Read Ninia Yali HAKIM-HAKIM 16 Bible Online

HAKIM-HAKIM 16 - Ninia Yali bible

HAKIM-HAKIM 16

¹Nukoho misig salim de Simson o Gaza lebag. Lebagdeg de hwe eke hambena duruk katfag on nim ambi atfagdeg de inim noho ik lebag.

²Ma re ap homi en de Simson o etma wereg urukmu ap homi o Gaza on en enesanggo holfagdeg de o etma lebagdeg at ebe wilibuk no ulug o kota elehet oho on sokole kwik laukmu etma hup hundig kahaleg welatfag. Airoho wereg lit enendama en de, “O mo kwelabik waharuk kweleg Simson ebe watul,” ulug ai bebagdeg de hup ai salim iren diroho suroho mel duk fug angge welatfag.

³Famen de at Simson nohouk fug angge weregman o sekan debag. Ne, o hup andundu etanore o kota elehet oho on sokole kwik laukmu etma wilibik lebagdeg de sok hilinggig on eyog lahabeg on mel, sok ebe mel, sok kelog mel, abirangge heneko webagdeg anduhunmu sahaliroho walug o Hebron foma fil dom atel funu ebe fam etma feik lebag.

⁴Airoho dulug de at Simson en de hwe o Sorek Donggoma on unuk de Delila fam enda nebag.

⁵Airoho debagdeg de ap Filistin on enowesi kaindeg enebe foaben hwe anyo akit lebagdeg hweag-utuk kwit, “Simson en de an de diroho fam en nomamne atihik deg duruk kahi. Anggere diroho nabukmu neg de nomamne eleg am alereg, wene heraho on ai hweag-homagdoho re endama onggonik lakiyug. Airoho hweag-itmihin ai fam de, niren ebe warukoho re higitdoho senerik wamul. Haren airoho dimihin halug de nit nenebe domog en de uang perak humon 1.100 en hat og-humul,” ulug hweag-etfag.

⁶Ai ebag ma re at hwe Delila en de Simson fam uruk kwit de, “Simson, nunggwangge fam hat homamne welahen? Ne, hat homamne ai eleg amag ulug de nunggwangge fam sabu het habuk alereg e, wene hendama heraho lahen on ai hweag-nimin,” ulug hweag-etfag.

⁷Ma Simson en uruk kwit de, “An nenggik sabu sehen enggela keron sabiren angge owan iring atuk eleg on fam het nabukmu neg de nomamne eleg atlug ap homi hag ahi ha alereg,” ulug hweag-etfag.

⁸Ai ebag ma ap Filistin enowesi omano en de sehen enggela ket angge on neg sabiren angge owan iring atuk eleg on webagdeg de Delila og-etfag. Og-etfagdeg de it ap Filistin on enebe o ambe eke fam wereg kweleg, at hwe Delila en de Simson enggik sabu etano fam het-debagdeg ele hum fam hweag-utuk kwit de, “Simson! Ap Filistin on waharuk,” ulug ebag. Ai ebag ma airoho hweag-utuk kweleg etano neg Simson enggikmu sabu het deg on etano hekel soaleg indok en kongdoho belapuk hag dekik-dakakdoho embesebag. Airoho debag ai fam de wene Simson en endama herako wereg ma omamne welatfag on enam atfag fug.

⁹

¹⁰Airoho debag fug mu re at Delila en Simson hweag-utuk kwit de, “Hat hele seiale an lal nabehen Hat de nunggwangge fam henggik higitdoho sabu het habuk alereg, an fagdoho hweag-nimin?” ulug hweag-etfag.

¹¹Hweag-etfag ma aren de, “An sabu het nabukoho halug de sabu keron ap homi en di angge su angge het duruk eleg on fam het nabukmu neg de nomamne eleg atlug ap homi hag ahi ha alereg,” ulug hweag-etfag.

