Read Ninia Yali HAKIM-HAKIM 3 Bible Online

HAKIM-HAKIM 3 - Ninia Yali bible

HAKIM-HAKIM 3

¹Ap homi Israel on o Kanaan fam etman weim yapuk ale enapeleg on etma enabut wal-esamin ulug de TUHAN en ap enunggul unuk nunggwe en hagdoho re o kwenang ai fam embesebag.

²TUHAN en airoho debag aire it Israel on fam en ap endag-atuk kwit ket salduk on omano weim yapuk ale melal-enepmin ulug debag, ne ebe yugdoho re it weim ininim yapfag fug on enobahet debag.

³Ap enunggul unuk kwenang ai fam welatfag on etma re: It enunggul unuk Filistin on foaben etano enesahalimu welatfag on, unggul unuk Kanaan on mel, Sidon on mel, unggul unuk Hewi on dom Libanon fene wereg latfag on mel, Dom Baal-Hermon fam en de kwe o Hamat lauk on ai fam huli etma wereg on mel welatfag.

⁴It ai etma welatfag on aire it enunggul unuk Israel on fahet enabut bal angge hagdoho welatfag. Airoho deg ai fam de ap homi Israel on ai en de wene melaleg TUHAN en Musa fene it enambu-enombasi og-esebag on anyo higitdoho duruk a, eleg a, ulug eneg atuk katfag.

⁵Ai fam de ap Kanaan on, Het on, Amori on, Feris, Hewi on, Yebus on de kwenang ai fam ap homi Israel on nim seberoho yugdoho welatfag.

⁶Ap homi Israel on en de it enunggul unuk etma on mel nanggeleg-hanggeleg enohwesi, enahunsi og-og atuk kwit, de it inim kembu dewa omano apne wauk katfag.

⁷Ap homi Israel on en de it enakni TUHAN, Allah anyo fam siag duruk katfag. Iren de At obam enepeleg atlug de kembu Baal mel, Asyera mel fam apne wauk katfag.

⁸Ai fam de TUHAN en ap homi Israel on fam mun olok atfagdeg de, ap homi Israel on ai at Raja Kusyan-Risyataim, o Mesopotamia ahun ai en enalong elehapdoho fesoukwag ulug lin-esebag. Lin esebag ma re raja ai en tahun ligin en fam it sebeloho fahat enusug latfag.

⁹Ai en de ap homi Israel on en de, TUHAN en let-nenebin ulug heng ebag ma, it fiselaroho fesoukwag ulug TUHAN en Otniel og-esebag. (Otniel aire Kaleb aut hun Kenas anyo amloho.)

¹⁰TUHAN Aheime en de Otniel melaldukmu atlug de at Otniel it Israel enap melal-enepuk on atfag. Aren de dog yabik lebagman de, ap raja Mesopotamia ahun ai fam en TUHAN en at alongap debebag.

¹¹Ai fam de 40 tahun aire o kwenang anyo fam weim abug eleg angge fano liol atfag. Ai en fobik en Otniel ebe waratfag.

¹²Ap homi Israel on en de nikangge siag debag ma, TUHAN en ap raja Moab on hun Eglon anyo it Israel on fam en mun along amag ulug debebag.

¹³Raja Eglon ai en de ap enunggul unuk Amon enap nim, Amalek enap nim seberebagdeg de it Israel on enalong elehapdoho feselug de o Yerikho, e kurma indip obam ai sebelfag.

¹⁴Sebelfagdeg 18 tahun aire ap Eglon ai en it Israel on sebel-enusug welatfag.

¹⁵Famen de it Israel on en let nenebin ulug TUHAN fam hwirebag ma, it feselaroho fesoukwag ulug Aren Ehud og-esebag. Ehud aire enggik hware ahun; ne at ebere hun Gera amloho unggul unuk Benyamin on, ne aren de it Israel on en raja fahet onggo foruk on etmano walug hun Eglon anyo og-irik lauk katfag.

¹⁶Nukoho misig salim de at Ehud en de fili karog eke aeg foma-foma maho angge ambiang yatdeg alere setengah meter deg angge hilinggebag. Hilinggebagdeg de karog anyo owagma enggik bekit fil asum wandeg on en saloho kwelap hebag.

