Read Ninia Yali 1 YOHANES 2 Bible Online

1 YOHANES 2 - Ninia Yali bible

1 YOHANES 2

¹Nomaliki nenda hundig on. Hit siag duruk kahep ha no en surat su bal-hesauk kahi famen, ap eke siag duruk halug, at dipdoho neg duruk on Yesus Kristus anyo en, nit nenobahet ninili oko Nenakni Allah hweag-utuk kwit wereg.

²At Yesus Kristus anyo re, nit siag duruk kahe nesalug, Allah enda sako amag ulug, waratsi fam nenesiag elehap-disi. Ne, nit nenemu fug famen, it di ap homi su ap homi o suma wereg on mundoho siag duruk esalug, at waratsi fam enesiag elehap-disi.

³Nit Allah wene melale nenobahasi wene hole folug duruk kahe halug, duruk kahe anyo fam, Allah neneluk atsi anyo nenendaman, demdoho nenelukdeg ma, hahuk.

⁴Ap eke en, Allah wene melale nenobahasi wene higitdoho duruk eleg lit de, “An den Allah ebe noluk,” uruk halug, ap ai seiale uruk on hahup, ne, at endama demdoho wene wereg fug.

⁵Ai famen, ap amu eke en, Allah wene higitdoho duruk halug, at duruk ai fam, aren Allah enda hundig boruk anyo mundoho wereg, demdoho enam atsi. Nit airoho duruk kahe ai fam, Allah ninim hundig welahe ale enam atuk.

⁶Ap eke en, “An Allah nim hundig welahe,” uruk halug, ap ai at Yesus Kristus dil noruk katsi anyo hagdoho dil noruk kamag.

⁷ Nori nerekwi, nenda hundig on. An den wene ket melale henobahasi wene bal-hesauk kahi fug. Ite, endam en wene melale henobahasi wene anyo neg bal-hesauk kahi. Wene endam melale henobahasi wene ai, Allah wene hit mundoho holduhup on anyo.

⁸Aireg famen de, o mum eleg aheg, ne, o seleg demdoho on ketia kwik waheg, duruk mu re, wene melale henobahasi wene bal-hesauk kahi ai re keron. Ne, wene ai demdoho ulug, at Kristus dil noruk katsi fam enam aheg, hit Kristus inim henenda hundig welahep ai fam enam aheg, disi.

⁹At ap eke en, at are erek Allah omalik endaman erim boruk kwit en, “An o seleg fam dil lauk kahi,” uruk halug, endam en angge ketia hwili ap ai o mum fam wereg.

¹⁰Ne, at ap eke[3] en, at are erek Allah omalik enda hundig boruk halug, at o seleg fam wereg lit dil lauk mu, eneyog dungdoho wat-dauk anyo hag siag duhu en wereg fug famen,

¹¹ap eke en, at are erek Allah omalik endaman erim boruk halug, o mum fam dil lauk mu, o mumdeg en at il hup noho fesi mu, at kema lauk ale, apeleg wereg.

¹²Nomaliki nenda hundig on. At Allah en Kristus disi fam hit siag duruk kahep anyo apelehapdoho embesesi, ulug, surat su bal-hesauk kahi.

¹³Naknisi yei! At walhilmen welatfagdeg, ketia wereg on anyo henelukdeg, ulug, surat su bal-hesauk kahi. Nautsi sauwe atuhup on yei! Hiren at Siag onggwareg on anyo mun sebeloho foruhup, ulug, surat su bal-hesauk kahi. Nomaliki yei! At Nenakni Allah henelukdeg, ulug, surat su bal-hisihi.

¹⁴Hit, naknisi, at walhilmen welatfagdeg, ketia wereg on anyo henelukdeg, ulug, surat su bal-hesauk kahi. Hit, nautsi sauwe atuhup on, henomamne welaheg, Allah wene henendama foroho welaheg, duruk kwit welahep ma, hiren at siag onggwareg on anyo mun sebeloho foruhup, ulug, surat su bal-hesauk kahi.

