Read Ninia Yali 2 PETRUS 2 Bible Online

2 PETRUS 2 - Ninia Yali bible

2 PETRUS 2

¹Atam de, Allah wene hweag-esauk katfag on enebut hag debelug, watfagdeg seiale uruk katfag on Allah omaliki enenggelegkwe inail watfag. Ai hag, fobik ap ebe wene hweag-esauk on enebut hagdoho watlug, seiale uruk kamuhup on henenggelegkwe enam aik wamuhup. Enam aik wamuhupdeg, wene seiale wene ap homi enebe siahap-enepuk wene hwenaroho hweag-hesa kwik wamuhup. Hweag-hesa wamuhupdeg, Nenowe en it ninim nenenda fisela-nenebikoho nenonggo balsi famen, iren de, “At nit nenowe fug. Nenapeleg,” ulug, awea wauk kamuhup ai. Awea wauk mu re, enonggwareg en siag onggo folo-folo enobam fahat-dalug siag amuhup.

²Ai famen de, it enenda nauk mu enenggali eleg angge di siag su siag duruk mu, ap homi humdoho en it enebut oko duruk kamuhup ai fam, it ap homi eke en Yesus ombolim lauk wene ebe wene ai, abug siag uhup.

³It ap Allah wene hweag-esauk on hagdoho enam amuhup ai enobabut de, “Nit neg og-nesowag,” ulug, uruk on ai en, iren onggo og-esowag ulug, wene enonggwareg enendaman wenggeloho seiale hweag-hesauk kamuhup. Airoho famen, it enabut duruk kamuhup ai fam, at Allah en, “It ai siag onggo folug, enebe siahap enebuhuk,” ulug, endam wenggeloho febag ma, siahap enebuhu en wereg.

⁴It boholkwe yonggo noruk on malaikat omano en eke siag debag ma, Allah en embesouk fug angge anggin on fobik enobam feikoho lit de, o mumdegma siagma, enenggik sabu hetdoho[3] welamag ulug, belabe fesebag.

⁵ Ai higitdoho, ap homi endam welatfag on omano wereg lit, it Allah enerim on en enabut siag duruk katfag ma, Allah en embesouk fug angge, ik neg yahamag uruk kwit, enowarukwag ulug, ik fu enobam mondorik watfag ma, enowatuk kwit, hun Nuh ap homi enebut Allah endama boruk on duruk kamag ulug, wene hweag-esauk katfag on inim, enebe sabiren inim neg enahap wendat-enepfag.

⁶ Ai higitdoho, it ap homi fobik Allah enerim atlug, siag duruk kamuhup on enendaman de, “Nit nenobabut airoho duruk kamuhuk halug, Allah en nenobahaku fug. Airoho at nenowaruhu,” ulug, fureberuk kamag ulug, ap homi o Sodom on, Gomora on inim, Allah en siag onggo enobam folug mun felelengdoho indok fam enowatfag ai.

⁷ Airoho enowatuk kwit, hun Lot neg de obabut Allah enda boruk ale higitdoho neg duruk mu, it ap homi etma on enenggali eleg angge siag neg duruk katfag ma re, at enda ouk hauk kwit wereg ma, Allah en ahap wendatfag ai.

⁸It omano duk fug ale siag neg duruk kwit wereg en, at Lot obabut higitdoho on enesahalimu wereg lit, il eseheg, esanggo holeheg, duruk kwit de, likia hupmu enda wat-deheg neg duruk katfag.

⁹Airoho, at Allah ebe enenda hundig boruk on halug, siahap enebul ulug duruk em, Allah en enahap wendat-enebeheg, ne, it siag duruk on halug, anggin on fobik enobam fohu olukdeg lit en, apenen fahat-enesug welaheg, duruk.

¹⁰It ai leho on hag de, it Allah along enendaman seram boruk kwit, enenda nauk halug neg siag dil noruk ai, Allah en siahap enebuhu en wereg. It seiale wene hweag-esauk on omano en enakol eleg angge enambong seroho duruk kwit, boholma on mot-enepuk neg wereg on omano enekol eleg angge enebug siagdoho balduk.

