Read Ninia Yali HAKIM-HAKIM 11 Bible Online

HAKIM-HAKIM 11 - Ninia Yali bible

HAKIM-HAKIM 11

¹Hun Yefta aire ap sehen seneg ahun ambong si seroho deg ahun. At ebere o Gilead etma welatfag. Akni re unuk Gilead, famen isinga re uang heraruruk kwit hambena duruk hwe.

²Akni aire omaliki foma amu on ohwesi yug on en ondoho on oho welatfag. Omalik omano enebe log atfagdeg de at Yefta ebe enobam en muko wilibi fesebag. Iren uruk kwit de, “Hat de hebe hwe amu on en deg lahenma re nit nenakni abinggi angge re hat eke hwelahun fug,” ulug hweag-etfag.

³Ai fam de at Yefta anyo ori embeselug de wilibik lebagdeg o Tob etma welatfag. Etma wereg lit de ap enolok on esan eke nim seberebagdeg de iren ap enengge delik lebag.

⁴Il eke welatlug de ap homi Israel on fam Amon enap en dog sinalik lebag.

⁵Airoho sinalik lauk li etare ap Israel on kaindeg omano en at Yefta o Tob embeselug wamag ulug hondohweik lebag.

⁶Iren uruk kwit, “Ap homi Amon au nim weim yapul en haren nit melal-nenebin,” ulug hweag-etfag.

⁷Famen at Yefta en uruk kwit, “Hiren an henalitno nusug lahep fug no? Hiren an nakni obam en siloho wilibi nobaharuhup deg en, ketia hit anggin-fanggin hauk kwit nunggwelug an nakit waharuk kahep?” ulug hweag-esebag.

⁸Ai ebag ma iren uruk kwit, “Nit wahe aire, ketia eiya fam haren ap homi o Gilead wereg on abirangge ai lit-eneplug ap enunggul unuk Amon on nim weim yapluhup nenenda boruk kwit wahe,” ulug hweag-etfag.

⁹Ai ebag ma at Yefta en uruk kwit, “Hiren an hondog nabik wahepma an sombandoho o Gilead lalug ap homi Amon on nim weim yapuk men, TUHAN en nit ninibil nenalongap nenobaharuk halug de, hit henobahet an nalong wereg on aruhuk,” ulug hweag-esebag.

¹⁰Airoho ebag ma re iren onggo uruk kwit, “TUHAN il wereg lit esanggo holeg kweleg anggere, aire niren fano behe,” ulug hweag-etfag.

¹¹Ai ebag ma re at Yefta anyo ap Gilead enap melal-enepuk on etmano nim lebag. Lebagdeg at ebe ap homi Gilead on en de along on wereg lit melal-enepuk kamag ulug unduhuk febag. Unduhuk febag ma re o Mizpa etman TUHAN il hanim at Yefta en de ap homi Gilead on fam de diroho suroho nobaharuk kamuhup ulug wene enobam fesebag.

¹²Airoho debagdeg de at Yefta en ap yonggo raja Amon on fam diroho hweag-irik lowag ulug mon-enepfag, “Niren siag nangginoho duruhukmu hiren nit nenanggwenang su fam weim yabik waharuk kahep?” ulug mondotfag.

¹³Mondotfag ma raja ap homi enunggul unuk Amon on fahet anyo en ap wene yonggo walug lebag on omano fam onggo uruk kwit de, “Ap homi Israel on o Mesir en waharuk kwit de, iren nit nenanggwenang Ik Arnon fam en Ik Yabok fam en Ik Yordan fam deg angge etma hwelausa. Ma re, ketia kwenang ai henobam fanoroho nenonggwareg og-nesakiek,” ulug hweag-esebag.

¹⁴Ai ebag ma at Yefta en ap yonggo angge eke raja Amon on fam wene onggo diroho hweag-irik lowag ulug mon-enepuk kwit de,

¹⁵diroho ebag, “Ap homi Israel on en de kwenang ap homi Moab on en oho Amon on en oho deloho eke hwelausa fug.

¹⁶It Israel on o Mesir embeselug wilibik wahausareg de o bini lei kwe en de Teluk Akaba fil lausareg de etman de o Kades fam aik wahausa.

¹⁷ Eta aik wahausareg de iren ap raja Edom on fam wene mondorik waharuk kwit de, at obam anggwenang kwe ai laul en fano hweag-nesowag ulug heng uswa. Ai en wene misig on aire iren ap raja Moab on fam oho heng uswa, famen de aren anggwenang kwe fano lakiek ulug hweag-esasi fug. Ai fam de ap homi Israel on o Kades welatswa.

¹⁸ Welatswareg de it anyo o iliangge lei kwe en wahausa famen de iren ap homi Edom on mel Moab on mel enanggwenang kwe wahausa fug, ite kwe maseroho wahausareg de Ik Arnon foma fil o Moab en mo lahaik waharuk fil etma aik wahausa. Iren de enobam sabo etma salswa famen de, kwenang etma re wilayah Moab on en fam deg ma re ik anyo dahaloho nindig-atswa fug.

¹⁹ Airoho dulug de ap homi Israel on en ap wene walug hun Sihon raja Amori enap fahet o Hesybon wereg latsi on anyo fam de, Nit oho nenobam nenanggwenang on fam lauk kahereg de, o kwenang ap homi Amori on enanggwenang kwe etma laul en fano in, ulug heng uswa.

²⁰Famen de hun Sihon en de it aire we kwe lauk ale fahet neg de fug ulug endama demdoho besi fugdeg de alele wasi. Airoho disireg en de aren autsi sehen seneg on lit esalug de o Yahas kabog-dil lauk kwit de, ap homi Israel on nim weim yapsi.