¹²Ai ebag ma ap Filistin on enebe o ambe eke fam wereg kweleg de at Delila en sabu keron eke wag lebagdeg de Simson enggik het-debag. Het debagdeg ele hum fam de, “Simson! Ap Filistin on wahesa,” ulug hweag-etfag. Famen de at Simson enggik sabu hetdeg on anyo ap homi en hekel soaleg on lebeg hauk hag enggikmu en lebeg esebag.

¹³Airoho lebeg esebag ma hwe Delila en Simson fam uruk kwit de, “Hat seiale an lal nabehen hihi. Di on fam neg de higitdoho an sabu het-nabuk alereg ulug hweag-nimin,” ulug hweag-etfag. Ai ebag ma Simson en de, “An noruk anggen sabiren fam hetdeg on oma seberoho sabu het-debelug de e sum kain yihiruk on fam het duk men neg de an nomamne eleg atlug ap homi on hag hi ha alereg,” ulug hweag-etfag.

¹⁴Ai ebag ma at Delila en de Simson nohoukwag ulug debebagdeg oruk sabiren hetdeg latfag on omano seberoho sabu hetdoho re e sum kain yihiruk on fam het-debebag. Airoho debelug ele hum fam de, “Simson! Ap Filistin on wahesa,” ulug ebag ma, at Simson inatfagdeg oruk lit hauk men e sum kain yihiruk on fam het-debebag on anyo fam en lisoho watfag.

¹⁵Airoho atfag ma at hwe Delila en de, “Hat henda re amuroho deg liren de, hambilik fam en neg, An hat fam nenda hundig husug lahi, ulug uruk kahen anyo hele seiale hihi. Haren de henggik henahanam hele seiale lal napuk kwit, an de di on fam en nomamne humon welahi ulug de ketia huli en nim ebenamegdoho hweag-nutuk kahen fug,” ulug hweag-etfag.

¹⁶Hweag-etfagdeg de di salim su salim Delila en de nenek-yobaruruk kwit de Simson limiruruk katfag ma re Simson en ele holduk kam alere obam lele duruk katfag.

¹⁷Airoho duruk katfagdeg en fobik neg de wene endama heraho latfag on anyo fagdoho hweag-utuk kwit de, “An nebe Allah onggwareg fahet on welaruhuk ulug, endag-atihik li en de ap nazir on welahimu re noruk eke bal napuk fug. Mu re an noruk bal nabuk men neg de nomamne eleg ahi ha alereg. Airoho nomamne eleg atlug ap homi on hag aruhuk,” ulug hweag-etfag.

¹⁸Ai ebag ma re at hwe Delila en de, “Simson en wene endama heraho on anyo enamoho hweag-nereheik,” ulug furebebag. Airoho furebebagdeg wene ap homi Filistin on enowesi fam mondo foruk kwit de, “Wene Simson en endama heraho on anyo hweag-nereheik anggere nikangge henenggik su li em neg manik,” ulug mondotfag. Mondotfag ma re iren uang hwe Delila og-utuk on ulug walug watfag.

¹⁹Watfag ma re at Delila en Simson nohoukwag ulug ele fanoroho hweag-etfag ma re ahoma nohobag. Nohobag ma re ap eke wamag ulug wol-hebag ma, watfag ma Simson oruk sabiren soaleg anyo balukwag ulug hweag-etfag ma balfag. Balfag ma re omamne eleg atfag ai en hwe Delila en Simson fam obam ouk-bouk ale debebag.

²⁰Ai debelug ele hum fam de, “Simson! Ap Filistin on wahesa,” ulug ebag ma, Simson inatfagdeg TUHAN en at embesebag anyo apelegdoho re endaman neg de, an den atam dirihik etano hagdoho wilipmin bebag.

²¹Ai fam de ap Filistin on kwebagdeg de Simson enggik sabu het-debagdeg de il anggen hwililoho webag. Airoho debelug at ebe o Gaza walug lebagdeg sabu bosie tembaga on biren angge fam hetdoho febagdeg, o ap homi hetdoho kwelap enepukmu omano kwelabe febag. Kwelabe febag ma etma wereg ma di angge su angge anggen sahalduk kamag ulug hweag-etfag ma anggen sahalduk katfag.