¹⁷Airoho debelug de ap homi Israel on en Raja Eglon fahet onggo febag angge anyo walug lebag. Raja aire asei hum ahun welatfag.

¹⁸Onggo febag angge etmano og-etfagdeg, Ehud en ap uang emas on harulug lebag on etmano lowag ulug hweag-esebag.

¹⁹Famen de at Ehud neg de o Gilgal horogma helep hwesesengge oho on fam etano aik lebagdeg en de etano bok atlug de sombandoho nikangge hun Eglon akit watfag. Eta li em de at Eglon anyo re obam ambe mun sako ebema, at obam bumbuk fam en de huli emberimmu on anyo fam wereg ma watfag. Watfagdeg at Ehud en hun Eglon fam uruk kwit de, “Nakni kain hanggiluk welahen on! An hamingming angge en de nakni hat hobahet wene ling-long ale on eke walug wahi,” ebag. Ai ebag ma raja en uruk kwit de, “Bok welamin,” ebagdeg aren de at amingming angge etmano we it Ehud nim neg enemu enobahalug wilibik lowag ulug hweag-esebag. Ai en at Ehud anyo raja hwerieg wereg on anyo aluluk hopdoho aik lebagdeg, ele uruk kwit, “Allah en wene nakni hat hobahet eheik on eke wereg!” ebag. Airoho urukmu holfagdeg raja anyo feiyalug inatfag.

²¹Etano bekit at Ehud en de enggarog anyo enggik hware fil en de owagma bekit fil lilisanale re hun raja anyo ahum bul daloho dung debebag. Dale febag ma re karog anyo aeg abirangge re raja anyo asei elma etmano kwebagdeg de ombo senetuk on fam huli-hulimu debebag ma re, karog ebe fologdoho re ambol fil wilibik lebag. Wilibik lebag ma Ehud en karog anyo embeselug,

²³wilibik lebagdeg de o ambe anyo sok kelog debelug,

²⁴at ebe lebag. Airoho debebag ma re at raja amingming angge etmano watfagdeg kumu hauk men de sok ambe anyo fam mun kelog deg ma hebagdeg de, iren boruk kwit de, raja ebe o ilonggoma wereg famen de amiema laha ane bebag.

²⁵It nangno hauk kwit anunuroho welatfagdeg, at raja anyo en sok husuruk eleg en, enenda nong-hong ebag ma re kunci webagdeg de sok anyo husebag. Hut hauk men de it enowe raja anyo re hweniema waroho lenggag deg latfag.

²⁶It nangno hauk kwit wereg kweleg omano re at Ehud anyo re helep hwesesengge oho kwe anyo en de o Seira mun heiye lebag.

²⁷At anyo it Efraim on enandom fam etmano aik lebagdeg etano folo-folo re, ap Israel on weim lahabik wamag ulug trompet furebag. It anyo watfag ma re aren it hondog esalug o dom fam etmano en wambik watfag.

²⁸Wambik watfagdeg aren it fam uruk kwit, “An nombolim manik, TUHAN en hit heneselei on ap Moab on anyo hit henobahet enalong elehapdoho feheik,” ulug hweag-esebag. Ai ebag ma re it Israel on anyo at Ehud en helaheroho re domman wambik watfagdeg, iren de ap Moab on en Ik Yordan dahaloho nindig-atuk mu anyo sebelfag. It eneselei on anyo re ap misig ulug oho eke lil atlug nindig-amag ulug embesebag fug.

²⁹Weim yapfag on ai fam de ap Moab enap sehen seneg on mun ebe on neg de enebe 10.000 en enowatfag; misig eke lil atlug wilip atfag fug.

³⁰Nukoho ai salim de Israel enap fam en Moab on enalong eleg atfag ma, kwenang ai fam 80 tahun aire weim abog eleg angge lioloho welatfag.

³¹Enowe melal-enepuk on ombolim inatfag on de Samgar hun Anat amloho ai. Aren oho re amurururoho debagdeg de it Israel enap fiselaroho fesebag. Domuk wam lembu sil-enepil lauk katfag angge fam de, aren ap Filistin on enebe 600 en enowatfag.