Read Ninia Yali HAKIM-HAKIM 2 Bible Online

HAKIM-HAKIM 2 - Ninia Yali bible

HAKIM-HAKIM 2

¹Malaikat TUHAN de o Gilgal en o Bokhim lebagdeg, wene ap Israel fam diroho hweag esebag, “An den hit mundoho o Mesir en wilibi henobaharihik deg, og-heneplug o An den it henembu-henomba fam sali wat-esauihik mu su waharihik. An den uruk kwit, Sali hit nim An nim watuk kahe on aure bal-aruhu fug irihik.

² Ai fam de hiren ap homi o kwenang suma fam wereg on nim, hinim wene seberuhup fug. Iren waroho yaldukmu mezbah etma mundoho dukom esahup, ulug irihik. Famen de An den hit dukwag ulug melale henobaharihik ale anyo duruhup fug. Hiren de ahamdoho amu on dil lauk kahep!

³Aireg ma re ketia henesanggo holiek! Hiren ap homi suma on nim weim yapukmu re An den it muko wilip enebuhuk fug. It de hit heneselei on atlug durukmu hit it fam ilag atlug, hit de it enanggembu dewa-dewa apne wauk kamuhup,” ulug hweag-esebag.

⁴At malaikat anyo en airoho hweag-esebag ma re ap homi Israel on anyo abirangge oba humon yatfag.

⁵Ai fam de obale etare unuk Bokhim[5] soalfag. Airoho debagdeg de obale etano fam ap homi Israel on en TUHAN og-etfag.

⁶Yosua en de ap homi lowag ulug monde fesebag ma, it anyo kwenang it enangge atfag on etmano fene welamukoho lebag.

⁷Yosua ebe oluk wereg li em de, ap homi Israel on TUHAN obahet neg duruk katfag. Ne, Yosua waratfag ma oho it ap enowesi TUHAN en ap homi Israel on fahet along on durukmu inil hebag on etmano en melal-enepuk li em de it Israel on de TUHAN obahet neg duruk katfag.

⁸Yosua hun Nun amlohoTUHAN amingming angge anyore at ebe umur 110 tahun wereg li waratfag.

⁹ At ebere anggwenang onggwareg en on fam, o Timnat-Serah ap Efraim on enandom fam en Dom Gaas en emberim utara fil etma salfag.

¹⁰Ai en de it ap eta li em ambine on etmano oho mundoho waratfag. Ne, it fobik endag-atfag on etma re TUHAN en ap homi enunggul unuk Israel on enobahet debag ale etmano hebag fug mu re, TUHAN enapeleg latfag.

¹¹Ai en Israel on siag TUHAN fam debag. Iren enambu-enomba enakni TUHAN Allah, At Allah it o Mesir en og-eneplug wilibik watfag on anyo mot-duruk katfag fug. Iren de kembu Baal mel Asytoret mel, dewa amu on ap homi enunggul unuk amu on maseroho wereg on etman apne wauk on etmano nim mot-duruk ale indip debag. Ai fam de TUHAN it fam olok atfagdeg ap enolok on en huk eneplug herag enebukwag ulug fotog-esebag. It Israel on anyo re ap enaselei on enaluluk kwe maseroho wereg on etmano inim enolohotma am fug ale atuk katfag.

¹⁵Iren li hundig-hundig weim yabik laukmu re TUHAN en hweag-esebag ale higitdoho it fil il eneplug duruk katfag. Ai fam de iren anggin anggoloroho hauk katfag.

¹⁶Hundig-hundig ap enolok on en huk eneplug it sen enepuk on enenggik men fiselaroho wilibi fesoukwag ulug, TUHAN en enowesi melal-eneplug enemururu roho duruk on og-esauk katfag.

¹⁷Famen de iren enowesi melal-enepuk on etmano enele hole fesouk fug angge neg duruk katfag. Iren de kembu ilah amu on etmano fam apne wauk kwit de, TUHAN fam dipdoho duk fug angge neg duruk katfag. It enambu-enombasi en TUHAN awene melaleg fam holoho duruk katfag hagdoho it enobabut wal heheg duruk katfag fug.

¹⁸At TUHAN en lahe it enunggul unuk Israel on fam melal-enepuk on eke og-esalug halug de, TUHAN en ap melal-enepuk on anyo hundig-handig let duruk katfag. Ne, it enowesi melal-enepuk on anyo oluk wereg li em de, TUHAN en de it Israel on eneselei on fam en loloho wilibi feseruk neg katfag. It Israel on lahe sebel neg esaukmu nenek-yoba ruruk on Aren hol halug de it enelaheg esauk katfag.

¹⁹Famen de enowe melal-enepuk on anyo waratuk halug de, it ap homi anyo enobabut de ap atam enoluk welatfag on de maben hag famen de it neg de enabut nong-hongdoho duruk katfag. Iren de kembu ilah amu on obahet dik laheg, ilah apne weheg, duruk katfag. Iren de enobabut siag on anyo fam nikangge sombandoho lalug de, it enobabut aham duruk katfag fug.

²⁰Ai fam de TUHAN en it ap homi Israel on fam mun olok atfagdeg ele uruk kwit de, “An den de ap homi enunggul unuk su on enambu-enombasi fam hweag-esauk kwit sali An nim it nim wat-wat atuhuk on anyo bug-bagdoho seneg lamag ulug hweag-esauihik. Famen de ap homi sure sali wareg anyo fotog-esalug de; iren An nawene melaleg sahaloho foruk.

²¹At Yosua waratsi huli en de ap homi enunggul unuk ke on o kwenang su fam wereg on etma An den muko wilibi feseruk ale re mun nerim.

²²It ap homi Israel on au en, it enambu-enombasi mel en An nawene melaleg wereg aleroho duruk katswa hag duruk kamlusa a, eleg a, ulug An noluk amagdoho re, An den ap homi enunggul unuk amu on ai fam it Israel on au enabut wal-esahuk,” ulug ebag.

²³Ai fam de TUHAN en ap homi etma on fam en Yosua fil alongap debebag fug. Ite ap homi etma kwenang ai fam welamag ulug TUHAN en embesebag, ne folo-foloroho muko wilip enepfag fug.