Read Ninia Yali 2 PETRUS 3 Bible Online

2 PETRUS 3 - Ninia Yali bible

2 PETRUS 3

¹Nori nerekwi, nenda hundig on. Surat eke atam henekit mondorik waharihik ai inim, fobik bireneg mondirik wahi on su inim, wene henolukdeg famen, fano wenggeleg neg duruk ale henendama eberuhup en ulug, mondorik waharuk kahi.

²Wene ai, atam Allah en enayonggo febag ma, it ap nabi omano en ebag. Ne, Tuhan nenahap wendat-nenepsi on en wene melal-nenepsi on nit rasul unduhuk nenobahasireg, hit henekit mon-nenebik wahasi mu, hweag-hesauhuk.

³ Atam de, su furebahat-dauk kamek! O ahae fotog atuk li em, it eke enenda ahanhan enendama kahaloho siag duruk kwit, henekit watlug, enele bulip-balap henepuk kwit,

⁴“Waruhu ulug henowe sali wat-hesasi anyo ebe ke waharuk? Nenombasi mundoho warail lebag famen, di angge su angge atam Allah en wal-debag li en ketia hwili eitog eleg atuk fug oma re?” ulug, bilip-henepuk kwit, hweag-hesauk kamuhup.

⁵ Airoho uruk kwit, wene anyo enapenen enapelehap dauk. Atam Allah ele ebag fam aren bohol kwenang inim wal-debagdeg, kwenang ik inim misig kwe wereg ma, ik emberim fil apma fil minggiri febag ai fam, kwenang wal-debag ulug, wene enolukdeg lit en famen, enapeleg boukwag en uruk ai.

⁶ Airoho wal-debelug, fobik en ik naleg-haleg ukwag ulug ele ebag ma, kwenang anyo ik fu yenggelik watfag ai fam, o siaho febag.

⁷Famen de, bohol kwenang ketia wereg ai, ap homi Allah enerim boruk kwit siag duruk omano, Allah en siag onggo enobam folug elehapdoho fesehu salim, indok fam elehapdoho fohu en, Allah apenen ele ai fam foroho wereg.

⁸ Ai famen, nori nerekwi, nenda hundig on. Wene misig su henapeleg am fug! Tuhan endama boruk kwit, nenenggik misig salim nohoruk kahe on ai re, 1.000 tahun hag boruk. Ne, 1.000 tahun ai de, nenenggik misig salim nohoruk kahe ai hag boruk.

⁹It foman, “Tuhan en sali wat-nesasi anyo, owan andomog duruk,” ulug, boruk ai re, andomog duruk fug. It eke nong am no ulug, ap homi siag duruk on embeselug, enobabut aham-dukwag ulug, apenen endama bolug anunuroho wereg ai.

¹⁰ Airoho famen, ap homi wongdoho wereg kweleg, di angge su angge herahaik kuruk hag, Tuhan en duhu ai, wongdoho wereg kweleg duhu. Nukoho ai salim aplohok sipuk delelang duruk kwit, bohol ebe misiham eleg aheg, di angge su angge indip inim indok nenggeg, kwenang ebe inim, di angge su angge kwenangma wereg on inim, mundoho eleg aheg, duhu.[4]

¹¹Di angge su angge mundoho airoho eleg aruhu ai en, hit henobabut keroho duruk kamuhup behep? Allah en duhu ai salim bohol indok fohu mu, ambulbul en felelengdoho nenggeg, boholma di angge su angge indip inim ahanhan nigon fam silip borotog eheg, duhu mu, hit siag duruk eleg angge at obahet eneg wereg lit henebe at fahet folug, at ebe nangnoroho wereg lit, ebe folo-folo wamag ulug, anggilugdoho duruk kamek!

¹³ Airoho duhu famen, bohol keron wal-deheg, kwenang keron wal-deheg, duhu mu etmano kwik lalug, higitdoho neg duruk kamuhuk, ulug, sali wat-nesasi anyo nangnoreg welahe.

¹⁴Nori nerekwi, nenda hundig on. Airoho duhu ulug nangnoreg wereg lit de, wene henobam fouk fug angge, siag am fug angge, Allah hinim fano wereg ma, at ebe hesa waruhu en, at fahet anggilugdoho mun fanoroho duruk kamek!

¹⁵Airoho duruk kwit, Tuhan enda hambukdeg wereg lit, owan waharuk eleg ai re, nenahap wendat-nenebukwag ulug, apenen owan nangno-nenesug lit, wereg ulug henendama beiyug! At nenowe Paulus ebe nenenda on anyo Allah en enda werehap debesi mu, wene airoho, ulug, surat baloho henekit mondorik wahasi ai.

¹⁶Aren surat hundig-hundig balduk kwit, wene ai on fahet neg uruk kwit wereg famen de, aren surat baloho mondorik waharuk on ai re, wene eke furebouk fug alereg on hag wereg ma, it foman wene enapeleg wereg lit, enenda biren-baren uruk on en, wene Allah en isi mu, Paulus en lisu balsi on ai inim, it foman balswa on ai inim, wene ebe higitdoho wereg famen, embeseruk. Embeseruk ai fam enonggwareg en siahap-dauk.

¹⁷Ai halug, nori nerekwi nenda hundig on. Wene ai owan atuk eleg kweleg de, henolukdoho welamuhup ulug, fagdoho hweag-hisihi ai. Henolukdoho wereg lit, henonggwareg henenda wirikdoho wereg nu. It ap homi eke Allah wene sahalduk on omano en wene siag on hweag-hesauk kwit, lal-henebil lauk em, hiren, “Demdoho,” ulug, henenda wirik atuhup on ai kobogdoho embeseil lauk men, henebe siahap-henebuk no, ulug, henepe enggatdoho welamek!

¹⁸Ite, Tuhan nenahap wendat-nenepuk on Yesus Kristus nenelaheg en og-nesauk on ai weheg, ebe henoluk aheg, duruk kwit de, henenda wirik atlug wereg nu! Ketia dia mel, fobik mel, at amu neg mundoho motdeg welamag. Mundoho. Amin.