Read Ninia Yali HAKIM-HAKIM 14 Bible Online

HAKIM-HAKIM 14 - Ninia Yali bible

HAKIM-HAKIM 14

¹Omamne airoho og-utuk kweleg at Simson eke salim de o Timna lebagdeg hwele duhum o Filistin on eke etma wereg ma il hebag.

²Airoho il halug de ambol somban obam watfagdeg akni mel isinga mel fam uruk kwit de, “An hwele duhum on eke o Filistin on o Timna wereg ma nil hihi. Anggere an nohwe ai wag lalug lombo nobahakup en ulug hweag-hisihi,” ulug hweag-esebag.

³Airoho hweag-esebag famen de, iren at fam uruk kwit de, “Homi nit nenunggul unuk agdoho deg on en mel, nit nenunggul unuk abirangge sahalimu oma on nim en hwela ale higit on de mun eleg en it ap homi Filistin on enebe TUHAN omaliki deg fug on etma wag lahuk uruk kahen aire nunggwelug?” ulug hweag-etfag. Ai ebag ma re at Simson en uruk kwit de, “Airoho ehen famen de an nohwe hwe Filistin on ai nenda. Anggere nayon haren hwele ai nim lombo nobahakun,” ulug hweag-etfag.

⁴Airoho debag li etare ap homi Filistin on en de Israel on sebel enusug lit welatfag ai en de TUHAN en, “Ap homi Filistin on ai keroho famen enowatle,” ulug boruk katfag ma, “At Simson en duhu,” ulug endama wenggelduk kwit, at Simson en ebag famen de, at akni apelegdoho welatfag.

⁵Airoho dulug de at Simson akni isinga mel o Timna lebag. Lebagdeg de yabuk anggur yabuk yahoma etma lebag hag de at Simson en mene olomene hag angge singa ket sauwe on eke ele kouwaril waharukmu ambi atfag.

⁶Ambi atfagdeg de fetagdoho etano at Simson ebe TUHAN en omamne og-etfag ma wam kambing waruk hagdoho singa anyo enggik en fiyogdoho ware febag. Airoho ware febagdeg de debag ale anyo fahet, “Airoho dihi,” ulug akni isinga fam dindil esebag fug.

⁷Airoho debelug de at Simson ebe hwele anyo akit lebagdeg de inim enele nauk katfagdeg hwele ebe fahet enda nebag.

⁸Li anunuroho hag welatlug de Simson nikangge hwele anyo hwelamin ulug lebag. Lauk kwit de, singa watfag on anyo il hamin ulug de kwe kwaniroho lebag. Etano lebagdeg hauk men de, singa wareg filik anyo fam de kin humdoho wereg ma hebag.

⁹Airoho debag ma hebagdeg de enggik en kin ahalue felelengdoho webagdeg kwe fene nil lebag. Lebagdeg kin ahalue foma re akni isinga mel og-esa lebag ma nebag. Famen de kin ahalue aire singa wareg filik anyo fam en wihi ulug isinga akni mel fam hweag-esebag fug.

¹⁰Simson akni anyo hwele anyo obam lebag ma, it etma ap sauwe on en duruk katfag aleroho, at Simson soni pesta esetfag.

¹¹Airoho debag ma ap Filistin on en ap sauwe on enebe 30 en angge at Simson nim ambieg welamag ulug eneko fesebag.

¹²Airoho debag ma at Simson en uruk kwit de, “An hwena ale eke onggo hweag-numluhup en hweag-hesamin. An den urukmu hiren onggo hweag-numluhup halug de, an den onggo henebe domog sum kain lenan il sako on misig heg nim, sum enebe sum et eneyog sum et wutdoho mun ebe on mel, og-hesamin. Anggere pesta au esetuk kwit nukoho sabiren fam eta onggo heraruhupdeg ebe hweag-numuhup en henobam fehi.

¹³Famen de hiren wene onggo hweag-numuhup fug halug de hit henebe domog en sum kain lenan il sako on baleg misig heg mel, ne sum wan-duruk on enebe sum et eneyog sum et angge wut heheg nim og-numuhup,” ulug hweag-esebag. Hweag-esebag ma it ap Filistin on etmano en uruk kwit de, “Fano neg! Anggere wene ai ebe hweag-nesakin,” ulug ebag.

¹⁴Ai ebag ma Simson en uruk kwit de, “Di angge su angge nauk on etman de nauk angge on wilibik wahasi. Ne, omamne humon ilonggoman de unduk mit angge wilibik wahasi aire ebe nunggwangge behep?” ulug hweag-esebag. Hweag-esebag ma re ap omano en nukoho henahan hunduko herarebag famen de iren ebe di fahet ulug hweahabag fug.

¹⁵Mu re nukoho ohwaneg angge fam de iren at Simson ohwe fam uruk kwit de, “Hat hahun en wene ai ebe hweag-nesowag ulug obam koru wakin. Ne, haren airoho duk fug angge behe imihin halug de, hat hebe inim ap homi hakni obam wereg on mundoho inim o harep fisako henowatul. Nit nenangge di angge su angge mundoho elehap dukwag ulug nenayonggo ferihin hwea!” ulug hweag-etfag.

¹⁶Ai fam de Simson ohwe anyo ahun akit oba yatil lebagdeg uruk kwit de, “Haren an nebe henda hundig nusug fug lahen ale aire an noluk deg. Wene aire haren an nerekwi en ebe diroho ulug hweahaukwag ulug hweag-easauihin famen de ebe diroho fahet irihik ulug an hweag-nitmihin fug halug de an nebe herim en dirihin!” ulug hweag-etfag. Airoho ebag ma at Simson en uruk kwit de, “Bok lamin! An nakni nisinga mel fam ohore hweag-esauihik fug, nunggwelug hat hweag-hetle?” ulug hweag-etfag.

¹⁷Airoho hweag-etfag ma re soni pesta anyo duruk men neg nukoho sabiren debebag huli aire Simson ohwe anyo oba yatuk kwit neg welatfag. Airoho neg duruk wereg lit ahun fam kiog duruk en de wene ai ebe diroho fahet hweag-easauihik ulug ebe silonggoho hweag-etfag ma re, at Simson ohwe anyo en fobik it ap Filistin on omano hweag-esebag.

¹⁸Airoho hweag-esebag ma re it ap kota ai on omano en de o mo owan obuk uruk eleg kweleg Simson fam uruk kwit de, “Kin ahalue re unduk mit deg famen de unduk mun mit deg angge aire nunggwangge no? Ne, singa re omamne humdeg famen de nunggwangge on eke omamne mun alongdoho deg no?” ulug hweag-etfag. Airoho ebag ma Simson en onggo uruk kwit de, “Hiren an nohwe obam limirelep fugmen de wene ebe diroho ulug hweag-heselep fug lit deg,” ulug hweag-esebag.

¹⁹Airoho hweag-esauk kweleg etano neg at Simson TUHAN omamne obam atfagdeg o Askelon lebag. Lebagdeg de o etma ap enasum fano wan deg on enebe 30 en enowatfag. Enowatlug de enesum de ap 30 en wene onggo herarebag enap omano og-esa watfag. Airoho dulug de at Simson ebe ahummu ahe het-betdoho deg lit de akni obam watfag.

²⁰Watfag ma re at Simson ohwe anyo akni en de ap amu on Simson inim hwe lomborurukmu welatfag on omano eke fam og-etfag.