Read Ninia Yali HAKIM-HAKIM 1 Bible Online

HAKIM-HAKIM 1 - Ninia Yali bible

HAKIM-HAKIM 1

¹Yosua mundoho waratfag ma ap homi Israel on en TUHAN hein og-hauk kwit, “TUHAN unggul unuk ke on dam lalug, dog ap Kanaan on fam sinalik lauk karuhu?” ebag.

²Ulug hein og-hebag ma, TUHAN en onggo diroho hweag-esebag, “Unggul unuk Yehuda on. It aire o kwenang deloho wag kukwag ulug An den it omamne og-esauihik,” ebag.

³Airoho hweag-esebag ma, it enunggul unuk Yehuda on en unggul unuk Simeon on fam diroho ebag, “Let nenebik waharuk kamek, niren o Kanaan ai dog sinalik lalug, sebele feseruk kwit kwenang wilayah etma nit deloho hwelowag ulug TUHAN en nit nenobahet ebag ale muko. Fobik niren oho o wilayah TUHAN en hit henobahet ulug ebag on etma deloho hwelag lauk li em hit let hesauk kamuhuk en,” ulug ebag ma unggul unuk Simeon on mel

⁴Yehuda on nim seberoho lebagdeg dog sinalik lebag. Lebag ma re TUHAN en ap Kanaan on mel Feris on mel fam enalongap debesebag. Ne, ap eneselei on en tentara re enebe 10.000 en o Bezek etman enowatfag ma waratfag.

⁵Iren de hun Adoni-Bezek o ai fam raja welatfag on anyo hweahabagdeg de iren watul ulug huk debag.

⁶Huk debag ma at ebe heiye lebag, famen de iren mutlug senerik lebagdeg de at enggik foab mel eyog foab mel kong-debag.

⁷Kong debag ma at Adoni-Bezek en de diroho ebag, “Atam de ap raja enebe 70 en angge an den enenggik foab mel eneyog foab mel kong enepihikdeg, it enebe an nauk kahimu nahan doaleg anyo fam en nambilik apuhuno wamburuk on etmano nauk kamag ulug embeserihik. Ketiare an den it debeserihik ale anyoroho Allah en an airoho nobahakeik,” ebag. Adoni-Bezek ebere fobik en o Yerusalem walug lebag ma, etman at ebe waratfag.

⁸Ap Yehuda on de o Yerusalem huk enebik kuruk kwit kota ai harep fisatfagdeg ap homi o ai on de mundoho enowatfag.

⁹Ai debelug it ap Kanaan on dom-dom fene etma mel, duk-duk alo beng-beng kwe wereg on mel; ai en kwenang iringgig kwe il apma selatan fil wereg on mel,

¹⁰ne o kota Hebron aire unuk atam de Kiryat-Arba uruk katfag ma anyo mel enowarik lebag. Etma ap Yehuda on en de ap Sesai on mel, Ahiman mel, Talmai mel, enalong elehapdoho fesebag.

¹¹O Hebron en de ap Yehuda on omano lauk kwit de, o kota Debir, eta li em de o ai unuk Kiryat-Sefer uruk katfag on ai huhul kwik lebag.

¹²Ap misig eke unggul unuk Yehuda on ai unuk de Kaleb en uruk kwit de, “Ap sa en o Kiryat-Sefer ai delik kuruk halug de, ap aire an nahaloho hwele Akhsa hwelahu?” ebag.

¹³Ebag ma, Kaleb aut Kenas amloho Otniel en kota ai delfag ma, Kaleb en ahaloho Akhsa anyo Otniel ohwe hwelowag ulug og-etfag.

¹⁴Nukoho it lombo enepuk salim de Otniel en ohwe Akhsa ele abiroho[1] re akni fam kwenang huli misig eke heng dukwag ulug hweag-etfag. Hweag-etfag ma re hwele Akhsa angge keledai fam en wambik watfag ma, at Kaleb en de nunggangge henda ulug hein og-hebag.

¹⁵Hein og-hebag ma at Akhsa en ele onggo re, “Kwenang nayon haren og-nitihin mu etano re kwenang iringgig kwe neg deg ma re, an de ik eleruk nunggwe en hagdoho eke nenda,” ulug ebag. Ai ebag ma re Kaleb en de ik eleruk wilipuk on de ik ambut fil en oho eleruk fil en og-etfag.

¹⁶Musa eyamal akni ambiangma on de ap Keni enap, it Yehuda on enombolim o Yerikho, o Kurma indip obam anyo en wiliplug lebagdeg de o Yehuda on fam en o Arad en de il apma selatan fil kwenang alo beng-bengma etma lebag. Etma re ap enunggul unuk Amalek[2] on enesahalimu welatfag.

