Read Ninia Yali 1 PETRUS 2 Bible Online

1 PETRUS 2 - Ninia Yali bible

1 PETRUS 2

¹Ai halug de, siag duruk kahep on ai mundoho embeselug welamek. Seiale eheg, henenda biren fam deheg, boureheg, ap homi enebug siag eheg, uruk kam fug.

²Omalik ket ondoho on ag obok en nauk kwit wereg hag, ebe wene wauk fam wirik atuk mu, henahap wendat-henebukwag ulug, wene ai neg henenda duruk kwit, wauk kamek.

³ Allah wene fam diroho baleg wereg: “Tuhan obabut fano deg ma, hauhup ai.”

⁴Ai halug, at helep oluk wereg on hag ulug, akit manik. Ap homi en de, “Helep ai siag,” ulug, embeseswa famen, Allah en, “Fano su mun fano on,” ulug, eneko fesi.

⁵Airoho fesi mu, hit henebe helep oluk wereg ai on hag wereg lit, at akit manik. At akit wamuhup mu, Allah en at onggwareg obam wiroho henobahaukwag. At obam wirigmu henebe Allah obahet eneko at il hanim duruk on imam atlug, di on su on Allah obahet foruk hag, hit Yesus Kristus hinim hundig wereg lit, Allah Aheime henendama henepuk kweleg, at Allah ahayeg ha on neg og-utuk kamek.

⁶ Ai on fahet Allah en diroho ulug, ebag. “An o Sion suma helep oboule eke wiroho ferihik su hakiek. Ebe mun fanoreg ulug, eneko ferihik ai, henemu hundomog henenda at obam dipdeg lit, welamuhup halug de, henenggali hahup eleg.” ulug, ebag ma, lisu baloho febag.

⁷ At fano mundoho on ai re hit henenda demdoho at obam dipdeg welahep halug, at mun fano, ne, it at obam dipdeg eleg on fahet diroho ebag: “It ap o helep on wituk kwit, Helep su siag, ulug, embeseswa on anyo en oboule doal-atsi su,” ulug, ebag.

⁸ Ne, eke diroho ebag. “Helep ai fam eneyog ahap wororogdoho wat-dauk kwit, ying-atuk kamuhup,” ebag. Wat-dauk ai re, Allah wene su demdoho ulug, enendama bouk fug angge wereg fam, Allah en ebag higitdoho wat-delep deg man, wat-dauk.

⁹ Famen de, hit at omaliki amag ulug momal-henebeheg, at Nenakni unuk bogdeg raja obahet duruk kamag ulug, imam unduhuk henobahakeg, at onggwareg unggul unuk on eneko henobahakeg, “Nonggwareg nomaliki,” ulug, og-henebeheg, disi ai. At Allah en hit o mum fam wereg man wilibik watlug, at ebe nikdoho seleg mundoho wereg on fam wamag ulug momaloho henayonggo fesi ai re, “At mun fano duruk,” ulug, abug hweag-isil lauk kamag ulug, disi.

¹⁰ Atam de Allah omaliki eleg on welatuhup famen de, ketia henebe Allah omaliki atuhup. Atam de Allah en ap homi enda enesug ale henapelegdeg welatuhup famen de, ketia Allah henebe enda hundig en og-henepsi mu welahep.

¹¹Nori nerekwi, nenda hundig on! Henebe ap bohon buhuloho lauhup on hag o etma wereg lit, di wene su wene henendaman kahaloho lahaik watlug, henendaman nauk halug, henambono boruk kahep on ai re, selei on en enowatuk hag, henebe siahap-henepmin ulug, henendaman kahaloho lahaik waharuk on ai, embeseruk kamuhup ulug, hweag-hesauk kahi.

¹²It ap homi dag kwe Allah enapeleg on hinim wereg lit, iren de, “It siag duruk,” ulug, henebug siagdoho uruk kwit en famen, hit henobabut fano duruk mu, inil hesahupdeg, ap homi en Allah fobik waharuk mu, mot-dukwag ulug, hit henobabut higitdoho duruk kamek.

¹³Tuhan leho foruk kwit, it ap nenowesi kwenangma on fahat-nenesug wereg on mundoho enapma sebe ulug, welamek. It fahat-nenesug on enowe Kaisar inim,

¹⁴it at apma on gubernur omano inim, ap homi fahat-nenesug lit, siag duruk halug, siag onggo enobam feseheg, fano duruk halug, mot-debeseheg, duruk kamag ulug, unduhuk wereg ma, enapma sebe ulug, enele holduk kamek.

¹⁵Allah en de hit diroho duruk kamag ulug enda boruk. Ap homi enenda eleg on, wene enapeleg deg lit, uruk on ai, hit fano duruk fam enele eleg amag ulug, duruk kamag ulug, enda boruk.

¹⁶Siag on apma wereg ma, “Allah en fisela-nenepsi,” ulug, fano duruk kamek. “Fiselaroho nobahasi mu kain welahi,” ulug, siag on eke herako duruk kam fug. Allah amingming angge wereg lit, duruk on neg higitdoho duruk kamek.

¹⁷Ap homi mundoho enalong beheg, henori Allah omaliki on ai henenda hundig welaheg, Allah henakol beheg, fahat-nenesug on Kaisar ai apma sebe eheg, duruk kamek.

¹⁸Nori nerekwi. Hit henowesi enemingming angge welahep ma, enapma wereg lit enenggilug boruk kamek. Enobabut mun fano lombukdeg on neg fug, ite, enobabut siag on inim enenggilug boruk kamek.

¹⁹Hit siag duk fug men, siahap-henepuk mu, ouk hauk kahep halug de, Allah enda boruk ale furebelug, henenda hambukdoho welamuhup halug, aren fanoap henebuhu.

²⁰Ne, siag duruk onggo yeik henowatuk halug de, henenda hambukdoho welamuhup halug, mot-henebuk fug alereg. Hobabut en uk alereg famen, fano duruk kweleg, siahap-henepuk mu ouk hauk kwit, henenda hambukdoho wauk kamuhup halug de, Allah en dang-henebuhu.

²¹Kristus ebe hit henobahet ouk nenek dil waratsi ai fam hit oho re, at obabut wal-heheg wowag ulug di ouk su ouk hahup en Allah en henayonggo fesi ai.

²² Aren siag eke disi fug. Ne, aren seiale lal-enepuk mu, ap homi en holswa fug.

²³ Enesuahal olokdoho bet-duruk katswa famen de, aren onggo bet-enepsi fug. Ouk hauk kwit en, “An den fobik onggo henowaruhuk,” ulug, onggo hweag-esa fug angge welatsi. We, “Allah en siag onggo enobam feheg, ayo wiroho en-enebeheg, higitdoho duhu on wereg,” ulug, at enggikmu folug, ele onggo uk fug angge bok welatsi.

²⁴ Nit nenobabut siag duruk katuhuk on ai, ap homi waratlug di ale su ale duruk eleg ai hag, nit siag on embeselug, nenoluk wereg lit, Allah enda fano boruk ale neg duruk kamag ulug, nit siag duruk katuhuk anyo at Kristus obame fahat-dasireg, e salib fam ware fousa ma waratsi. At ebe dilip-delapdoho watswa ai fam, hit fanoap henepsi.

²⁵Hit atam domba longgo ik lauk hag henebe longgo uruhup famen, ketia henebe hwal-henepuk on, fahat-henesug wereg on fam sombandoho og-heneplug wahasi mu welahep.