henobam feik wam no, henenda hape boruk kwit, at eke abug baleheg duk fug. En-nenepuk on anyo re, sokolma horog aik wahareg wereg, ai furebeiyek.

¹⁰Yaho yei! It ap Allah en wene hweag-esauk kweleg, wene hweag-hesauk katfag on nabi omano, lal-fal enepuk kweleg, enenda hwerie folug onolokdoho wereg lit wauk katfag anyo hag, hit higitdoho enebut wal-heheg duruk kamek.

¹¹ It anggin enobam atuk kweleg, enolokdoho wereg lit wauk esalug, Allah ahayeg enobam feseruk katfag anyo heneluk. Ap Ayub oho anggin obam atuk kweleg wauk katfag ai, endam holduhup. Allah ap homi abirangge enelaheg en, fanoap debeseruk mu, ap Ayub anggin obam atuk kweleg enda hwerie folug, mun webag ma, ai en, Allah en ambiangma debebag ale ai oho heneluk.

¹² Aireg ma, nori, nerekwi. Allah unuk wema hesangge uruk ale re ousa. Bohol unuk mel, kwenang unuk mel, munangge manangge unuk yiko, “Hweag-hisihi,” ulug, hweag-esauk kahep de, ousa. Hit siag uruk fam Allah onggo henobam henobahauk no, “Yu o,” boruk halug, “Yu o,” uhup. Ne, “Eleg o,” boruk halug, “Eleg o,” uhup. Wene along on ai at hweag-hisihi.

¹³Ap eke henenggelegman anggin-fanggin obam atuk halug, somban uruk kamag. Ne, eke enda ahayeg boruk halug, Allah unuk leho foruk kamag.

¹⁴ Ne, eke ouk duruk halug, ap Yesus omaliki hwalduk on wamag ulug wol-enebuhureg, waharuk halug, ahalue obam are debelug, Allah unuk yiko obahet somban uruk kamag.

¹⁵Ne, enda Allah fam dip-debelug, somban uruk halug, nenakni en ap ouk on anyo ahap wendaroho omamneroho lauk kamag ulug, fanoap debehu. Ne, at siag disi ale wereg halug, siag ai nim elehap debehu.

¹⁶Aireg halug, hit siag duruk kahep anyo, at eke il hanim fam fag-deheg, at eke en eke obahet somban eheg, duruk kamuhup fam, ouk henepuk halug fanoap henepuk karuhu. Ap eke siag endama eleg lit, enda wenggeleg fam ele abiroho somban uruk halug, Allah en embesehu fug. Esanggo holuhu neg.

¹⁷ At ap Elia ai nit hag on famen, “Osit wam fug o,” ulug, ele abiroho somban ebag ma, osit kwenangma wambik waharuk eleg kweleg, tahun henahan debelug, bigalem folfaligen debag.

¹⁸ Ai en, fobik somban ebag ma, osit anyo delimahan witil wambik watfag ma, enggela a yaho anyo fehelfagdeg, anggen yihil lebag.

¹⁹Nori, nerekwi. Ap eke Allah ele fahet, “Holuhuk nerim,” ulug, kwaniril lauk mu, hit eke en ap anyo enda onggone folug, walug waharuk halug,

²⁰ Allah en hweag-hesauk kwit, “Ap ai siag duruk anyo embeselug, an nele wowag ulug, enda onggone folug walug wahep halug, ap ai waratlug laukmu lauk men, asiag elehapdoho ahap wendarukwag[4] ulug, dehep ma, fano dehep,” ulug, hweag-hesahu ai eberiyug. An Yakobus en balihi.