Read Ninia Yali HAKIM-HAKIM 20 Bible Online

HAKIM-HAKIM 20 - Ninia Yali bible

HAKIM-HAKIM 20

¹Ai fam de ap homi Israel on o Dan utara fil en de o Bersyeba selatan fam. Ne, o Gilead mo lahaik waharuk fil en mel de yonggo fesebag on anyo holoho watfag. Watfagdeg de it enebe o Mizpa TUHAN olohotma etmano misigmu seberulug kabog-debag.

²It kabog-debag on etma enebe abirangge re 400.000 en angge ap sehen seneg on eneyog fam lauk katfag enap kabog-debag. Ne, it enunggul unuk enunggul unuk domog omano en de enowesi melal-enepuk on ohore etma kabog-dik watfag.

³It airoho kabog-duruk kweleg de enunggul unuk Benyamin on en hol-hauk men de it enunggul unuk Israel on fomane omanore o Mizpa kabog-duruk ebag. Ma re it Israel enap anyo en de ap Lewi on ohwe watfag ahun anyo fam hein og-hauk kwit de, “Mun kwasikmireg ale aire keroho atsi, nit nenobam dindil-nesakin!” ulug ebag ma, ap Lewi on anyo en onggo uruk kwit de, “An nim an nohwe hweimohweap dauihik on anyo mel de o Gibea ap Benyamin on en wilayah fam etmano aik waharuhukdeg de etma nohoruhuk.

⁴

⁵Ai en de ap Gibea on etma o hup anggo an hera nabukoho wahausareg de iren an nebe nowarukoho re o an kwirihik deg nohoruk katihik obam anyo laborik wahausa, famen de fobik de an nohwe hweimohweap dauihik on anyo enomamne hasimeg inim seberuswa ma re ebe waratsi.

⁶Mu re an den at ebe wareg anyo wauihikdeg de bal-bal debelug nit nenunggul unuk nesanggo en anyo fam, unggul unuk misig fahet de baleg misig heg mondotihik. An den airoho dirihik aire, ap Gibeon enap aire iren nit ap homi Israel on nenesahalimu en mun kwasik ale duswa ma dirihik.

⁷Hit dia welahep on eiyare henebe Israel henap deg lahepma re ketia hiren behep ale oho eke heng henepuk kahi!” ulug hweag-esebag.

⁸Ai ebag ma re ap etma kabogdeg welatfag on anyo enebe ambine inatfagdeg enele uruk kwit de, “Nit nenebe abirangge re nenobam olma ulug oho, ne nenobam saboma ulug oho eke laul fug.

⁹Niren dul alere diroho dul: Niren de ap Gibea enap ai enowarik lalusa on de sa-sa ulug nenenggik wal hauldeg de,

¹⁰ap Israel on ap neg enebe sepersepuluh en de it weim yabik lalusa on fahet siburu fik-fouk dulusa. Ne, fomane re it Gibea enap en nit nenesahalimu en mun kwasik ale duswa on ai fahet o Gibea enowarik kulug unggum enobam og-esaluhup,” ulug ebag.

¹¹Ai ebagdeg it Israel enap en airoho enebe misig atlug Gibea enap enowarik lebag.

¹²It ap homi Israel on en ap wene walug it wilayah Benyamin on omano fam mondotuk kwit, “Hit henobam wene kwasik on de nangginig on aha?

¹³Nit ap homi Israel on nenenggelegman wene kwasik on atsi ale ai elehap dul en de ap Gibea enebut siag on etma niren enowarukohon nit nenenggikmu og-nesakiek,” ulug wene mondotfag. Famen de it Benyamin on en de it Israel on fomane en ebag ale anyo holuk fug angge sahaloho embesebag.

¹⁴Airoho embeselug de it wilayah Benyamin apma wereg on etma, Israel enap foma nim weim yabukoho re o Gibea kabog-dik watfag.

¹⁵Nukoho ai salim de it enobam kota omano en de ap sehen seneg enap enebe 26.000 en kabog-debesebag. Eta wereg kweleg it Gibea enonggwareg on en neg de ap memereg on enebe 700 en momale fesebag. Ap abirangge etare enenggik hware enap neg, helep anggen kwelabe folug hwik dik laukmu re dorangge lohon dahandoho lauk katfag fug enap.

