Read Ninia Yali 1 PETRUS 1 Bible Online

1 PETRUS 1 - Ninia Yali bible

1 PETRUS 1

¹Nori nerekwi. An Petrus Yesus Kristus en ayonggo rasul mon-nabik wahasi on anyo en, lisu su baloho, hit Nenakni Allah en henebe atam momal-henepfag on ketia iya elamna fahet di o su o buhuloho lauhupdeg, o propinsi Pontus inim, Galatia inim, Kapadokia inim, Asia inim, Bitinia inim, ap homi enenggeleg kwe hundomog welahep on etmano, henekit mondorik wahi. Henebe Allah en endaman bolug, momal-henepfagdeg Yesus Kristus ele holoho duruk kamuhup, ulug, apma henobahakeg, amep fam ho-henebeheg, dikoho. “An nonggwareg nomaliki amuhup,” ulug, og-henebihi, ulug, at Aheime en og-henepsi ai. Allah abut fano anyo en fano on og-heseheg, henenda atam deg fobik deg hambuge henobahakeg, humdoho henepuk kamag.

³Tuhan Yesus Kristus Akni Allah ai neg mot-duruk kamul! At nenebe enda hundig en Yesus Kristus waratsi men, oluk apdoho unduhuk fesi ai fam, nit ket nenoluk apdoho nenobahasi. Ket nenoluk apdoho nenobahasi mu wereg lit, “Fanoap nenebuhu,” ulug, nenendama ebetuk kwit, nenahayeg boruk kahe.

⁴Airoho nenepuk mu, hit akni hiling amuhup on ai, filik atuk eleg on, siag atuk eleg on, eitog mundoho welaruhu on, Allah en hit at omaliki on henobahet boholma henobahasi mu wereg.

⁵Henenda at fam dipdeg welahep halug, Allah omamne fam fahat-henesug wereg lit de, henahap wendat-henebuhu on ahae fotog fam ename fohu en wereg.

⁶Aireg ma, ketia we elamna fahet ouk bouk fam henabut balduk halug henenda hesilduk kwit famen, henendama henahayeg boruk kamek.

⁷Airoho henepuk ai re, emas onggo alongdoho hundutuk on anyo fano a, siag a, ulug, indok fam wal-hauk hag, henenda Allah fam demdoho dipdeg welahep a, eleg a, ulug, eneg amag ulug, di ouk su ouk hauk kahep ai. Emas ai obahatman eleg aruhu on, ebe mun leho on de, henenda Allah fam dipdeg welahep on ai neg, at fam dipdeg welamuhup halug, henebut bale folug, Yesus Kristus waruhu salim, mot-henobahakeg, leho henobahakeg, henebug fanoroho eheg, duhu.

⁸At ebe atam hinil hauk katuhup eleg on famen de, henenda hundig welahep. Ne, henendareg lit, ketia dia hinil ha fug angge welahep famen, obam dip-deberuk kahep. Ai fam henendaman, “Fobik fanoap nenebuhu,” ulug, dindiluk fug aleroho henendama henahayeg humon hauk kahep.

⁹Henenda at fam dipdeg lit wereg halug, ahae fotog fam wendat-henebuhu ai re, ketia akni hiling atuk kahep ai.

¹⁰Wendat-henebuhu ai re, it atam Allah wene hweag-esauk katfag on nabi omano en wene ai fahet hera-deheg, furoho kumu heheg, duruk katfag ai re, Allah en hit we og-hesasi on su fahet owan wereg kweleg, uruk katfag.

¹¹Uruk katfag on ai re Kristus Aheime enendama wereg lit de, “Kristus anggin-fanggin hauk kwit, wararuhu. Waratlug fobik oluk aruhu mu, leho fohu,” ulug, hweag-esebag ma, uruk kwit en famen, “Keroho aruhu? Nunggwe salim aruhu?”[1] ulug, “Nenoluk ala,” ulug, furoho kumu hauk katfag.

