Read Ninia Yali HAKIM-HAKIM 19 Bible Online

HAKIM-HAKIM 19 - Ninia Yali bible

HAKIM-HAKIM 19

¹It Israel enap enowe raja owan wereg fug li re o ap Efraim on enandom fam etma ap Lewi on misig eke welatfag. Wereg lit de aren ohwe o Betlehem on misig eke ohwe hweimohwe hwelebag.

²Famen de hwe anyo en suahal bet[17] debagdeg de nikangge akni obam o Betlehem lebag. Lebagdeg de hwe anyo bigalem ohwan welatfag ma re,

³ap Lewi on anyo ombolim lebag. At lauk kwit de amingming angge misig eke nim eyogmaroho re wam keledai biren nim walug lebag. Lebagdeg etma aik lebag ma re hwele anyo en ap anyo hondoholug de akni akit lebag ma, at hwele anyo akni en ap Lewi on anyo hebagdeg de ahayegdoho webagdeg,

⁴hobam lamihin fug ulug alele webag. Ai fam de at ebe nukoho henahan fam etma wereg lit ik nenggeg, siburu nenggeg, ne hwe hweimohweap debag on anyo nim nohokeg debag.

⁵Nohobagdeg de nukoho ohwaneg angge fam de it enebe hubet-habetdoho laul ulug fik-fouk duruk katfag. Famen de hwele akni anyo en de ap Lewi on anyo fam uruk kwit de, “Hit henebe fobik laluhup en de henebe henomamneroho siburu nalug,” ulug hweag-etfag.

⁶Ma re ap Lewi on anyo hweria atfagdeg hwele anyo akni nim ik nenggeg siburu nenggeg debag famen de airoho debagdeg ap Lewi on anyo laul en ulug inatuk men de hwele akni anyo en alele wauk kwit de mel ebag, “Henahayeg-henahayeg ale etma duluhupdeg henebe suma nohoiek” ulug ebag. Ma re ap Lewi on anyo nukoho misig eke nim etma welatfag.

⁸Nukoho foab angge fam de at anyo hubet-habetdoho inatfagdeg lamin ulug duruk men de hwele anyo akni en uruk kwit de, “Siburu dam nalug fobik lamihin,” ulug hweag-etfag. Ma re it biren etano siburu inim nauk kwit enebe andomog-andomog ale duruk men de mo hweaik lebag.

⁹Ai en de ap Lewi on anyo mel amingming angge mel hweimohweap debag on anyo mel de laul ulug duruk men de, hwele akni anyo en de, “O mun hup atuk ale aik waha anggere ketia mum aikohoreg. Anggere hit henebe suma henahayegdoho welatlug nohoiek. Sono neg de hit henebe hubetdoho inatlug henobam lakoho lahup,” ulug hweag-esebag.

¹⁰Famen de ap Lewi on anyo re etma nohoruk ale erim en de at ebe nim ohwe anyo nim, amingming angge anyo nim owam keledai hweria atuk angge wereg on biren etano nim watfag. Watfagdeg de o hup aikoho duruk li em etano it enebe o Yebus (aire Yerusalem uruk) mu etano aik watfag. Aik watfagdeg de mingming on anyo en akni anyo fam uruk kwit de, “Nayon, nit de ap Yebus on enobam kota ma oma nohweik kukohon,” ulug hweag-etfag.

¹²Famen de akni anyo en onggo uruk kwit de, “Eleg. Nit de ap homi Israel on wereg fug kwe halug de etma bok amul fug. Nit de lauk kamul deg en o Gibea oho, ne o Rama halug oho nohoul anggere re lakohon,” ulug hweag-etfag.

¹⁴Ai fam de it anyo o Yebus kuk fug angge waharuk katfagdeg de it enebe o Gibea ap homi Benyamin on en wilayah etma fam aik watfag hag de mo mundoho obuk ebag.

¹⁵Obuk ebag ma re it enebe etma nohoukoho bok atfagdeg de o kota kwik lebagdeg de o silimu etmano hweria aik lebag. Famen de ap misig en ulug oho ninim nohoukohon ulug hondoko kwelap enepfag fug.

¹⁶Mu re it enebe etano hwerieg weregman de ap sobal on misig eke yabukmu noruk katfagdeg de watfag. Hun aire ebe ap Efraim on enandom fam etmano on famen de o Gibea etma eta li em welatfag ahun. (Ap homi Gibea on etma fomane re Benyamin enap.)

