Read Ninia Yali 1 YOHANES 3 Bible Online

1 YOHANES 3 - Ninia Yali bible

1 YOHANES 3

¹ At Nenakni Allah en de, “It su an nomaliki,” ulug, endag-nenepsi mu, demdoho nit nenebe at omaliki welahe. Airoho welahe ai en, nenebe at enda hundig wereg ai hakiek! Airoho famen de, it ap homi kwenangma on enobabut eneg on oman Allah ebe enapelegdeg ma, nit nenebe oho enapeleg neg.

²Nori nerekwi nenda hundig on. Ketia re nit demdoho Allah omaliki welahe famen, fobik nanggin-nenebuhu anyo owan enam atuk eleg ma, nenapeleg welahe. Ai famen de, at Kristus enam aik waruhu halug, at keroho hag wereg ma, ebe ninil furoho hahukdeg, nit at higitdeg welamuhuk ai neneluk.

³Ne, nit di ap homi su ap homi nenenda at fam ebereg lit welahe halug, at Kristus eneko wereg hag nit airoho eneko fahat-dauk kamuhuk.

⁴At ap siag duruk anyo, eke Allah wene melale fesebag wene sahalduk on at. Ap sa siag duruk halug de, at Allah wene sahaloho foruk.

⁵ At Kristus en, ap homi[4] di siag su siag duruk anyo, oko elehap-dikoho enam atsi hit heneluk. Ne, at ebe fam siag on mundoho wereg fug.

⁶It ap homi Kristus inim enenda hundig wereg halug, it ap ai siag deheg, duruk fug famen, it ap ai siag deheg neg, duruk halug, iren Kristus inil hausa fug. Ne, it de Kristus enapelegdeg.

⁷Nomaliki! Ap homi lal-henebuk no, ulug, henepe hebeloho welamek! Ap sa en, at Kristus dipdoho neg duruk anyo hag, dipdoho neg duruk halug, ap ai mun fano wereg.

⁸At Iblis anyo o walhilmen siag neg duruk katsi mu, at ap siag neg deheg, duruk ai, at Iblis omalik wereg. Eke at Iblis en duruk on su mun elehapdoho foukwag ulug, Allah Amloho enam aik wahasi.

⁹Ap homi Allah en endag-enepuk on halug, enebe hundomog at obabut oho folug, duruk ai en, siag deheg, duruk kam fug alereg. Enebe Allah omaliki wereg lit, siag deheg, duk fug angge wereg ai.

¹⁰Allah omaliki mel, Iblis omaliki mel nenenda wenggeloho enobabut eneg at atuk de su. Ap sa en obabut higitdoho duk eleg angge ori erekwi enda hundig enepuk eleg halug, ap ai ebe re Allah omalik fug.

¹¹ O atam en, wene hit holduhup anyo su. Nenenda-henenda hundig boruk kamek.

¹² At ap unuk Kain en at aut debebag anyo hagdoho duk fug. At Kain Iblis omalik deg ma, at aut binggi ware febag. Nunggwelug ware febag behep? Eleg, ite, at Kain en siag duruk mu, at aut fano duruk katfag halug, ware febag.

¹³Ai halug, nori nerekwi. It di ap homi su ap homi o kwenangma on hit enerim henepuk halug de, “Nakol e!” ulug, henenda firuk fug.

¹⁴ Nit nenori nenenda hundig boruk kahe ai fam, waratlug lauk men embeselug, neneluk nenepukmu kwik waharuhukdeg welahe, ai neneluk. Ap misig eke en enda hundig boruk eleg halug, ap ai waratuk on apma wereg.

¹⁵Ap misig at are Allah omalik anyo erim boruk halug, at ap ai binggi enowatuk on hag wereg. Ne, ap misig en binggi enowatuk halug, at endama oluk mundoho-mundoho welam on wereg fug henelukdeg.

¹⁶Enenda demdoho hundig boruk anyo su fam neneluk. At Yesus en enda hundig en nit nenobahet waratsi mu, niren higitdoho nenori nenerekwi Allah omaliki enobahet warahe ha ale ai fano.

¹⁷Ap eke en di angge su angge enggik wereg lit, at are erek Allah omalik eke di angge su angge elahegdoho wereg ma, il hauk kwit, enda kibu dauk halug, aren, “An Allah nenda hundig boruk kahi,” ulug, nangginoho uk alereg behep? Eleg.

¹⁸Halug de, nomaliki yei! Niren ap homi eke nenenda hundig enebuk eleg angge wereg lit en, nenele fam neg, “Nenenda hundig enepuk kamul o!” ulug, uruk kamul fug. Ite, enebe nenenda hundig enepuk kwit, nenenggik famen demdoho let-eseheg, duruk kamul.

¹⁹Nit airoho duruk wereg lit, nenendaman de, “Nit nenebe Allah demdoho on omaliki welahe,” ulug, neneluk amuhuk. Airoho nenoluk atuk kwit, “Nit siag dehe,” ulug, nenendama anggin welahe halug, nit nenebe maben famen de, at Allah neg de ebe along wereg lit, di wene su wene olukdeg ma, at il hanim nenambong seroho welamuhuk.

²¹Ai halug, nori nerekwi nenda hundig on. Nit nenendaman de, “An siag eke dihi,” ulug, nenenda meneni eberuk fug angge nenenda seroho welahe halug de, at akit nenakol eleg angge wereg lit,

²²aren wene melal-nenepsi on higitdoho deheg, at il hanim endama fanoroho neg deheg, duruk kahe ai en, nit di angge su angge heng-duruk mu, aren og-nesauk.

²³ Ne, at Allah en wene melale nenobaharuk wene ebe re, nenenda demdoho boruk kwit, nenenda at Amloho Yesus Kristus fam dip-debeheg, nenenda-henenda hundig beheg, dukwag, ulug, at Kristus en wene higitdoho melale nenobahasi.

²⁴Nit at Allah wene melale nenobahasi wene higitdoho duruk kahe halug, Allah Aheime og-nesasi mu, nenendama wereg ai fam, nit at Allah inim hundig, ne, at nit ninim hundig welahe ulug, fureberuk kahe.