Read Ninia Yali 1 YOHANES 5 Bible Online

1 YOHANES 5 - Ninia Yali bible

1 YOHANES 5

¹Ap misig eke en, “Yesus at de Kristus,” ulug, demdoho boruk halug, Allah en ondoho on de at. Ne, ap misig en ap eke akni anyo enda hundig boruk halug, omalik oho enda hundig boruk.

²Airoho dukwag ulug, fureberuk kwit, Allah ebe nenenda hundig beheg, wene aren melal-nenepsi wene ai, hole folug, higitdoho deheg, duruk kwit, at omaliki endag-enepsi on ai nenenda hundig boruk kamuhuk.

³ Nit Allah wene melale nenobahasi wene hole folug, higitdoho duruk kahe halug, ai re Nenakni Allah nenenda hundig boruk kahe. Ne, aren wene melale nenobaharuk wene ai nit fam anggindeg fug.

⁴Nit Allah en ondoho on anyo en, o kwenangma di siag su siag anyo sebeloho feheg, duruk kahe. Niren, “Yesus at Kristus,” ulug, demdoho boruk kahe ai fam, o kwenangma di siag su siag anyo sebeloho foruk kahe.

⁵San o suma di siag su siag sebeloho foruk? Eleg, ite, at eke en, “Yesus de at Allah Amloho,” ulug, demdoho boruk anyo en o suma di siag su siag sebeloho foruk.

⁶At Yesus Kristus kwenangma wambik wahasireg wereg ma, ikma neg belapswa fug. Ikma belabeheg, amep wiliboho waraheg, duswa. Airoho duswa, ulug, at Allah Aheime wene demdoho neg hweag-nesauk on anyo en fagdoho hweag-nesauk kwit wereg.

⁷Yesus ai, Kristus at, ulug, ap enebe henahan[5] en enele misig on fagdoho uk hag de, Allah Aheime en fag-deheg, Yesus ebe ikma belapswa ai fam fag-deheg, amep wiliboho watswa ai fam fag-deheg, duruk.

⁹It ap homi en inil halug fagdoho hweag-nesauk anyo demdoho boruk kahe ai maben hag famen, at Allah ebe en Amloho abug fagdoho hweag-nesasi on ai neg de, along humon wereg.

¹⁰Aireg ma, ap eke en Allah Amloho demdoho boruk halug, at endaman, “Allah en abug fagdoho hweag-nitsi,” ulug, boruk kwit wereg. Ne, ap eke en, Allah en Amloho abug fagdoho hweag-itsi wene demdoho boruk eleg lit en, Allah demdoho besi fug mu, Allah seiale uruk on apdoho fesi.

¹¹ At Allah en Amloho fahet abug hweag-nesauk kwit, “Enebe enoluk mundoho mundoho wereg on ai indip de, an namloho deg ma, an den Yesus ebe og-hesauk kwit, nabelal-habelal ebe on og-hesauihik ai,” ulug, hweag-nesasi.

¹²Ap eke Allah Amloho inim hundig wereg halug, oluk nabelal-habelal ebe on ai endama foroho wereg. Ne, ap eke Allah Amloho inim hundig eleg halug, oluk nabelal-habelal ebe on at endama wereg fug.

¹³Hit heneluk nabelal-habelal ebe on henendama foroho welahep demdoho heneluk amuhup en, hit Allah Amloho fam dip-deberuk kahep on anyo, surat su bal-hisihi.

¹⁴At Allah en enda boruk ale higitdoho neg og-nesowag ulug heng-duruk halug, aren nenele hole foruk nenolukdeg ma, Allah il hanim nenenda hambukdeg lit heng-duruk kahe.

¹⁵Nit at fam di ale su ale heng-duruk mu, nenele hole feheg neg, duruk neneluk deg ma, heng-duruhuk anyo mundoho og-nesauk mu wereg.

¹⁶It ap homi eke siag duswa ma, enabut fam enebe mundoho mundoho waramuhup en wereg ai fahet, hiren Allah ayonggo fohup ulug, hweag-hesauk kahi fug. Ite, enebut fano duk ale wereg kweleg, embeselug hesangge siag duruk ai mundoho unuk siag deg famen, it eke en siag duruk mu, enebut fam enebe mundoho mundoho waramuhup fug on wereg ma, hit Allah omaliki on en henere henerek eke siag duruk onggo ebe mundoho wararuhu fug on duruk halug, at fahet Allah ayonggo fohup mu, aren nabelal-habelal ebe on og-uruhu en wereg.

¹⁸Allah en ondoho on eke en siag deheg, eke nim siag deheg, duruk eleg neneluk famen, Allah Amloho anyo en at ap ai furoho foroho wereg ma, at Siag onggwareg on en ap ai siahap debouk fug alereg.

¹⁹Di ap su ap o kwenangma siag duruk on anyo mundoho at Siag onggwareg on apma wereg famen de, nit neg Allah omaliki welahe ma, fahat-nenesug wereg neneluk.

²⁰At Allah Amloho nenekit wahasireg, Allah demdoho on nenoluk amag ulug, nenendama enggarapdoho hweag-nesasi. Airoho hweag-nesasi mu, nit Allah demdoho on Amloho Yesus Kristus inim ninim hundig welahe. Ne, at Yesus Kristus de, ebe Allah demdoho on wereg lit, nabelal-habelal indip at neg wereg.

²¹Nomaliki yei! Henendama amu seiale on at Allah obalma unduhuk fehep ha no, henenda kahaleg lamek.