Read Ninia Yali HAKIM-HAKIM 18 Bible Online

HAKIM-HAKIM 18 - Ninia Yali bible

HAKIM-HAKIM 18

¹Eta li em de ap homi enunggul unuk Israel on fam ap enowe raja eke welatfag fug. Ne, it enunggul unuk Dan enap de it enunggul unuk Israel enap amu on etmano nim seberoho enanggwenang wereg fug en de o kwenang wilayah iren on aruhu mu ulug heraruruk katfag.

²Ai fam de iren ap it enunggul unuk on agdoho abirangge omano en enesahalimu en o Zora mel Esytaol mel wereg on omano enesahalimu en de ap enebe neben-heben on neg enebe foaben momal enepfagdeg, ap foaben etan de o etma inil o lowarik lowag ulug hweag-esebag. Ma re ap etano lebagdeg de o domma wilayah Efraim on en omano fam aik lebag. Etman de it enebe hun Mikha obam nohobag.

³It enebe o Mikha obam anyo kwik lauk men de, ap Lewi on sauwe omalik anyo ele urukmu re iren ele unggut eneg angge enesanggo holfag. Ai fam de it enebe at akit lebagdeg hein og-hauk kwit de, “Nunggwelug hat hebe suma welahen? Nunggwe ale duruk kahen? Ne, hebe san og-haplug wahasi?” ulug hein webag.

⁴Ai ulug hein webag ma at sauwe omalik anyo en onggo uruk kwit de, “An de suma at Mikha wereg en welahi. Aren at obahet imam welamag ulug unduhuk nobahasireg de, aren neg an yabuk duruk kahi on fahet onggo og-nutuk,” ulug ebag.

⁵Ai ebag ma iren at fam uruk kwit de, “Aireg halug de nit nenobahet let nenebin. Nit wahe ale aure ambiangma aruhu ale fahet a, eleg ale fahet a, ulug Allah hein og-hakin,” ulug hweag-etfag.

⁶Ma at imam anyo en onggo uruk kwit de, “Hit waharuhup on au fahet de TUHAN en fano besi anggere henenda fituk eleg,” ulug hweag-esebag.

⁷Airoho ebag ma re ap enebe foaben etano o Lais lebag. Lebagdeg de ap homi o etma wereg on etmano fubi debesebagman de, ap homi o Lais etma on wereg alere, ap homi enunggul unuk Sidon on en wereg ale nim de aham deg latfag fug. It enebere yatdoho o elanma welatfag ne it Sidon enap nim oho re yatdoho welatfag famen de it enebere enakol eleg angge bok wereg lit, enaselei on mel welatfag fug. Ne, di angge su anggere wereg neg deg ma sigdoho welatfag.

⁸Airoho deg ma esalug de it ap foab en etano sombandoho re it enunggul unuk on fam o Zora mel o Esytaol mel omano waharukmu re, iren hebag ale omano dindil esowag ulug heng-enepfag.

⁹Iren uruk kwit de, “Nit de o Lais etma lauhukdeg ninil hauhukmu re, kwenang mun fanoreg latsi, ne ebe wiriloho deg ma di angge su angge mun wereg negdoho deg latsi. Ne, eleg angge deg latsi fug. Anggere niren o Lais ai weim sinalik lakohon. Hit de o suma neg wereg lit di ale su ale duk fug angge neg wereg eleg. Allah en o kwenang etma nit fam og-nesasi boruk kahema re, fol-folo o etma lalug o kwenang etma delik lakiek. Hinil esahupmu re ap homi etma on en ap en nenowarik wamlusa mel eleg angge wongdoho wereg ma esahup,” ulug hweag-esebag.

¹¹Ai fam de ap enunggul unuk Dan enap o Zora mel Esytaol mel etmano en de enebe 600 en angge enesehen nim fik-fouk debagdeg,

¹²it enebe o Kiryat-Yearim wilayah Yehuda on fam en mo obuk uruk fil etma lebagdeg enobam sabo etma salik lebag. Ai fam de o eta unuk de, Dan Obam Sabo Salfagma, uruk.

¹³Etan de it anyo dil-dil de ap Efraim on enandom fam etman de at Mikha obam wereg huli aik lebag.

¹⁴Ap foaben it dam inil hwalik lebag on etano en it enori fam hweag-esauk kwit de, “O misig etma eke fam de kembu no perak fam ahut ilitdoho hilinggusa angge wereg ale aire henoluk deg a? Eke ahut ilitdeg amu on mel, efod mel oho etma wereg a? Anggere niren keroho dul ulug aire henenda wenggeliek,” ulug hweag-esebag.

¹⁵Ai ebag ma re at Mikha obam ap Lewi on sauwe omalik anyo wereg ma lebadgeg at ebe deg ale hein og-hebag.

