Read Ninia Yali HAKIM-HAKIM 15 Bible Online

HAKIM-HAKIM 15 - Ninia Yali bible

HAKIM-HAKIM 15

¹Airoho debagdeg nukoho eke welatlug de, gandum anggen balduk salim at Simson kambing ket sauwe on eke walug de ohwe og itmin ulug lebag. Lebagdeg ohwe akni fam de diroho hweag-etfag, “An nohwe ninim ambi amul en de o ambe ilonggoma kwimin en hweag-hutuk kahi,” ulug hweag-etfag. Famen de ohwe akni anyo en de, “Fano kwin” ulug hweag-etfag fug.

²Ai ebag fugdeg de aren Simson fam uruk kwit de, “An den boruk kwit hat de dik-demdoho at ebe halitnoroho duruk kahen ulug de at ebe hat hare eke fam og-itihik. Famen de hat de hwele ai aut neg de il aluli mun buhundeg anggere hwelamihin fano,” ulug hweag-etfag.

³Ma, at Simson en uruk kwit de, “An den ap Filistin on fam ketia eiya debesemin ale aire indip an siag en de fug, we henonggwareg siag en!” ulug ebag.

⁴Ai ebagdeg de aren olomene serigala 300 en senerik lebagdeg de biren heg misigmu seberebelug ahaenggum fam het-debebagdeg, het deg ma etano eral misig heg het-debebag.

⁵Het debebagdeg de esahe omano fam indok hunduko kwelabe folug de olomene omano ap Filistin on eneyabuk kwe omano fotog-esebag. Fotog esebag ma re gandum anggen baloho febag on omano harep nebag. Omano nauk kwit de, gandum yaho on mel, zaitun yabuk yaho on mel oho harep nebag neg.

⁶Airoho nebag ma ap Filistin on en de, Aire san harep fisareheik, ulug ka baldil lebag. Ka baldil lauk men de ap homi eke en uruk kwit de, Simson ohwe anyo akni o Timna on anyo en at Simson ori omano on eke fam og-itsi mu re Simson en disi, ulug ebag ma re iren de Simson ohwe anyo mel, ap homi akni obam welatfag on omano mel, mun felelengdoho enebe o harep fisag enepfag ma enebe et angge han nebag.

⁷Airoho debag ma at Simson en ap Filistin on fam uruk kwit de, “Yoho, hiren henobabut de airoho duruk kahep au a? An de hiren nenowarehep on ai enunggulmu henowaruk fug angge re bok welam alere nerim deg, ulug hombuk baloho hweag-esebag.”

⁸Ai en de fobik ahummu ahe hetdoho re ap Filistin on enowatmin ulug lebagdeg enebe humdoho enowatfag. Enowatlug de at ebe duk funu unuk Etam fam etma watfagdeg helep owik fam heraho latfag.

⁹Airoho lebag ma ap Filistin on ap homi Yehuda on enobam lebagdeg enobam sabo etma salfag. Airoho witlug de o kota Lehi lebag.

¹⁰Lebag ma ap homi Yehuda on en de, “Hiren nit nenowatul ulug huk nenebik wahep aire nunggwelug?” Ulug hein og-esebag ma, iren onggo uruk kwit de, “Nit de at Simson en nit nenobaharuk katsi ale eta hag niren oho at fam airoho deboul en de at ebe senetul ulug wahe,” ulug hweag-esebag.

¹¹Airoho uruk on anyo enesanggo holfagdeg de ap Yehuda on enebe 3.000 en o Etam helep duk owikmu etmano lebag. Lebagdeg etmano en iren Simson fam uruk kwit de, “Ap homi Filistin on en nit sebel-nenusug wereg ale anyo re hat hapeleg aha ma wong saleg oma welahen a? Nunggwelug haren nit airoho nenobaharuk kahen,” ulug hweag-etfag. Hweag-etfag ma at Simson en uruk kwit de, “An de we it ap Filistin on en an lal-napswa ai en an den oho onggo debemin ulug dirihin,” ulug hweag-esebag.

¹²Ai ebag ma it ap omano en de, “Nit de hat hebe henggik sabu hetdoho ap Filistin on og-esa laul en ulug wahe,” ulug hweag-etfag. Ma at Simson en onggo uruk kwit de, “Hiren de hat hebe howatul fug ulug dag hombuk baloho iek,” ulug hweag-esebag.

¹³Ai ebag ma, “Fano, niren hat hebe howatul fug. We henggik hetdoho hebe ap Filistin on og-esaul en wahe,” ulug hweag-etfag. Ai ebagdeg at Simson ebe sabu ket lisig on biren fam enggik het-debagdeg owikmu etmano en walug watfag.

¹⁴Walug watfagdeg o Lehi watfag ma re, ap Filistin enap at wereg ma kuruk kwit enele amitmit supdoho kwebag. Kwebag ma etano li em neg at ebe TUHAN omamne obam atfagdeg enggik sabu het-debag on anyo, sabu re indok en nalug ul anggalkal atuk on hag deragdoho belabe fesebag.

¹⁵Airoho bale fesebagdeg wam keledai misig eke oroholanggen owag ket angge wereg ma hweako webagdeg anyo fam de ap homi enebe 1.000 en binggi enowatfag.

¹⁶Airoho enowatfagdeg at Simson en suni uruk kwit de, “Keledai oroholanggen owag fam, ap enebe 1.000 en on mundoho binggi enowarihi. Keledai oroholanggen fam enebe enowarihireg enebe wareg kabogdoho[13] fesehi oi!” ulug suni ebag.

¹⁷Airoho dulug de keledai elahaunde owag anyo hwik-esebag. Ai fam de obale etare unuk Ramat-Lehi[14] soalfag.

¹⁸Ai en de Simson endama ik aherebag ma, ele hum fam TUHAN hweag-utuk kwit de, “TUHAN nakni we horog ketia dia Haren an nalongap humon nobahaken, famen de an nebe ik obok en waram ale durukmu, it ap Filistin on Hat enapeleg on au en an sen naplusa re nerim,” ulug hweag-etfag.

¹⁹Ai ebag ma Allah en de helep unggul o Lehi anyo husi febag ma ik eleruk wilibik watfag ma at Simson nebagdeg, ebe welatfag hagdoho atfag. Ai fam de ik eleruk aire Ik Hakor[15] ulug soalfag. Ik aire o Lehi etman wilibik waharuk wereg.

²⁰Ap homi Israel on it Filistin on en sebel unusug wereg ma, at Simson en de Israel on 20 tahun melal-enepuk kwit welatfag.