Read Ninia Yali 1 YOHANES 4 Bible Online

1 YOHANES 4 - Ninia Yali bible

1 YOHANES 4

¹Nori nerekwi nenda hundig on! Ap homi enebe humdoho en, “Niren Allah wene hweag-esauk kahe,” ulug, seiale uruk on enebe mundoho enam atswareg, di o su o noruk ai. Noruk ai on eke henekit watlug, wene hweag-hesauk mu, hiren, “Allah Aheime endama wereg lit, hweag-nesauk,” ulug, henenda enobam dip-debesouk fug. Ite, “Demdoho Allah Aheime endama wereg lit, uruk a? Amu on endama wereg lit, hweag-nesauk a?” ulug, enebut dag bale folug, enebe furebeseruk nu.

²Hiren de, “At ai, Allah Aheime endama wereg a, amu on a?” ulug, enobabut dag balduk kamuhup ai diroho. It eke watlug de, “At Yesus Kristus ai, Allah en mondorik wahasi mu, demdoho ap at endag-aik wahasi,” ulug, fagdoho uruk halug de, hiren, “It ai, Allah Aheime enendama wereg lit, uruk,” ulug, furebeseruk kamuhup.

³Airoho famen de, it eke en Yesus fahet wene airoho fagdoho uruk eleg on en uruk halug de, hiren de, “It ai, enendama re Allah Aheime fug. Ite, amu on wereg,” ulug, furebeseruk kamuhup. It ai fahet, wene Allah en atam hweag-nesauk kwit, “At eke Kristus inim selei on waruhu ai,” ulug, hweag-nesasi on henesanggo holduhup anyo, ketia kwenangma suma enebe mundoho enam aik wahausareg wereg ai.

⁴Ai famen de, nomaliki, hit Allah omaliki on welahep. Ne, at Aheime henendama wereg anyo along humon deg kweleg, at ap homi kwenangma on enendama wereg on anyo maben hag deg ma, hiren it ap seiale wene hweag-esa waharuk on ai mundoho sebeloho feseruhupdeg welahep.

⁵It ap ai o kwenangma on deg ma, wene kwenangma on uruk mu re, it ap kwenangma on en enele holduk famen,

⁶nit neg de Allah omaliki on welahe. Ap eke Allah oluk on halug, nit nenele uruk on holduk. Ne, ap eke en Allah omalik eleg on halug, nit nenele uruk on holduk fug. Airoho duruk fam, niren de, “Allah demdoho on Aheime it ai enendama wereg. Ne, it eke ai re, heime seiale wene uruk on enendama wereg,” ulug, furebeseruk kahe.

⁷Nori nerekwi, nenda hundig on yei! Ap homi enenda hundig boruk ale indip de Allah en neg nenepuk mu, nit nenori ninim nenenda henenda hundig boruk kamukohon. Ap misig eke at ori enda hundig boruk halug, Allah omalik ondoho on de at. Ne, ap ai en Allah olukdeg.

⁸At Allah enenda hundig boruk ale indip deg ma, ap eke en ori enda hundig boruk eleg halug, ap ai en Nenakni Allah apelegdeg.

⁹Famen de, Allah en, “Hit henebe nenda hundig henepuk kahi,” ulug, fagdoho ename feikoho at Amloho ilahambi ondoho on fene en nit nenoluk mundoho nenebukwag ulug, kwenangma mondorik wahasi.

¹⁰Enenda hundig boruk ale indip de su. Niren dam Allah nenenda hundig boruhuk fug famen, Allah en enda hundig nenepsireg, nit siag duruk kahe on elehapdoho foruk kwit, enda sako amag ulug, at Amloho mondorik wahasi.

¹¹Nori nerekwi, nenda hundig on yei! At Allah en enda airoho hundig nenepsi mu, nit de higitdoho nenori nenenda hundig boruk kamuhuk ai fano.

¹² Ap misig en Allah ebe il hasi fug famen, niren nenori nenenda hundig enepuk halug, Allah ninim hundig wereg lit, at Allah en enda hundig boruk anyo nit fene en mundoho enam atsi.

¹³Allah en Aheime og-nesasi anyo fam, at nit ninim hundig, ne, nit at ninim hundig welahe nenelukdeg.

¹⁴Ne, at Nenakni Allah en di ap homi su ap homi o suma wereg on enahap wendat-enebukwag ulug, at Amloho mondorik wahasi mu, ninil hauhukdeg fagdoho hweag-esauk kahe.

¹⁵Ap eke en, “Yesus ai re, demdoho Allah Amloho,” ulug, fag-duruk halug, Allah ap ai inim hundig, ne, ap ai Allah inim hundig wereg.

¹⁶Ai halug, at Allah en enda hundig nenepsi anyo neneluk atuhukdeg, demdoho boruk kahe. Ap homi enenda hundig boruk ale indip de Allah. Enda hundig duruk ale at eke endama wereg halug, ap ai Allah inim hundig, ne, Allah ap ai inim hundig wereg.

¹⁷At Allah enda hundig nenepuk ale nit nenobam enam atsi mu, at fobik ayo wiroho en-nenebuhu salim, nenambong seroho welamuhuk en, nit kwenangma suma wereg lit, Kristus wereg ale higitdoho welahe.

¹⁸Allah enda hundig nenepuk anyo fam nenekol nenepuk ale anyo elehapdoho foruk mu, Allah enda hundig nenepuk halug, nenakol bouk fug alereg. Ai halug, it ap homi en, “Fobik siag onggo nenobam fohu,” ulug, enakol boruk ai fam, Allah enda hundig boruk ale enendama wereg fug enegdeg ma hauk kahe.

¹⁹At Allah en atam enda hundig nenepsi mu, niren oho nenenda hundig boruk kahe.

²⁰Ap eke en at are erek Allah omalik erim boruk kwit en, “An den Allah nenda hundig boruk kahi,” uruk halug, seiale uruk mu hahup. Ap ai, at are erek il hauk on anyo enda hundig boruk eleg lit en, at Allah il hauk eleg on anyo enda hundig bouk fug alereg.

²¹Aireg ma, at Kristus en wene melale nenobahasi anyo ebe su. Ap eke en Allah enda hundig boruk halug, are erek oho enda hundig enepuk kamag.