Read Ninia Yali HAKIM-HAKIM 12 Bible Online

HAKIM-HAKIM 12 - Ninia Yali bible

HAKIM-HAKIM 12

¹Eta li em de unggul unuk Efraim on de weim yabuhuk ulug fik-fouk debagdeg de Ik Yordan baloho re o Zafon laul ulug lebag. Lebagdeg iren Yefta fam uruk kwit de, “Hat ap homi Amon on nim weim yabik laroho, nunggwelug nit nenoluge ferihin fug? Ketiare niren hat hebe nim hat hahain elekwe on abirangge nim han yal-henebukohon lahe,” ulug hweag-etfag.

²Ai ebag ma at Yefta en uruk kwit de, “Ap homi Amon on nim nit Gilead nenap nim de wene minggirig humon welahe. Ne, ap Amon on ai fam en fiselaroho nobahaukwag ulug aire an den hit henobam wol-henepihik famen de hit waharuhup fug.

³Ai fam de an den boruk kwit de, Iren de an let nabik wamlusa fug anyo i, berihikdeg de, an nebe wararuhuk fano berihik famen de an namurururoho ap homi Amon on ai nim weim yabik lauihik. Yabik lauihik mu re it ap etma enenggikmen TUHAN en an nalongap nobahasi. Men de nunggwelug hiren ketia an nowarukoho waharuk kahep?” ulug hweag-esebag.

⁴Airoho ebagdeg de Yefta en ap Gilead on mundoho kabog-debesebagdeg de, ap homi Efraim on etmano nim weim yaplug de enalong elehapdoho fesebag. (Ap Gilead on ap homi Manasye mel Efraim wereg ma wereg on etmano re ap Efraim on en de it nit nenunggul unuk fam en minggir atswa ulug enobam dopno esebag.)

⁵Ap Gilead enap weim yapuk on etmano re, ap Efraim on heiye laukmu kwe bal-enepul ulug de kwe ik baloho nindig-atuk kwe etmano inatil lebag. Ai debag ma re ap homi Efraim on heiye lauk kwit, ik baloho nindig-amul en ulug enolugap duruk li em de, ap homi Gilead on en hein og-esauk kwit de, “Hat ap Efraim on a?” ulug hein og-hauk men, aren uruk kwit, eleg

⁶uruk halug iren at hweag-utuk kwit de, hele fam, “Syibolet in,” ulug hweag-utuk kamuhup. Hweag-utuk men aren ele ai on uk fug ale duruk kwit, aren de, “Sibolet,” uruk halug de, iren at sene folug de kwe ik baloho nindig-aik laumu etmano misigmu eke en ebe binggi watuk kamuhup. Ai fam de eta li em ap Efraim on enebe 42.000 en enowatfag.

⁷At Yefta re tahun folfalik en fam ap homi Israel on melal-enepuk katfag. Ai en at ebe waratfag ma re, at obam sili indipmu[10] o Gilead en kota Mizpa etmano salfag.

⁸Yefta waratfag ma re ap homi Israel on de at Ebzan o Betlehem on ai en melal-enepuk katfag.

⁹Hun Ebzan ai omaliki re ap on enebe 30 en ne ahwelani enebe 30 en welatfag. Ahwelani omano re ap enunggul unuk amu on en hwelowag ulug og-esebag, ne aren de hwelani duhum on enebe 30 en angge enunggul unuk amu on at omaliki enohwesi fahet ulug og-enepfag. Aren de tahun sabiren fam ap homi Israel on melal-enepuk katfagdeg,

¹⁰ebe waratfag ma o Betlehem salfag.

¹¹At Ebzan waratfag ma re, ap homi Israel on de hun Elon unggul unuk Zebulon on ai en tahun num en huli melal-enepuk katfag.

¹²Ai en at ebe waratfag ma o Ayalon wilayah Zebulon on fam etmano salfag.

¹³At Elon waratfag ma re ap homi Israel on de at Abdon hun Hilel amloho o Piraton on ai en melal-enepuk katfag.

¹⁴At omaliki ap on neg de 40 en welatfag, ne at ombawi ap on neg de 30 en welatfag. It enebe domog de enowam keledai anduhunmu lahalug lauk on fahet fahat dalug latfag. At Abdon en de tahun ligin en ap homi Israel on melal-enepuk katfag.

¹⁵Airoho welatfagdeg ebe waratfag ma re o Piraton wilayah ap homi Efraim on en fam ap Amalek on enandom fam etma salfag.