Read Ninia Yali HAKIM-HAKIM 21 Bible Online

HAKIM-HAKIM 21 - Ninia Yali bible

HAKIM-HAKIM 21

¹It ap Israel enap o Mizpa kabog-debagdeg iren TUHAN il hanim enele unduhuk foruk kwit de, Niron ap misig eke en oho re nenahwelani it misig ulug oho eke it Benyamin on enohwesi amuhup fug, ulug ebag.

²Ai ebagdeg en de iren o Betel lebagdeg de Allah olohotma etmano en enenda fu en enenda hesilduk kwit de hwerieg welatfag. Airoho wereg lit iren oba yatuk men neg hup atfag ma enele uruk kwit,

³TUHAN Allah nit Israel on nenakni, nunggwelug au airoho aha? It enunggul unuk Benyamin on aire nit nenunggul unuk on omano en unggul unuk misig on eke famen mun eleg am ale atil lauk au! ulug oba yatfag.

⁴Airoho debagdeg de likia salim de hubet-habetdoho ap homi Israel on en de mezbah wiri folug de TUHAN obahet wam waroho yalduk on nim, TUHAN inim seberul ulug on nim waroho og-etfag.

⁵Ai en de it enunggul unuk Israel on anyo enesahalimu omano en it enunggul unuk omano en eke atam o Mizpa TUHAN wereg ma laukmu omano lausa fug on eke wereg ane ulug ayo witfag. (Eta li em iren hombuk balduk kwit, Ap o Mizpa lahup ulug wene wereg on ai muko lauk eleg halug de ebe binggi waruhup, ebag.)

⁶It ap homi Benyamin on en de it enori Israel on fahet enendarebagdeg de iren uruk kwit de, “Yoho su salim nit nenunggul unuk Israel on anyo en unggul unuk misig on eke belabe fehe.

⁷Niren TUHAN fam hombuk baloho uruk kwit, Nit nenahwelani re it Benyamin on enohwesi amuhup fug, ulug uruhukmu re it Benyamin on ando wereg on eiya enohwesi welamag ulug de niren keroho dehe ha alereg?” ebag.

⁸Ma re iren ap inindip misig on eke it enunggul unuk Israel on fam en o Mizpa kabog-dik laukmu anyo lausa fug on eke wereg a, eleg a, ulug ka balfag man de ap Yabes enap o Gilead on etmano neg de ap misig ulug oho eke o Mizpa lebag fug deg ma hweag-enepfag.

⁹Aire iren ininuk baleg anyo kumuril lauk men de etma ap Yabes on en ap misig on unuk ulug oho eke welatfag fug.

¹⁰Ai fam de ap homi o Betel kabog-debag on etmano en de ap enambong se on neg enebe 12.000 en angge ap homi Yabes on ap inim homi inim enomaliki et enowarukwag ulug mon-enebik lebag.

¹¹It ai mingming enepuk kwit de, ap on enebe abirangge nim, homi ap ahap enoluk on nim, mundoho etma enowariyug, ebag.

¹²Ma re it ap homi Yabes welatfag on etma enesahalimu en de hwelani duhum ap ahap enapeleg on enebe 400 en wereg ma esebag. Esebagdeg de iren hwelani omano og-eneplug de o Silo aire o Kanaan kwenang fam etma o sabo salegma omano og-eneplug lebag.

¹³Ai en de ap homi Israel on mundoho en de ap homi Benyamin on o Rimon helep unggul kwe wereg on omano fam ap yonggo angge mon-enepuk kwit de, “Nininim seberukohon,” ulug mondotfag.

¹⁴Ai fam de ap homi Benyamin on omano sombandoho watfag ma re it ap homi Israel on en de hwelani duhum o Yabes on enowatfag fug on etmano og-esebag. Famen de hwelani etare it Benyamin enap nim enebe ilitdoho atfag fug.

¹⁵Ne, TUHAN en de it enunggul unuk Israel enap enebe sebereg wereg anyo minggiruk hag ale debesimu ulug it Israel enap en de Benyamin on fam enenda enepfag.

¹⁶Ai fam de it ap yain-kain neg o Betel kabog-debagdeg uruk kwit de, “Enunggul unuk Benyamin on enesahlimu re homi mun wereg fug. Famen de niren hombuk baloho uruk kwit, Ap enemu domog en enahwelani ap enahunsi Benyamin on og-enebuhup fug, ulug uruhuk. Mu re niren keroho dehe ha alereg; Nit de nenahwelani fam henahunsi ap iron hwelakiek ulug hweag-esehe ha fug alereg. Anggere it ando eiya oho enohwesi welamag ulug de keroho dehe ha alereg? Nit Israel nenap nenunggul unuk nesanggo en etano en unggul unuk misig on eke longgoreg laruhu aire fug anggere, it enunggul unuk Benyamin on au oho ap enambiangma on wereg ma enanggwenang abirangge sen dalug lamagdoho re niren kwe herarukohon lahe,” ulug ebag.

¹⁹Ai ebagdeg de iren uruk kwit de, “Diroho. Kwe misig wereg on de, TUHAN fahet o Silo tahun hundig-hundig kabog-duruk on anyo fam en duk alereg,” ebagdeg de iren uruk kwit de, (o Silo au en il apma fil de o kota Betel ai wereg, ne mo obuk uruk fil de kwe o Betel en o Sikhem lauk on wereg ne il emberim utara fil de o kota Lebona wereg.)

²⁰Ebagdeg de it ap kaindeg o Betel kabog-durukmu kabogdeg latfag on omano ap Benyamin on ando etano fam uruk kwit de, “Hit de o Silo anggur yabuk yaho kwe etma lalug de,

²¹henebe heraho lit etma kahaleg welamuk. Hit heraho lit weregman hwelani duhum o Silo on TUHAN fahet tahun hundig-hundig ebetuk on ai fam yungguloho wilibik wamukohoreg. Ne, it enebe wilibik waharuk halug aire hit oho anggur yabuk kwe etman wilibik manu. Wilibik watlug de hit henemu domog en de hwelani duhum misig heg eke baloho hwelalug de hit henohwesiap dakohore hit henobam wilayah hiren on fam lakiyug.

²²Hwelalug laukmu hwele ai akni en oho ne erekwi en oho at fahet hit[20] henobam wene feik waharuk halug, hiren uruk kwit de, It au nit nim welamag ulug embeseluhup en heng henepuk kahe. Nit de weim fam en deloho og-enepuhuk fug. Ne, hiren nit og-nesauhup fug mu re, hiren wene sali dahandoho duruhup fug. Anggere hit de siag duruhup fug, ulug hweag-esahup,” ebag.

²³Ai ebag ma re ap Benyamin on omano re it enobam hweag-esebag ale omanoroho neg debag. Iren de enemu domog hwelani duhum o Silo yunggulduk on omano enesahalimu en bal-dalug de it enobam wilayah fam omano lebagdeg de o kota omano nikangge witfagdeg etma yugdoho welatfag.

²⁴Ne, it Israel enap amu on omano ohore lebagdeg de it enobam wilayah it enunggul unuk mel unggul unuk agdoho deg ale enemu domog lebag.

²⁵ Eta li em de it Israel on wereg ma ap raja welatfag fug mu re ap homi enebe domog en de it enendaman fano boruk ale omano domog duruk katfag.