¹⁶Eta li em de it enunggul unuk Dan on it enesehen lik-louk deg enap etano re o sokole kwik laukmu etma unduhuk latfag.

¹⁷Ne, it ap inil hwalik lebag on foaben etanore bekit olma kwik lebagdeg iren de e on fam ahut ilitdeg angge perak nim sapliroho hilinggig angge anyo mel, ahut ilitdeg amu on mel, efod mel webag. Ne, ap sauwe omalik Lewi on anyo re ap sehen seneg on enebe 600 en etano nim o sokole kwik laukmu unduhuk welatfag.

¹⁸It ap foaben etano o hun Mikha obam anyo kwik lebagdeg no efod mel kembu ahut ilitdeg mel enenggik abusag waukmu re, ap sauwe on Lewi omalik anyo en hein og-esauk kwit de, “Hiren oma nunggwe ale duruk kahep?” ulug hein og-esebag.

¹⁹Ma iren onggo uruk kwit de, “Hele eleg amin! Nit de hein og-nenepuk eleg. Haren nit nenobahet imam wereg lit komo nenebeheg duruk on welaruhun anggere hat de nit ninim amin. Ap misig ahain elekwe on fahet imam wereg ale aire fug. Ite enunggul unuk misig on fahet imam wereg ale ai neg de fano!” ulug hweag-etfag.

²⁰Ai ebag ma re ap Lewi on anyo en de wene ebag on anyo fahet ahayeg hebag. Ai fam de aren efod mel, kembu ahut ilitdeg omano mel, webagdeg de it ininim lebag.

²¹Ai en de ap esan anyo kwe lakoho lit de, omalik doron nim, enowam nim, enasum angge nim de atam lauk katfag.

²²Lebagdeg enebe yatdoho hag aik lebag ma re, ap Mikha en ap homi o aluluk kwe wereg on etmano hondog esebagdeg de inim seberoho re ap homi enunggul unuk Dan on omano mug-eneplug lebag. Mug eneplug lebagdeg mun horogdoho aik lebagdeg,

²³Mikha nim ap omano nim en de ngai-wai angge it Dan on enobam debag. Ai debag ma re it ap homi Dan omano enalukwe endenoho Mikha fam hein og-hauk kwit de, “Nunggwangge wereg? Nunggwelug ap homi hum-hamdoho oma nim wahep?” ulug hein og-hebag.

²⁴Ai ebag ma at Mikha en onggo uruk kwit de, “Hiren an nanggembu ahut ilitdeg inim ap etma yabuk duruk on imam nim walug wilibik wahepma an nangge eke wereg fug kweleg famen, hiren uruk kwit, Nunggwe wereg en uruk kahep au a?” ulug hweag-esebag.

²⁵Ai ebag ma enunggul unuk Dan enap anyo en uruk kwit de, “Hambilik larin. Hat hele uruk men de ap au enolok hasimeg wilipuk kwit hat fam yeik haroho bog uluswa ma re hat hebe nim it hahain elekwe on nim mundoho warahep ha alereg,” ulug hweag-etfag.

²⁶Airoho hweag-itlug de ap homi Dan enap anyo lakoho lebag. Lebag ma re at Mikha en esebag ma re it ap anyo re enomamne humdeg ma ne at de omamne eleg hag deg en de at ebe sombandoho obam watfag.

²⁷Ap homi Dan enap anyo en imam anyo mel di angge su angge kembu mot-duruk angge ulug Mikha en witfag angge omano mel, walug de lauk katfagdeg o Lois kota aire ap homi enebe enakol eleg angge bok welatfag ma anyo weim sinalik lebag. Kota aire (Kota Bet-Rehob nim donggo misig on ai fam welatfag.) Ma re ap homi Dan on en de ap homi etma welatfag on etmano abirangge binggi enowatfagdeg de enobam kota nim, harep fisatfag. It enobam sili etma re o Sidon en oho yit-yatdoho deg ma elanma hagdoho welatfag ma re ap homi Lais on etma ap homi amu on en oho eke let-enebik lebag fug. Airoho debagdeg de it ap Dan enap anyo en o ai nikangge obalma witfagdeg enebe etma welatfag.

²⁹O kota ai unuk de iren amu on it enomba hun Dan at Yakub amloho anyo unuk fene Dan ulug soalfag.

³⁰Kembu ahut ilitdeg iren walug lebag on anyo re, iren o kota ai fam witfagdeg de, iren at Yonatan hun Gersom amloho, hun Musa omba anyo imam welamag ulug unduhuk febag. At Gersom ambiangma on etma re it enunggul unuk Dan enap fahet imam weregman neg de ap homi Israel on og-eneplug o kwenang amu on fam hweik-enebik lebag.

³¹TUHAN Obam Sabo anyo o Silo etma wereg li em de kembu ahut ilit deg Mikha en witfag on anyo re o Lais etmano neg welatfag.