¹²Kumu hauk mu, at Allah en de, “Wene ai re hit henonggwareg fahet de fug. It fobik owan on fahet duruk kahep,” ulug, hit fahet ebag ai. Airoho hweag-esauk kwit welatfagdeg en, fobik Allah en Aheime boholman belabik wahasi mu, it ap Fano Wene Yesus Kristus disi wene anyo, hweag-hesauk kamag ulug, enendama wereg lit, ketia fagdoho hweag-hesauk on ai fahet uruk katfag. Wene ai re, it boholman yonggo mon-enebik waharuk on malaikat omano en oho re, “Yehei! Nit wene furoho nenoluk ala e,” ulug, boruk.

¹³Ai halug de, wene ai furebelug henepe hebeloho, henenda enggatdoho wereg lit, “Allah en Yesus Kristus ebe unug-nesauk kwit, fano angge og-nesa waruhu,” ulug, henenda at obam monde folug, ebereg lit welamek.

¹⁴Atam wene ai henapeleg wereg lit de, di angge su angge henenda nauk fam duruk katuhup ai, fobik henobabut ai on wa fug. Doron enaknisi enele holeg wereg hag, Allah ele henesanggo holeg welamek.

¹⁵Di angge su angge duruk kwit de, di ale su ale duruk kwit, Allah henayonggo fesi on amu fano eneg wereg hag, higitdoho obahet eneg wereg lit fano duruk kamek.

¹⁶ At Allah en, “An nobabut fano eneg welahi mu, hit oho fano eneg welamek,” ulug, ebag ma, Allah wene lisu baloho febag.

¹⁷Nenakni Allah obabut de ap homi enahap fam neg il esalug, foma alukwema feseheg, foma ambolma feseheg, duruk fug. We enobabut duruk ale domog higitdoho siag duruk onggo enobam feselug, biling-enepuk. Ai fam hiren de, “Allah Nenakni,” ulug, somban uruk kwit, kwenangma suma elamna fahet henebe ap bohon hag wereg lit, at ebe henakoldoho duruk kamek.

¹⁸Atam henembu henomba duruk katfag hag enobabut oko eleg aruhu on fahet alemaroho duruk katuhup famen, Allah en henenggo baloho fisela-henepsi onggo ai re, eleg aruhu on, emas fam perak fam onggo balsi fug ai henoluk.

¹⁹Ite, onggo humon fam fisela-henepsi. Domba omalik eke ebe et, oruk et, mun fano on watil lauk em, amep wilipuk hag, at Yesus Kristus amep wilibik wahasi ai fam henonggo baloho fisela-henepsi.

²⁰Yesus ai re, Allah en kwenang su owan wal-duk fug angge wereg lit, airoho dukwag ulug, momalfag famen, ebe ketia ambiangma hit henahap wendat-henebukwag ulug, kwenangma wambik wahasi.

²¹Wambik wahasi mu, at fene en hit at Yesus waratsi men, oluk apdoho unduhuk fesireg, leho fesi on Allah obam henenda dip-debeheg, “Fobik Allah en fanoap nenebuhu,” ulug, ebereg welaheg, duruk kahep ai.

²²Ebe wene ai hole folug higitdoho duruk kwit, henendama siag on horoho hwik-esalug, henori henerekwi Allah omaliki on henenda demdoho on fam[2] henenda hundig enepuk kahep ai, hinim hundig wereg lit, nenda hendaroho wereg nu.

²³Fobik endag-henepsi on ai, ap homi waratuk on en enomaliki endag-enepuk hag endag-henepsi fug. Ite, Allah eitog mundoho oluk wereg lit, wene eleg am fug angge welaruhu on ai fam ket endag-henepsi.

²⁴ Ai Allah wene baleg fam uruk kwit, “Ap homi mundoho enebe re e enggela hag. Fano, ulug, mot-debeseruk ai, e anggen mot-duruk ai hag, mot-enepuk. Enggela angge bug aheg, owil loloho wambeheg, duruk.

²⁵Duruk famen de, Tuhan awene ai, mundoho mundoho welaruhu,” ulug, ebag ale lisu baleg wereg. At awene ebe re Fano Wene hweag-hesauhuk ai.