¹⁷Ai en de it enunggul unuk Simeon on nim Yehuda on nim seberoho lebagdeg ap Kanaan enap o kota Zefat wereg on etma hukdoho enowarik lebag. Iren de kota anyo hururung debebagdeg mundoho luluhun debelug, o anyo unuk de Horma[3] soalfag.

¹⁸TUHAN en ap Yehuda on let enepuk kweleg atlug de iren o dom kwe wereg on omano sebeloho feseil lebag. Famen, iren muko wilibi fesebag fug obam[4] de o Gaza, Askelon, Ekron mel ite o walinggoho etma mel, de enunggul unuk ik aeg kwe wereg on etma re enangge kereta dog yapuk on de bosiemanggen on fahat dalug latfag ma re; ai fam ap Yehuda on en it muko wilip enebuk fug ale atfag.

²⁰ Atam Musa en melal-enepfag ale roho re, o Hebron de Kaleb og-etfag, aire atam ap unggul unuk Enak on en unggul unuk agdoho henahan welatfag on de at Kaleb en kota ai fam en muko wilibi fesebag ma atlug og-etfag.

²¹ Unggul unuk Benyamin on en ap unggul unuk Yebus on o kota Yerusalem en muko wilip enebuk fug ale atfag. Ai fam de ap Yebus on de ap Benyamin on nim seberoho wereg.

²²Hun Yusuf ambiangma on unggul unuk Efraim on mel Manasye on mel etano en de o kota Betel, eta li em de unuk Lus anyo huk dik lebag ma TUHAN en de it let-enepfag. Iren ap inil hwalukwag ulug o kota ai fam mon-enepuk li em de,

²⁴ap misig eke o kota ai fam en waharukmu it inim ambi atfag. Ambi atfagdeg iren ap anyo fam uruk kwit de, “Niren o kota su fam kwik lowag ulug haren nit let-nenepmihin halug de, niren hat hebe fanoroho hwale hobahaul,” ulug hweag-etfag.

²⁵Hweag-etfag ma ap anyo en de kwe o kota ai fam kwik lauk on hweag-esebag. Ma re ap Efraim on mel Manasye on mel de o kota anyo fam kwik lebagdeg de ap homi etma wereg on omano abirangge enowatfag, we ap anyo nim at ahain elekwe on nim neg de enowatfag fug.

²⁶At anyo fobik en de o okore ap Het on enobam etma lebagdeg, etman de o kota misig eke witfagdeg, kota anyo unuk Lus soalfag. Kota aire unuk airoho neg welatfag.

²⁷ Unggul unuk Manasye on en de ap homi o kota Bet-Sean on mel, Taanakh on mel, Dor, Yibleam, Megido on mel, ne o bumbuk-bumbuk horog kwe etma on mel muko wilibi fesebag fug. Ai fam de ap Kanaan on de etma wereg latfag.

²⁸It Israel on enomamne hum atfagdeg de ap Kanaan on en de it enobahet yabuk diek ulug enomamne fam hweag-esauk katfag, famen de iren ohore ap Kanaan on o etman dik-demdoho muko wilip enepfag fug.

²⁹ O kota Gezer fam en de it unggul unuk Efraim on en de ap Kanaan on ap homi o ai fam welatfag on muko wilibi fesebag fug. Ai fam de ap homi Kanaan on de it nim seberoho o etma welatfag.

³⁰It unggul unuk Zebulon on en de ap kota Kitron mel, Nahalol mel muko wilibi fesebag fug. Ai fam de ap Kanaan on de it nim seberoho etma welatfag, famen de ap homi Kanaan on etma re it enobahet dukwag ulug enomamneroho hweag-esauk katfag.

³¹It unggul unuk Asyer on en de o kota Ako, Sidon, Ahlab, Akhzib, Helba, Afek, Rehob nim oho re muko wilibi fesebag fug.

³²Ai fam de ap Kanaan enap o etma enonggwareg enap de ap Asyer on nim seberoho etma welatfag.

³³It unggul unuk Naftali on en de ap homi o kota Bet-Semes mel, Bet-Anat mel, muko wilibi fesebag fug. Ai fam de ap Kanaan enap o etma enonggwareg enap de ap Naftali on nim seberoho etma welatfag. Famen de it aire ap homi Naftali on fahet yabuk dukwag ulug enomamneroho hweag-esauk katfag.

³⁴Ap enunggul unuk Amori on de o Ayalon mel, Saalbim mel, Dom Heres fam mel, etma yugdoho welatfag, aire it unggul unuk Dan on de it ai en kwenang donggoma etma wambik wam no ulug o dom fil etma mon esaukmu welatfag ai fam. Famen de unggul unuk Amori on aire it Efraim on mel Manasye on mel en sebel esauk kwit de yabuk enomamne fam it enunggul unuk biren ai fahet wirukwag ulug hweag-esauk katfag.

³⁶Ap Amori on ai enobam huli-huli o Sela il emberim utara fil de o Akrabim laharukmu etma fam deg.