Read Ninia Yali HAKIM-HAKIM 17 Bible Online

HAKIM-HAKIM 17 - Ninia Yali bible

HAKIM-HAKIM 17

¹Ap eke unuk de Mikha, nen ebe o domma wilayah Efraim en on fam etma welatfag.

²Wereg lit de nukoho misig salim de aren isinga fam uruk kwit, “Ninga, hat hauang perak on ebe 1.100 en longgo isi li em etano an den hol-hauk men de, ninga haren de ap herahasi on anyo hururung duruk katihin. Nisinga ebe an den heraharihik anggere uang ebe su!” ulug ebag ma isinga en onggo uruk kwit de, “Namloho hebe TUHAN en fanoap hobahaukwag!” ulug hweag-etfag.

³Ai ebag ma at Mikha en uang anyo owag oko feik laukmu at isinga en uruk kwit de, “An den namloho hebe hururung hobaharihik on ai hobam aruhu hayog de, an den perak TUHAN obahet folug e on ahut ilitdoho re perak nim sapliroho wiruhu en foruk kahi. Anggere uang aure nikangge hat hobam feik waharuk kahi,” ulug hweag-etfag.

⁴Ai ebag ma at Mikha en de uang isinga en owag oko og-etfag ma, isinga en de uang etano en 200 en webagdeg ap perak lalduk on fam og-etfag. Og-etfagdeg ap tukang anyo en de ahut ilitdeg eke perak nim sapliroho lalukwag ulug og-etfag. Ai en de ilitdeg anyo re at Mikha obam olma febag.

⁵At Mikha onggwareg en kembu apne waukmu etma ohore obale foma welatfag. Aren de kembu ahut ilitdeg nunggwe en hagdoho nim sum efod [16] misig nim hilinggebagdeg de at amloho ap angge misig eke imam welamag ulug unduhuk febag.

⁶ Eta li em de it enunggul unuk Israel on fam ap raja eke welatfag fug. Mu re ap homi en de enendan fano boruk ale domog neg duruk katfag.

⁷Airoho durukmu re eta li em ap sauwe on unggul unuk Lewi on eke welatfag. Atam de at ebe o Betlehem wilayah Yehuda on fam en etma welatfag.

⁸Famen de fobik en at o kota etmano embeselug o wereg ma amumu herarik lebag. Heraril lauk kwit etma re lebagdeg at ebe dil-dil de o hun Mikha obam, wilayah it Efraim on en domma etma aik lebag.

⁹Airoho aik lebag ma Mikha en hein og-hauk kwit de, “Nare, hat de ap kema homalik?” ulug hein og-hebag. Ma ap anyo en onggo uruk kwit de, “An den nebe Lewi nomalik o Betlehem, Yehuda fam etmano en. Ne, an nebere o wereg ma fahet heraruruk kahi,” ulug hweag-etfag.

¹⁰Ai ebag ma Mikha en uruk kwit de, “Hat hebe nit komo nenepuk on aheg, ne yabuk imam on deheg, duruk karuhun en de an ninim suma welamin, ne an den de tahun hundig-hundig fam etma uang perak on numen nim, sum wan-duruk on nim, nauk on nim og-hutuk karuhuk,” ulug hweag-etfag.

¹¹Ai ebag ma re ap sauwe Lewi on anyo de ai fano bebag ma re, at Mikha en de at obahet imam welamag ulug unduhuk febag. Ne, at ebe re Mikha obam wereg ma re, at Mikha en de at omalik onggwareg en ondoho on hagdoho deberuk katfag.

¹³Airoho deberuk katfag ma, Mikha en uruk kwit de, “Ketia an den boruk kwit de, ap Lewi on misig eke an nobahet imam wereg anggere, TUHAN en nobam fano ale nobaharuk karuhu behi,” ulug bebag.