Read Ninia Yali HAKIM-HAKIM 10 Bible Online

HAKIM-HAKIM 10 - Ninia Yali bible

HAKIM-HAKIM 10

¹Abimelekh mundoho waratfag ma, Tola hun Pua amloho anyo it Israel on fiselaroho fesoukwag ulug melal-enepuk katfag. At ebe re hun Dodo omba unggul unuk Isakhar on o Samir it Efraim enandom fam etma welatfag.

²Aren de ap homi Israel on 23 tahun huli melal-enepuk katfagdeg at ebe waratfag ma, o Samir salfag.

³At Tola mundoho waratfag ma re, at Yair en ap homi Israel on melal-enepuk kwit weregman neg 22 tahun debag. At Yair ebere o Gilead on.

⁴At omaliki ap on de enebe 30 en, ne it enowam keledai emberim fam lahalug lauk on de 30 en welatfag, enobam sili re o Gilead fam etma 30 en welatfag. O sili etma re at Yair obam sili ulug uruk katfag.

⁵At Yair oho waratfag ma o Kamon salfag.

⁶Ap homi Israel on en de TUHAN ele hole fouk fug angge ne At apne wa fug angge duruk kwit de, iren TUHAN il hanim siag duruk katfag. Iren de kembu Dewa Baal mel, Asytoret mel, dewa ap enunggul unuk Siria mel, Sidon mel, Amon mel, Moab mel, Filistin on mel en omano fam apne wauk katfag.

⁷Ai fam de TUHAN en ap homi Israel on fam olok fesebagdeg, ap enunggul unuk Amon on mel Filistin on mel enalong apma welamag ulug debesebag.

⁸Airoho debesebag ma re ap homi Israel on o Gilead ap homi Amori on enobam Ik Yordan foma mo lahabik waharuk fil wereg on etmano ap enunggul unuk biren etan sebel neg esauk katfag. Iren de ap homi Israel on fam mun hape aleroho neg debeseruk katfag.

⁹Airoho debeseruk kwit de it Amon enap en de it enunggul unuk Yehuda on mel, Benyamin on mel, Efraim on mel, enowarukoho re Ik Yordan dahaloho lalug enowarik laukmu re ap homi Israel on mun anggolo ngogdoho hauk katfag.

¹⁰Airoho hauk kwit de, iren TUHAN fam enele hwiruruk kwit, diroho ebag, “Nenakni Allah, niren kembu Dewa Baal fam apne wauk kwit, Hat hele hole fouk angge deheg duruhuk fam, niren Hat hil hanim siag duruhuk,” ulug hweag-etfag.

¹¹Ai ebag ma TUHAN en onggo hweag-esauk kwit de, “O endam de it enunggul unuk Mesir on mel, Amori, Amon, Filistin, Sidon, Amalek on mel, unggul unuk Maon on mel, en anggin-fanggin henobam foruk kwit sebel henusug latswa. Airoho deg ma etano li em hiren An den let-henebukwag ulug hweag-nutuhup anyo i. Wenggel hakiek, it etma enalong apman An den henahap wendat-henepihik fug no a? Wendat-henepihik neg.

¹³Airoho henepihik famen de, hiren de An henambol yig-nutlug, hiren kembu dewa omano apne wag lauk kahepma re ketia An den hit fiselaroho henobaharuk alere mun nerim.

¹⁴Hiroho hiren kembu dewa hiren momal-dauk kahep on etma akit lakiek. Lalug de hiren it hwi-enepluhupmu re, hit anggin-fanggindoho wereg li etma iren let-henebukwag,” ulug hweag-esebag.

¹⁵Famen de ap homi Israel on en TUHAN fam uruk kwit de, “TUHAN, nit mundoho siag duruhukmu re, Haren henda hahayeg boruk kahen ale etma dimihin fano neg, famen de yoho su salim nit let-nenebin,” ulug ebag.

¹⁶Ai ebagdeg de iren enanggembu ahut ilitdeg omano hwik-esebagdeg de, TUHAN apne webag ma re, it anggin-fanggindoho wereg lit duruk ale anyo Allah en oho endama fu ale durukmu esebag.

¹⁷Eta li em de ap Amon enap tentara re weim yabik laul ulug fik-fouk duruk katfag. Airoho dulug de it enebe o Gilead enobam sabo salik lebag. Ne, it ap homi Israel on ohore kabog-debagdeg de o Gilead enobam sabo salik watfag.

¹⁸Watfagdeg de etman de it Israel enap holduk on mel, enunggul unuk domog melal-enepuk on mel, omano, ap ambong seroho sehen harulug ap unggul unuk Amon enap au mel weim yabik lamisi on eke wereg a eleg a? Ne, ap aire ap homi Gilead on abirangge melal-enepuk on aruhu, ulug hein og-og atuk katfag.