¹⁵Ap homi kwenangma on enobabut duruk ale inim, di angge su angge o kwenangma suma wereg angge inim, henenda hundig bouk fug. Ap eke en ap homi kwenangma on enobabut duruk ale enda hundig boruk halug, aren Nenakni Allah enda hundig bouk fug alereg.

¹⁶Di angge su angge o kwenangma suma wereg angge: nenenda siag on en nauk anyo inim, ninil fu halug nenambono boruk anyo inim, nit nenengge fam nenunuk hum amag ulug leho fahat-dil lauk anyo inim, mundoho indip de Nenakni Allah fug. Ite, indip de kwenangma suma on neg.

¹⁷Ne, ap homi kwenangma on duruk ale inim, di angge su angge kwenangma on nenenda nauk anyo inim eleg atuk famen, at ap eke en Allah enda boruk ale higitdoho duruk halug, at mundoho oluk wereg laruhu.

¹⁸Nomaliki yei! O ahae fotog sali horog aik wahasimu wereg. At Kristus aselei on enam aik waruhu holduhup anyo higitdoho, ketia it ap Kristus aselei on humdoho enam aik wahausareg wereg ma, ketia ahae fotog salim mundoho horog aik wahasi ulug neneluk atsi.

¹⁹It ap homi atam ninim kabog-duruk katuhuk famen, enebe niron deg fug mu, nenobahalug lausa. It ap homi ai niron deg lalep man, ninim wereg lala famen, it ap homi su niron fug deg ma enam amag ulug wilibik lausa.

²⁰Ap Allah obahet eneko unduhuk foruk kwit ahalue unggulmu hililduk anyo hag, Allah en Aheime henobam hililoho henobahasi mu, hit mundoho en demdoho wene heneluk.

²¹Ai halug, demdoho wene henapelegdeg en ulug, surat su bal-hesauk kahi fug. Ite, henelukdeg ma, demdoho wene ai famen seiale wene eke wereg fug, ulug, surat su bal-hesauk kahi.

²²At ap eke en, “Yesus ai re Kristus fug,” uruk halug, seiale uruk on at. Ne, ap ai en, “Allah inim at Amloho inim an nerim,” uruk mu, Kristus aselei on de at.

²³At ap eke en, “Allah Amloho nerim,” uruk halug, at Nenakni Allah inim hundig wereg fug. Ne, at eke en, “An den Amloho demdoho boruk kahi,” ulug, fag-duruk halug, at Nenakni Allah inim hundig wereg.

²⁴Ai halug, hit neg de wene atam en holduhup anyo henendama bug-bagdoho foroho welamek. Wene atam en holduhup anyo henendama foroho welamuhup halug, hit oho Amloho inim, Nenakni Allah inim hundig welamuhup.

²⁵Ne, at Kristus en wene abug hweag-nesasi anyo su, “An heneluk mundoho-mundoho welam on og-hesahuk,” ulug, hweag-nesasi.

²⁶It lal-henebukoho duruk ai en, surat su bal-hisihi famen,

²⁷hit neg de, Kristus en Allah Aheime henobam hililoho henobahasi mu, henobam wereg hesalug, ap eke en wene hweag-hesa fug hag deg. Allah Aheime henobam hililoho henobahasi anyo, aren di wene su wene hweag-hesauk kwit wereg. Ne, aren hweag-hesauk ai, seiale wene fug. Demdoho wene neg hweag-hesauk. Ai halug, hweag-hesauk anyo higitdoho duruk kwit, at Kristus hinim hundig welamek.

²⁸Nomaliki nenda hundig on! At Kristus enam aruhu ai salim, nenenda hambukdeg lit welamuhuk en, at waruhu mu, nenenggali en herag-ahe ha no en, ketia re at inim hundig welamek.

²⁹At Kristus de dipdoho neg duruk on henelukdeg halug, it ap Kristus higitdoho duruk on anyo, Allah en endag-enepsi ulug, henelukdeg lahep halereg.