Read Ninia Yali 1 YOHANES 1 Bible Online

1 YOHANES 1 - Ninia Yali bible

1 YOHANES 1

¹ At Wene ap homi nenelugap nenepuk wene walhilmen welatfag anyo nit nenesanggo holeheg, ninil heheg, ninil fu debeheg, ne, nenenggik senereheg, duruhuk ale anyo surat su fam bal-hesauk kahe.

² Nenelugap nenepuk on ai enam atsi mu, ninil hauhuk. Ai halug, at mundoho-mundoho nenelugap nenepuk on walhilmu Nenakni Allah inim sebereg welatfagdeg enam atsi mu, ninil hauhukdeg, abug fagdoho hweag-hesauk kahe.

³Nit de, Nenakni Allah inim, amloho Yesus Kristus inim, ninim nenenda misig hundig welahe anyo hag, hit nit ninim, nenenda misig hundig welamuhuk en ninil hauhuk inim, nenesanggo holduhuk inim, ai neg henelukdoho hweag-hesauk kahe.

⁴Nit mundoho[1] nenenda nenahayeg mundoho hahuk en surat su bal-hesauk kahe.

⁵Allah amloho en wene hweag-nesauk kwit, “Allah ebe seleg neg deg ma re, o mum on at fam wereg fug,” ulug, hweag-nesasi on nenesanggo holduhukdeg hweag-hesauk kahe ai.

⁶Ai halug, nit o mum fam wereg lit, duruk ale dil noruk kwit en, “Nit Allah ninim nenenda misig hundig welahe,” uruk kahe halug, nit duruk kahe ale inim, uruk kahe ale inim, ai seiale.

⁷At Nenakni Allah neg o seleg fam wereg anyo hagdoho, nit o seleg fam dil noruk kahe halug, ai fam nenori ninim nenenda misig hundig welahe. Ne, Allah Amloho Yesus Kristus amep hililig fam[2] nenesiag mundoho ho-nenepuk.

⁸Niren, “Nenendama siag mundoho wereg fug,” uruk kahe halug, nit nenenda lal-dauk kahe. Ne, demdoho wene nenendama mundoho wereg eleg.

⁹Ai famen de, niren, “Nit siag duruhuk,” ulug, Allah il hanim demdoho fag-duruk halug, Allah en uruk on dahan atuk fug, dipdoho duruk mu re, aren siag duruhuk anyo apelehapdoho embeseheg, ne, di siag su siag duruk kahe on anyo ho-nenebeheg, duruk karuhu.

¹⁰Ai famen, niren, “Nit siag duruhuk fug,” uruk kahe halug, nit uruk kahe fam Allah seiale uruk on apdoho foruk kahe, ne, at awene nenendama wereg fug.