Read Ninia Yali HAKIM-HAKIM 13 Bible Online

HAKIM-HAKIM 13 - Ninia Yali bible

HAKIM-HAKIM 13

¹Ap homi Israel on en de fobik TUHAN fam siag debag ma re, ap homi Israel on anyo ap Filistin on en sebel enusug lamag ulug fotog-esebag ma 40 tahun sebel enusug welatfag.

²Eta li em de ap eke unuk de Manoah unggul unuk Dan on obam kota Zora on welatfag. At ohwe re ibili welatfag.

³Famen de nukoho misig salim de Malaikat TUHAN eke olohotma enam aik watfagdeg hweag-utuk kwit de, “Hat endam et angge ketia huli homalik eke endag da fug angge welahen, famen de il misig welatlug homalik hahummu atlug, homalik ebe ap angge endag dahun.

⁴Ai fam de hebe hape hebeloho wereg lamuk. Ik anggur ahalue mel, ik siomo dul ulug nauk on mel ne di angge su angge saliog angge on mel nauk kam fug.

⁵ Homalik ai endag-aruhu li en anggere Allah onggwareg fahet welaruhu on ulug nazir on[11] wereg laruhu anggere, ebe endag-atuk halug de oruk baluk fug. Aireg ma re hit ap homi Israel on ap Filistin on en sebel henusug weregman del henepmin ulug aren indip duhu,” ulug hweag-etfag.

⁶Hweag-etfag ma re at Manoah ohwe anyo ahun akit lebagdeg hweag-utuk kwit de, “Allah en yonggo mon-enepuk on omano malaikat Allah hal on eke an nakit waha ma re an mundoho nakol ahireg de, an den mel hat hebe o keman wahen ulug mel hein og-hihi fug, ne aren ohore an nunuk de su ulug oho hweag-nereheik fug.

⁷Famen de aren uruk kwit de, hat homalik hahummu atlug homalik ap angge endag dahun ulug hweag-nereheik deg eke nim hweag-nutuk kwit de, homalik ai hahummu aruhu huli en, at ebe fobik wararuhu huli aire, at ebe Allah obahetdoho ap nazir on welaruhu anggere, haren ik anggur ahaik mel, ahalue siomorul ulug nauk on mel, di angge su angge saliog angge on mel de nauk karuhun fug,” ulug hweag-nereheik, ulug hweag-etfag.

⁸Airoho hweag-utuk mu holfagdeg de, at Manoah en diroho TUHAN fam somban ebag, “TUHAN nakni, niren omalik ai endag-aruhumen duruk kamuhuk ale fahet wene fukiroho hweag-nesowagdoho ulug Haren hamingming angge anyo nikangge nit nenakit mondorik ma, nenakni,” ulug somban ebag.

⁹Airoho ebag ma Allah en de at Manoah anyo ele holfagdeg de At Malaikat Allah anyo monde feik watfag ma re at Manoah ebe areng elegma at ohwe neg yabukmu hwerieg wereg ma akit watfag.

¹⁰Watfag ma at hwe anyo ahun akit buroho lebagdeg hweag-utuk kwit de, “Honowe, fu hakin! Ap atam nakit wahasi on anyo nikangge nakit waha ma,” ulug hweag-etfag.

¹¹Ai ebag ma at Manoah folo-folo ohwe ombolim lebagdeg, ap anyo fam uruk kwit de, “An nohwe fam wene hweag-irik waharihin on aire haren a?” ulug hein og-hebag ma, aren de “Demdoho, An den,” ulug hweag-etfag.

¹²Ai ebag ma at Manoah en de, “Fobik haren wene irihin eta hag demdoho atuk halug de, omalik ai en de nangginoho duruk karuhu e? Ne at ebe re keroho welaruhu e?” ulug hein webag.

¹³Hein webag ma Malaikat TUHAN anyo en onggo uruk kwit de, “Hat hohwe en de ik anggur ahaik mel, ik siomorukoho nauk on mel, di on su on anggur on fam en duruk on mel, di angge su angge saliog angge on mel, mundoho nauk karuhu fug. An den hat wene diroho diyug suroho diyug ulug hweag-hirihi on aire mundoho neg duruk kamuhup. Eta eke duk eleg angge ape wongdoho welam no re ape hebeloho welamag,” ulug hweag-etfag.

¹⁵Airoho hweag-etfag ma at Manoah en uruk kwit de, “Niren wam kambing ket sauwe on eke waroho osoko og-hirik wamul anggere hat hebe dia nangno nesauk welatmihin en hweag-hutuk kahe, nenowe,” ulug hweag-etfag.

¹⁶Airoho hweag-etfag famen de TUHAN en malaikat anyo en uruk kwit de, “An hit nangno henesauk kwit dia welatmin famen ohore, hiren an nobahet esetluhup angge aire an namin fug. Famen de haren esetmin ehenma re aire TUHAN endama ahayegdoho ulug waroho yalduk ondoho fesemihin,” ulug hweag-etfag. Famen de at Manoah en de aire Malaikat TUHAN en hweag-nereheik bouk eleg angge, aren uruk kwit de, “Wene haren hweag-nesehen on ai fobik en demdoho atuk halug de, niren hat halong bolug mot-habuhuk en de, nakni hunuk hweag-nesakin,” ulug hweag-etfag.

¹⁸Ai ebag ma Malaikat TUHAN anyo en hein og-hauk kwit, “An nunuk de mun nik on deg ma re An nunuk ihi ha fug alereg. Nunggwelug hat holuk amag ulug hein og-napuk kahen?” ulug hweag-etfag.

¹⁹Ai ebag ma at Manoah en de wam kambing ket sauwe on eke nim gandum anggen dorangge nim, seberoho walug watfagdeg de helep unggulmu folug TUHAN Aren di ale su ale mun along ale neg[12] duruk on anyo obahet folug waroho yal-etfag.

²⁰Airoho yale febag ma mezbah emberimmu etmano en indok ambulbul lahabeg laharuk mu re Manoah ohwe nim etano en inil hauk men de Malaikat TUHAN anyo indok ambulbul sahalimu bohol fam lahaik laukmu hebag. Hebagdeg Manoah en uruk kwit de, “Malaikat TUHAN ninil hehe,” ulug fubi debebagdeg de ohwe inim enerohole belabeg kwenangma sahaun ulug mot-debag. Airoho debagdeg en de malaikat anyo fobik inil ha fug angge welatfag.

²²Ai en de at Manoah en ohwe fam uruk kwit de, “Nit de Allah ninil hehe anggere nenebe demdoho waramul,” ulug hweag-etfag.

²³Ai ebag ma at ohwe en uruk kwit de, “TUHAN en nit nenebe binggi nenowatmin ulug deg liren de, niren At enda ahayeg howag ulug folug yal-erehe angge ai welep fug lit deg. Ne, nit ninil howag ulug debeheikma hehe on ai hela fug lit deg. Ne, di wene su wene hweag-neseheik on etma hweag-neselep fug lit deg,” ulug hweag-etfag.

²⁴Ai ebagdeg welatlug de Manoah ohwe anyo omalik ap angge endag-debagdeg unuk Simson soalfag. Airoho ap endag-debag ma omalik anyo log atuk kweleg ebe fano welamag ulug TUHAN en fanoap debebag.

²⁵Airoho wereg kweleg, at ebere ap homi enunggul unuk Dan on enobam sum sabo saloho o kota Zora dulug Esytaol dulug etma wereg ma, TUHAN Aheime en omamne og-utuk ale indip debebag.