Read Ninia Yali 2 PETRUS 1 Bible Online

2 PETRUS 1 - Ninia Yali bible

2 PETRUS 1

¹Nori nerekwi. An Simon Petrus, at Yesus Kristus ayonggo rasul unduhuk nobahalug, mon-nabik wahasi mu, wene su lisu baloho henekit mondorik wahi su. Yesus Kristus ebe Allah wereg lit, nenahap wendat-nenepuk on ai re, obabut higitdoho duruk on en hit ninim nenenda at fam dipdeg welahe ma re, hit ninim higitdoho fanoap nenepuk on, wene su henekit mondorik wahi ai.

²Hiren Allah oho, Yesus henowe Tuhan oho, henolukdeg ma, it enobabut fano en fano on og-heseheg, henenda hambugapdoho henobahakeg, hum-hamdoho henepuk kwit, welamag.

³At Kristus de ebe Allah eitog wereg lit, di angge su angge nikaleroho duruk mu, mot-duruk kwit neg wereg on anyo en neneyonggo fesi ai. At ebe furoho nenoluk atlug, nit nenebe nenoluk wereg lit, at Allah fahet higitdoho duruk kamag ulug, onggwareg omamne fam di angge su angge mundoho og-nesasi mu, welahe.[1]

⁴Ap homi kwenangma on suma di angge su angge enendan di siag su siag duruk kwit, siahap-dauk on ai embeselug, wilibik watlug de, hit Allah obabut wowag ulug, fano angge og-hesauk. Aren nikdoho duruk mu, yande-duruk kwit wereg on anyo en, “Fano on, hum on, onggo fam wa fug alereg on og-hesahu en wereg,” ulug, abug hweag-nesasi anyo, og-nesauk ai.

⁵Ai on akni hiling amuhup en anggilugdoho duruk kamek! Henenda at obam dipdeg lit de, di ale su ale ebe on duruk ale neg obam loukdoho henoluk aheg, higitdoho duruk kwit, fobik Allah ebe oluk wereg ale ai obam loukdoho henoluk aheg, duruk kamek.

⁶Allah ebe henolukdoho wereg lit, fobik de, siag duk ale henepuk kweleg, we bok welam ale obam loukdoho heneluk aheg, anggin-fanggin henepuk kweleg, amurururoho duruk ale obam loukdoho henoluk aheg, ai en, Allah apma wereg lit, at obahet neg duruk ale ai obam loukdoho henoluk aheg, duruk kamek.

⁷Allah obahet neg duruk kwit de, fobik henori henerekwi henendaroho wereg ale ai, obam loukdoho henoluk aheg, henori henerekwi henenda hundig enesug wereg lit, fobik ap homi enebe abirangge henenda hundig enepuk ale ai, obam loukdoho henoluk aheg,

⁸ai on obam loukdoho henoluk atlug, fobik ambiangma humdoho obam loukdoho henoluk amuhup ai fam, we bulmu ia alemaroho welam fug angge Tuhan Yesus Kristus fik-furoho henoluk amuhup.

⁹Hit foma ai on henoluk atuk eleg halug, henenda hup bindoho welahep. “Siag duruk katihik on Allah en ho-napsi,” ulug, uk on famen, henapeleg atlug welahep ai.

¹⁰Ai halug de, nori nerekwi. Allah en eneko momal-henepsireg henayonggo fesi ai re, demdoho amag ulug, anggilugdoho duruk kamek! Airoho duruk kamuhup halug, Allah obam dip-deberuhup on anyo embeselug wilibik lahup fug.[2]

¹¹Tuhan Yesus Kristus nenahap wendat-nenepuk on anyo di angge su angge apma fahat-dalug, mundoho leho welaruhumu etma, “Hit henonggwareg atuhup on,” ulug, fanoroho dangdoho og-heneplug kuhu.

¹²Aireg ma, Allah wene ebe wene henoluk atuhupdeg, henenda hambukdoho foroho welahep famen de, an wene su fahet ekenim up sahaloho ebet-hesauk katmin.

¹³An nebe su noluk wereg lit de, wene su fahet ebet-hesauk karuhuk fano boruk kahi famen de,

¹⁴Tuhan Yesus Kristus en hweag-nitsi hag, an nebe su nahut haeg on fahet elamna welahi su re, ketia dia embeselug lahuk, ulug, nolukdeg welahi.

¹⁵Ai halug, nebe wararuhuk mu, wene su hit henendama ebetuk kwit neg welamuhup en ulug, wal-hamin.

¹⁶Tuhan Yesus Kristus omamne humon wereg lit, waruhu on fahet wene hweag-hesauk kahe ai re, wene ap homi enendaman wenggeloho nunung yatuk ai hag wal-heheg hweag-hesauk katuhuk fug. At ebe unuk bogdeg on wahasi mu, nenonggwareg ninil en hauhukdeg hweag-hesauk katuhuk.

¹⁷ Nenakni Allah en at ebe leho feheg, dang-deheg, duruk mu ninil hauhuk. At Allah leho on mot-duruk kwit neg wereg on anyo en de, “An namloho nenda hundig on nahayeg hauk kahi ebe ai. Nobam lombuk isi,” ulug,

¹⁸ele boholman belabeg uruk mu, nit Yesus ninim duk Allah anduk anyo unggulmu wereg lit, nenesanggo holduhuk.

¹⁹Airoho holduhuk ai fam, nenendaman de, “It Allah wene hweag-esauk katfag on nabi en ebag wene ai demdoho,” ulug, atam dorangge hag neg boruk katuhuk famen, fobik nenesanggo holduhuk ai famen, mun enamegdoho fureberuhuk ai. Ai halug de, o abirangge mum wereg ma, ap homi en esahe ambogbagdoho foruk mu, selegdoho wereg ai hag, wene ai henendama mun furoho wauk kamek. Airoho wauk kwit wereg ma, fobik o mumdeg anyo sekan duruk kweleg, sohwalanggen wap selehap dik waharuk ai hag, at Kristus henendama selehap henebik waruhu.

²⁰Wene Allah wene ai re, it ap homi enendaman wenggeloho hweag-esauk katfag fug. We enebe re ap homi on famen, Allah Aheime en enenda wenggeloho hweag-esauk kweleg, at Allah en ebag wene ai hweag-esauk katfag. Ai en wene Allah wene lisu baloho febag on wereg ai, Allah Aheime en nenenda wenggel-neselep fug men, nenonggwareg nenemu en senggeroho furebehe ha fug alereg. Wene su alongdeg ma, fureberuk kamek.