¹⁷Ap sobal on anyo en ap Lewi on anyo o silimu etmano hwerieg ma hebagdeg de hein og-hauk kwit de, “Nare. Hat de keman wahen, ne hebe re kema lamihin en?” ulug hein webag.

¹⁸Hein webag ma aren onggo uruk kwit de, “Nit de ketia o Betlehem Yehuda fam omano en wahereg de nenobam[18] o Efraim on enandom fam omano en dag fil omano laul en welahe. An nebe re etma nahun. Nit de ap o kota o su on en ap misig en oho eke an ninim nohoukohon ulug hondog nenebehesa fug mu welahe.

¹⁹Nit de nenangge nauk on de wereg ma di on su on nenendareg lahe fug. Nenowam keledai fahet de yale enggela mel nauk angge mel wereg, ne an nim an nohwe su mel, an namingming angge mel nauk on fahet de roti mel anggur mel, wereg” ulug hweag-etfag.

²⁰Ai ebag ma ap sobal on anyo en uruk kwit de, “Henenda fituk eleg an den let henepmin angge re o silimu suma noholuhup de fug,” ulug hweag-esebag.

²¹Airoho hweag-esebagdeg de aren it anyo hondog eneplug de at obam lebagdeg de it enowam keledai omano nauk angge on og-esebag. Ne, ap bog omano re eneyog horebagdeg siburu nebag.

²² Airoho duruk kwit enahayegdoho wereg kweleg de fetag-fetag etano ap enabut siag on o kota ai on en o anyo labirok lebagdeg iren o sok hwenambik delduk kwit de, ap sobal on anyo fam de, “Ap on haren hondoholug hobam feseik wahen on ai niren dulen de og-nesakin,” ebag.

²³Ai ebag ma ap sobal on anyo wilibik lebagdeg it fam uruk kwit de, “Nori, airoho re fug! At sure an nambogdeg ma re, hiren duk fug alereg on mun kwasik ale aire nori hiren airoho duruk eleg ulug heng henepuk kahi.

²⁴Fobik an den at hweimohweap dasi on au mel, an nahaloho duhum mel, og-hesamin mu re hiren henebe ahanhan henepuk on ai it fam eleho foluhup. Famen de hiren mun siag ale ai an nambog ai fam debeluhup fug!” ulug hweag-esebag.

²⁵Famen de ap enabut siag on omano re ning-ning lauk en de ap Lewi on de at ohwe hweimohweap debag on anyo domako wilip esebag ma re, iren hwe anyo fam enomamne hasimeg bale fouk fug angge ininim duruk men wauk men neg de o hup sekan debebag.

²⁶O sekan delak deg kweleg etano re hwe anyo watfag famen de, ap sobal anyo obam sokolma at ahun nohoruk katfag ma etano aik watfagdeg, il furuk dung debag ma weregman neg mo lahaik watfag man ohore at ebe we etano neg welatfag.

²⁷Hubet anyo salim de at ahun oluk atfagdeg laul en ulug sok hut hauk men de hwe hweimohweap debag on anyo enggik de sok seneg lit sokolma etano yinggig latfag.

²⁸Aireg latfag ma re aren hwe anyo fam de, “Nit lakohon de, inamin” ulug hweag-etfag. Famen de hwe anyo ebe mundoho waratfagdeg atlug de ele onggo ebag fug. Mu re aren hwe anyo hamboko re keledai emberimmu lahabe febagdeg enobam wamukoho watfag.

²⁹ Olma aik watfagdeg de olma kwebagdeg de fili okore ohwe wareg anyo bal heg de lenggareg nesanggo en debebag. Airoho debelug de aren lenggareg anyo ap homi enunggul unuk Israel on nesanggo en anyo fam, unggul unuk misig on fam de lenggareg misig heg, mondotfag.

³⁰Airoho debag ma re debag ale ai fahet ap en inil hebag on en de “Ap homi Israel on o Mesir en wilibik wahausa huli en de diroho eke atsi ale eke wereg fug. Anggere nit de bik-bok amuldeg welamul fug. Niren oho duhuk ale fahet wene kabogdoho marukohon lahe!” ulug ebag.