¹⁶

¹⁷Ne, it ap Israel enap fomane enibil de ap sehen seneg enap milil-melal deg enap neg enebe 400.000 en kabog-debag.

¹⁸Tentara it Israel on en omano re o Betel wene kabog-durukmu omano lebagdeg de Allah hein og-hauk kwit, “TUHAN nenakni, nit nenesahalimu en de it enunggul unuk ke on dam ap Benyamin on ai enowarik lalusa?” ulug hein webag ma re, TUHAN en onggo uruk kwit de, “Enunggul unuk Yehuda on dam” ebag.

¹⁹Ai ebag ma re likia hubetdoho re it anyo lebagdeg de o Gibea o sabo salik lebag.

²⁰Lebagdeg de it anyo ap weim yapuk on anyo o kota anyo alukwema atfagdeg de weim yabik kwebag.

²¹Ma re it Benyamin enap en weim yapuk enap anyo re it enebe wilipuk kwit de, it Israel enap weim yapuk katfag on anyo nim weim yapfag famen de nukoho anyo salim de ap Israel on enebe 22.000 en enowatfag.

²²It enalong eleg atfag ai fam de it Israel enap anyo wene kabog-durukmu omano lebagdeg oba TUHAN fam yatuk men neg de o hup atfag. Iren TUHAN hein og-hauk kwit de, “TUHAN nenakni, niren nit nenori Benyamin enap ai nim nikangge ininim weim yabik laul ane?” ulug ebag. Ai ebag ma TUHAN en onggore, “Yuo, lakiek!” ulug hweag-esebag. Ai fam de it Israel enap weim yapuk on anyo nikangge enahayeg atfagdeg iren enautsi sehen seneg on anyo atam debag hagdoho esan lohwalfag.

²³

²⁴Airoho dulug de enenggik bireneg angge fam de ap Benyamin on anyo nim weim yabik lebag.

²⁵Ne, biren angge ai fam de it Benyamin enap dog sinalik wilipuk kwit de it Israel enap sehen seneg on, ap enebe melal-melal deg on neg enebe 18.000 en enowatfag.

²⁶Ai fam de it Israel enap anyo nikangge o Betel lebagdeg TUHAN fam oba yarik lebag. Etman de it enebe siburu enambilik hweang neg weregman de o hup atfag. Ne, iren wam TUHAN en fanoap nenobahaukwag ulug waroho yalduk on mel wam TUHAN inim seberul ulug waroho og-utuk on mel, og-etfag.

²⁷Eta li em Peti Sali wareg anyo re o Betel wereg ma re at Pinehas hun Eleazar amloho, Harun omba anyo imam welatfag. Ma re it Israel enap en TUHAN fam hein og-hauk kwit de, “TUHAN nenakni, niren nit nenori Benyamin on ai fam dog sinalik laul a ite niren it ninim weim yabik lauk ale ai embesoul a?” ulug hein webag. Ma TUHAN en de, “It enobam dog sinalik lakiek! Sono re it ai fam en An den hit henalongap henobahakuk,” ulug hweag-esebag.

²⁸

²⁹Airoho TUHAN en hweag-esauk ale enesanggo holfagdeg it Israel enap anyo en de tentara iren on omano it enebe o Gibea horogdoho en haroho kwe omano feseil lebag.

³⁰Airoho debelug nukoho henahaneg angge re iren ap Benyamin enap sehen seneg on iren atam debag anyo hagdoho enalukwe o Gibea fil debelug weim sinalfag.

³¹Ne, it Benyamin enap en ohore o kota en wilibik waharuk boukwag en de hou walug wilibik watfag. Wilibik watfagdeg atam debag ale hagdoho re iren ap Israel on o kota dag fil kwenang healegma kobokwe o Betel laheg, o Gibea laheg durukmu etma ap enebe 30 en welatfag.

³²Ai fam it Benyamin enap en boruk kwit, “Atam duruhuk hagdoho it Israel on enalong elehapdoho fehe,” bebag. Famen de it Israel enap en wene matuk kwit, ‘Nit de Benyamin enap ai yomaroho re o kota fam etma yatdoho kwe lohon wereg ma etma hihil amul,’ ebag.

