Read Ninia Yali 1 PETRUS 5 Bible Online

1 PETRUS 5 - Ninia Yali bible

1 PETRUS 5

¹Hit Allah omaliki fahat-enesug welahep on, an oho airoho fahat-enesug welahi on en komo-henebik. Kristus ouk nenek dil waratsi ai, an nil hauihik. Fobik ebe fukiroho unug-nesa waharuk halug, yande-duhuk ai, an inim leho nobahaku mu, yande-nabuhup. An den nele sakoroho komo-henebik.

² Allah omaliki domba hwal-enepuk hag, fahat-enesug welamag ulug, henayonggo fesi mu, fahat-enesug welamek. Henerimdeg lit, it foma enele ningdoho uruk halug, fahat-enesug welam fug. Ai Allah en endama boruk ale higitdoho henobabut mun fanoreg lit, fahat-enesug welamek. Henonggwareg onggo og-nesowag ulug neg de fug. Ite, henendaman fanoroho fahat-enesug welamek.

³Allah omaliki fahat-enesug welamag ulug og-hesasi ai, hit henebe enowesi henunuk bogdeg hag melal-enepuk kam fug. Ite, hit it enowal-heheg wereg lit, duruk kamek.

⁴Airoho duruk kwit, wereg ma, Nenowe domba onggwareg ahun leho on anyo waruhureg, “Mun fano duruk katuhup,” ulug, mahkota ambogbag eleg aruhu fug on og-hesa waruhu.

⁵ Ne, airoho hit doron sauwe on anyo henowesi fahat-henesug wereg on enapma welamek. Hit mundoho re henonggwareg en leho fahat-da fug angge enapma wereg lit, hit eke en it eke enemingming angge welaheg, it en eke hit henemingming angge welaheg, wereg lit, let-let duruk kamek. Allah wene lisu baleg anyo fam diroho ebag. “Enonggwareg en leho fahat-dauk on ai Allah en sebele feseruk. Ne, enenda sebele fahat-dauk on ai Allah enda hundig en debeseruk,” ulug, ebag.

⁶ Allah en fobik endan bolug leho henobahaukwag ulug, ketia at enggik omamne wereg ulug, apma sebeleg welamek.

⁷At Allah henebe endareg ma hit di angge su angge fahet meneni yatdoho ebetuk kahep on ai embeselug de, henenda at obam dip-debelug welamug.

⁸At Iblis heneselei on anyo en singa olomene olok humon hag, di angge su angge houmdoho namin ulug, ele kouwa dil noruk hag, “Sa hag siahap debemin?” ulug, hera-henebil noruk ai, henepe hebeloho hinil fanoroho welamug.

⁹Airoho wereg lit, henendaman de, “Nenori nenerekwi Kristus omaliki o di obam su obam etma di ouk su ouk airoho hauk hag, hauk kahe,” ulug, at Iblis waharuk mu, ele holuk fug angge embeselug, henenda Allah obam dip-debelug, ningdoho sapdeg lit welamek.

¹⁰Wereg ma, at Allah ebe yande-duruk kamuhuk on ai hag, hit Kristus inim hundig wereg ma, hit hinim yande-henepuk kamag ulug heneyonggo fesi mu, ketia dia dorangge neg henobam di ouk su ouk hauk kamuhupdeg, fobik at abut mun fano on anyo en higirap henebeheg, henenda wirik-ap henebeheg, henomamneap henebeheg, hambugap henebeheg, duhu.

¹¹Di on su on abirangge at amu neg onggwareg wereg lit, foroho lit welamag. Amin.

¹² An wene horogdoho su fam komoroho henekit mondorik waikoho lit de, lisu balukwag ulug nenere Silas Kristus omalik dipdoho duruk on deg ma hauihikdeg, ayonggo ferihikdeg, balsi mu, henekit mondorik waharuk kahi ai. Allah enda fano en fanoap nenepuk on ebe su, ulug, an noluk deg lit, dik-demdoho hweag-hisihi. Henenda ai fam dipdeg wereg lit, henenda hambukdoho welamek, ulug, lisu henekit mondorik waharuk kahi ai.

¹³ Henori Yesus omaliki Allah en momal-enepsi mu, o Babilon[4] suma wereg on en dang-henebeheg, namloho Markus en dang-henebeheg, dehesa.

¹⁴Ne, hit Yesus omaliki neg welahep ma, mako bugdoho dang-dang atuk kamek. Allah en hit Kristus hinim hundig welahep on abirangge henenda hambukdoho sen-henesug lit welamag.