²²Airoho debag famen de at etma wereg kweleg etano Simson oruk wilibikoho debag.

²³Simson ebe airoho wereg kweleg etano neg nukoho eke salim de ap Filistin on enowesi enalong wereg on soni pesta esereheg, ne di on su on humdoho waroho kembu Dagon og-ereheg, dul ulug kabog-debag. Kabog debagdeg de iren suni uruk kwit de, “Nenanggembu dewa en de Nenaselei on Simson anyo ebe along elehap debelug de ebe og-nesasimu o!” ulug suni uruk katfag.

²⁴Airoho uruk kwit enendama enahayeg en de, “Niren Simson unda yako belapuk kamul en de wag lakiek!” ulug ebag. Ai ebag ma re Simson ebe wag lebagdeg o enenggik sabu hetdoho kwelap-enepukmu en walug wilibik watfag ma re Simson unda yako belapuk kamul ulug febag. Febagdeg de at ebe o fesengge leho on biren angge bul lahabeg on etano foma-foma wereg kweleg bulmu etma unduhuk febag. Unduhuk febag ma airoho wereg kweleg ap homi humdoho etmano en Simson inil hebagdeg, enakni Dagon anyo mot-duruk kwit de suni diroho ebag: “Simson neneselei on nenobam suma siahap duruk katsi anyo ap homi niron enowatuk katsi anyo mun humdoho nenowatuk katsi anyo nenanggembu en nenakni en nenalong amag ulug nenenggikmu feik wahasimu wereg o!” ulug uruk katfag.

²⁵

²⁶Suni airoho uruk katfag ma at Simson en de ap ap doron at enggik seneko walug kwebagdeg welatfag on anyo fam hweag-utuk kwit de, “O fesengge belabeg wereg on fam eta nebe dimiroho wereg lit nenggik seneko welatmin en de henggik fotog-neakin,” ulug hweag-etfag.

²⁷O ai ilonggoma re ap mun hum-hamdoho enowesi enalong wereg on foaben etano nim, et o hoporoho welatfag. Ne, o ai ambolma hagma re ap enebe 3.000 en welatfag. Airoho wereg lit de it enebe mundoho en de at Simson foroho lit enele en Simson bulip-duruk katfag.

²⁸Airoho duruk kweleg eta re at Simson en somban uruk kwit de diroho ebag, “Nakni TUHAN Mun Leho welahen on. Haren an ebet neakin. Ap homi Filistin on su en an nil anggen foma-fomat hemeloho wausa on ai fahet de an den oho onggo enowatmin en de, Homamne we ketia au li em neg og-nimin o, nakni,” ulug somban ebag.

²⁹Airoho ebagdeg at Simson en de e fesengge belabeg welatfag on etano fam enggik sene febag. Sene febagdeg de enggik bekit fil en de e fesengge belabeg on eke fam ne enggik hware fil en de e fesengge belabeg on eke anyo fam omamneroho sene febagdeg,

³⁰ele hum fam uruk kwit de, “An nebe ap homi Filistin on nim waratmin aire fano,” ulug ebagdeg omamne hasimeg e fesengge belabeg on etano mem hebag ma re, sunukdoho yuhulduk kwit de ap homi Filistin on mundoho enowesi enalong wereg on foaben etano mel o ai welatfag on etmano mel sebel enepfag. Sebel enepuk kwit de Simson ebe oho waratfag. Ne, at Simson ebe oluk wereg lit atam ap enowatuk katfag on etma re maben hag famen de at ebe waratuk kwit enowatfag on ai neg de mun alongdoho enowatfag.

³¹Airoho at Simson ebe waratfag ma re ap homi at ori erekwi mel en ebe wareg anyo waul ulug lebag. Wag lebagdeg de walug watlug de ap homi waratuk on sal-enepuk katfag ma o Zora honggoleg Esytaol honggolegma etma at akni Manoah salfag ma etma salfag. At Simson ebe re ap homi Israel on enobahet 20 tahun melal-enepuk katfagdeg waratfag.