³³Ai ebagdeg de it Israel on anyo hihil atlug de o Bal-Tamar etmano esan lohwalduk li re ap iron o Gibea horog kwe fesebag on omano o kota dag fil en folo-folo wilibik watfag.

³⁴It etma re ap Israel enap abirangge en ap memereg on neg enebe seberoho re 10.000 en angge wilibik watfag. Ne, it ap 10.000 en anyo en de dog o Gibea sinalik kurukmu re weim orohalenggen siagma yapfag. It Benyamin on de nit fobik nenalong eleg amul ulug de bebag fug.

³⁵TUHAN en it ap Israel on anyo it ap Benyamin on fam en enalonge fesebag ma re, nukoho ai salim ap Israel on en de tentara Benyamin on enebe 25.100 en enowatfag.

³⁶Ai fam neg de it Benyamin enap anyo en de nit nenalong eleg ahe ulug enoluk atfag. It Israel enap en esan ebe on anyo re it enautsi o Gibea horog kwe saleg on anyo fam enenda hembisig lit de it Benyamin fam heiye lebag.

³⁷Ne, it ap saleg latfag on anyo re folo-foloroho o Gibea housalik watfagdeg de, it enebe o kota ilonggoma omano di kwe su kwe dak ware febagdeg ap homi etma on mundoho enowatfag.

³⁸Famen de owanam omano enele seberoho matuk kwit, O kota ai bulmen hobu mondotlug laharuk halug de,

³⁹ap esan ebe on lohwaleg ambol fil dag ik lauk on anyo re nikangge sombandoho waharuk kwit de neneselei on ai enowatil manu, ebagdeg, eta li em it Benyamin on en de it Israel on enebe ap 30 en enowatfagdeg iren boruk kwit de atam duruhuk hagdoho ap homi Israel on enalong elehapdoho fesehe bebag.

⁴⁰Famen de fetagdoho o kota Gibea bulmu etmano en hobu mondotlug lahabag ma re it enambolhan fu hauk men de it enobam kota anyo han naukmu hebagdeg de youk lebag.

⁴¹Ne, etano li em neg ap Israel on esan ebe on anyo sombandoho waharuk kwit de Benyamin enap fam hou wilibik watfag ma re, it Benyamin enap anyo en de nit mundoho nenalong eleg ahe ulug de enenda fitfag.

⁴²Ai fam de it anyo ap Israel on fam en heiye re o lei fil etma lebag famen de it enebe lil atlug wilibik la fug ale atfag. It enebere ap Israel enap en esan ebe on waharuk on dulug, ne esan eke o kota fil en waharuk on dulug bul etano nobong-hobong angge duruk katfag. It Benyamin enap fil de mun mabenap debesebag ma anggolo ngogdoho hebag.

⁴³Ap Israel on en de it sik eneplug mug eneplug lebagdeg de o Gibea en mo lahaik waharuk fil obale misigmu etma huli lebag. Ne, iren mug-eneplug lauk kwit etma re,

⁴⁴ap Benyamin enap en weim yapuk enap enebe wil-wal deg enap enebe re 18.000 en enowatfag.

⁴⁵Ne, tentara Benyamin enap fomane re sombandoho o lei kwe en de o helep ungul Rimon fam etmano lebag. Lebagman de ap enebe 5.000 en angge it enesahalimu etman de kwe fam lauk kweleg etma enowatfag. Ne, fomane re mug-eneplug de o Gideom[19] fam etma lebag. Ap eta on de ap enebe 2.000 en eke enowatfag.

⁴⁶Aireg ma re tentara Benyamin on nukoho ai salim enowatfag on de enebe 25.000 en angge. Ap etare sehen seneg enap enebe re neben-heben enap neg enowatfag.

⁴⁷Famen de it enesahalimu etan ap foma o lei kwe en o Rimon helep unggul kwe lebag on etma lil atlug wilipfag on de enebe 600 en. It enebe re o Rimon etma bigalem ohwan welatfag.

⁴⁸Ai en it Israel enap nikangge sombandoho lauk kwit de, ap Benyamin on omano fam dog sinalik lebagdeg de, Benyamin enap ando welatfag on etano ap et, homi et, omalik et, enowam et mundoho enowatfag. O etman kota omano re abirangge han yalfag.