¹¹Enebug siag uruk on ai re, enomamne eleg enalong eleg on hag famen, it malaikat omano en enomamne humdeg enalong wereg lit de, ap etmano wene enobam fesoukwag ulug, Tuhan il hanim enebug siag uruk fug.

¹²Ai famen, it seiale wene hweag-esauk on ai re wam maro endag-atlug, ape eleg angge, wam duruk ale wong saleg duruk mu, seneko watuk ai hag, it ap ai en wene furebouk fug angge wereg lit, enebug siag uruk ai re, enonggwareg enebut siag ai fam wam maro watuk hag Allah en enowaruhu.

¹³Siag duruk ai fam onggo siahap enebuhu ai. It de, enenda nauk ale anyo enenda sebele fouk fug angge nukoho famen siag duruk ale ai neg enahayeg boruk. Sum fano wereg kweleg, singon obam are eheg, orohole siag aheg, duruk hag, hit soni osoho nauk mu, it omano enenda sebe uk fug angge di siag su siag duruk kwit en, henekit kwik waharuk mu, hinim seberoho nauk kahep ai.

¹⁴Ap ai inilmu homi herako hambena enepuk on neg hoporoho wereg lit, enenggali eleg angge, siag neg duruk kwit welamuhup ai. Airoho duruk kwit, ap homi Allah wene ket walug, enenda elegdoho on anyo lal-enebuhup. Enebut de, di angge su angge nit neg og-nesowag, ulug, uruk kamuhup en, endam en ai memelswareg, ai on neg enolukdoho wereg lit, duruk kamuhup. Airoho duruk kamuhup ai, Allah en hururung debesuhureg, siahap enebuhu en wereg.

¹⁵ Kwe higitdoho lauk kwe ai embeselug, kwaniroho hun Bileam, Beor amloho anyo lebag kwe ombolim lauk. At Bileam endaman, “An siag duruk halug, onggo og-numuhup,” ulug, enda boruk katfag ma,

¹⁶Allah en de, “Siag duk fug,” ulug, komo-debag. Keledai emberimmu hweria atlug lauk mu, keledai anyo ele maruk fug alereg famen, at hun Bileam hweag-utuk kwit, “Hat Allah wene hweag-esauk kahen on su re, mun siag dehen,” ulug, ap homi enele fam bet-debag.

¹⁷It ap seiale wene hweag-esauk on ai re, o hebi fam ik eleruk firitog atuk anyo hag, firitog aheg, o hena hol en walug lauk ai hag, hesangge og-eneplug laheg, duruk. It o hup bindegma, etma welamag ulug, Allah en enobale buhundoho fesi mu, wereg.

¹⁸Ap homi eke enori enerekwi siag duruk kweleg, embeselug wilibik wamag ulug, uruk men, enenda nauk mu, fobik siag dukwag ulug, it ap seiale wene hweag-esauk on ai enonggwareg leho fahat-dauk kwit, hesangge seiale enenda kahal-enepuk kamuhup.

¹⁹Ap homi mundoho re di ale su ale omamne atlug, apma-ap debeseruk mu, omamne atuk on ai amingming angge wereg ai en de, it seiale wene hweag-esauk on anyo enonggwareg siahap-enepuk ale ai amingming angge wereg lit en, enele en laloho hweag-hesauk kwit, “Hit nit nenobabut wahup halug de, fobik henemu inamuhup,” ulug, we laloho hweag-hesauk kamuhup ai.

²⁰Ap homi en de Tuhan nenahap wendat-nenepuk on Yesus Kristus enoluk atlug, kwenangma siag duruk ale suma embeselug, apman wilibik watlug, fobik sombandoho ai apma kwik lauk halug, omamneroho seneruhup mu re, maben atlug atam siag welatswa ai re, dot fano hag. Fobik siag aruhu ai re, humdoho siag neg welamuhup.

²¹Ebe wene higitdoho mutlug lauk ai enoluk am fug angge welalep man de, fanoroho hag welalep. Famen de, enoluk atlug en wene Allah en melal-nenepsi on embeselug, kwaniroho lauk ai re, mun siag.

²² It ai ap homi en wene hwenaroho uruk kwit, “Mene en me wire folug, fobik nikangge nauk hag, wam en oruk kume wareg famen, fobik fubu watuk ai,” ulug, uruk anyo hag, it ap ai airoho duruk.