²¹Famen de it ap homi Israel on enakni TUHAN, Allah en de ap Sihon nim autsi sehen foroho on nim enenggik fam en enalongap debesesi. Mu re airoho ap homi Israel on en kwenang ap homi Amori on etma wereg on enanggwenang mundoho etma hwelausa.

²²Iren de wilayah Amori on en ai fam de il apma selatan fil de o Arnon fam etman de, il emberim uatar fil de Ik Yabok fam etma deg, ne mo lahaik waharuk fil de bini lei fam etman de, Ik Yordan ikman mo obuk ik lauk fil etma huli deg.

²³Aireg ma re ap homi Israel on enakni TUHAN, Allah en de it Israel on enobahetdoho re ap homi Amori on etma muko wilip-enepsi.

²⁴Men de ketia aure haren nikangge hwelamin ulug uruk kahen a? Kwenang hat hanggembu Dewa Kamos en hat og-hitsi mu etma neg de hit henangge on deg laruhu aire fano. Famen de nit nenakni TUHAN Allah en nit nenobahet og-nesasi on etma re niroho ningdoho seneg lamuhuk.

²⁵ Haren boruk kwit de, at Balak hun Zipor amloho raja Moab on anyo re siag hag an neg de fanoreg lahi boruk kwit uruk kahen a? At Balak en de ele wirik aheg, nit ninim weim yabeheg de disi fug.

²⁶Ap homi Israel on en de o Hesybon mel Aroer mel o sili maseroho wereg on etma mel, ne o Ik Arnon elan kwe kota wereg on etma mel, de 300 tahun huli welatswa. Ne, it airoho wereg li etma nunggwelug haren owag oko hwelauk katihin fug?

²⁷Eleg, niren de hat hobam siag eke duruhuk fug. Haren neg de nit nenowarik waharuk kahen ai fam neg de siag duruk kahen. We At TUHAN neg de wene nit Israel on nim it enunggul unuk Amon on nim fam wene katukdoho kong-duruk on wereg,” ulug mondotfag.

²⁸Famen de at raja Amon on anyo en de Yefta en wene mondotfag on anyo fahet ambum debebag fug.

²⁹Ai en de at Yefta TUHAN Aheime obam atfag ma re at Yefta ebe o ap homi Gilead on mel Manasye on en mel kumu isil lebagdeg sombandoho o Gilead en Mizpa omano watfag. Etman de at ebe dil-dil de o ap homi Amon on en wilayah fam lebag.

³⁰Lebagdeg at Yefta en ele sali TUHAN fam uruk kwit de, “Nakni TUHAN Haren an ap homi Amon on enalong elehapdoho foukwag boruk kahen halug de,

³¹it enalong elehapdoho feselug an nebe nahap kolo angge nobam waruhuk halug de, at eke kirim-keram an waharukmu nolohotma nobam olma wilipuk karuhu on aire, TUHAN hendama hahayegdoho ulug waroho yal-hutuk ondoho og-huruhuk,” ulug hweag-etfag.

³²Ai ebagdeg de at Yefta anyo Ik Yordan dahaloho re ap Amon on enowarik lebag, ma TUHAN en at alongap debebag.

³³At Yefta en de it anyo o Aroer fam en de o Minit horog kwe etma nim abirangge re 20 kota en angge al hondoroho enowatil lebagdeg de o Abel-Keramim en yatdoho etma huli feik lebag. Enowatfag ma re ap homi Amon on humdoho waratfag ma, it enebe ap homi Israel on fam en enalong eleg atfag.

³⁴Airoho atfag ma at Yefta anyo sombandoho o Mizpa waharuk men de, at ahaloho duhum on hwele aire we misig-misig neg angge anyo akni olohotma no rebana kweng dil yunggul-yunggul waharuk katfag.

³⁵ Airoho waharukmu at Yefta en il hebagdeg de, at Yefta enda mundoho hesilduk en de asum miyog-mayogdoho embesebagdeg, ele uruk kwit de, “Yehei nahaloho, an nenda mundoho wat-dauk kahi! Nunggwelug haren an nendama hesili nobahaken? An den TUHAN fam mundoho hombuk baldihik mu re, nele lisoho wihi ha fug alereg o!” ulug ebag.

³⁶Ai ebag ma hwele anyo en Yefta fam uruk kwit de, “Nakni haren TUHAN fam mundoho hombuk baldihin mu, TUHAN en ap homi Amon on nakni haselei on etman enolok fam nenobaharuk ale anyo fahet unggulmu feik lowag ulug hobahasi. Anggere, nakni haren hele sali irihin ale on aire airoho neg dimihin,” ulug hweag-etfag.

³⁷Ai ebagdeg hwele anyo en ele lisoho eke nim uruk kwit de, “We misig neg heng hapuk kahi, An nebere ap ahap napeleg kweleg wararuhukmu re, an nehebi nim o dom kwe etma noruk kwit nebe aruhuk ale fahet noba yag-dil noruk[9] karuhuk en de bigalem biren og-nimin,” ulug hweag-etfag.

³⁸Airoho ebag ma re akni en fano ebagdeg de, hwele anyo lowag ulug fotog hebag. Hwele anyo ebere ahun hwela fug angge ne omalik mel enderuk fug angge waratfag ma re ehebi nim dom kwe enoba yarik lebag.

³⁹Yatuk men de bigalem biren lebag ma re, at ebe akni akit sombandoho watfag ma, akni en de TUHAN fam ele sali hweag-etfag aleroho debag. Ai fam de hwele duhum anyo ebe ap ahap apeleg kweleg waratfag. Ai fam de hwelani duhum Israel on en de tahun hundig-hundig fam

⁴⁰de nukoho ohwan fam hwele hun Yefta ahaloho duhum ai fahet enenda wenggel-halug o Gilead etma oba yatuk katfag.