Read Ninia Yali HAKIM-HAKIM 4 Bible Online

HAKIM-HAKIM 4 - Ninia Yali bible

HAKIM-HAKIM 4

¹Ehud mundoho waratfag ma enunggul unuk Israel on TUHAN il hanim nika angge siag duruk katfag.

²Ai duruk katfag ma TUHAN en Yabin raja Kanaan on obam bumbuk de o kota Hazor welatfag on anyo en sebele fesoukwag ulug embesebag. Autsi weim yapuk on enowe panglima aren on de hun Sisera o Haroset-Hagoyim welatfag ahun ai.

³Hun Yabin ai en kereta dog yapuk on besi on fam wirig angge re 900 en welatfag. Aren de 20 tahun fam mun olok hasimeg ap homi Israel on sebel enusug latfag. Ai en it Israel on en de TUHAN en let nenebukwag ulug hwirebag.

⁴Eta li em it Israel on melal-enepuk katfag on de nabi hwe angge eke unuk de Debora, hun Labidot ohwe ai.

⁵Debora ebe eitogdoho re ap homi Efraim on endandom fam o Rama en dulug Betel en dulug etma e kurma indipmu hwerieg latfag. At etma wereg ma re it Israel on de aren komo ale hweag-nesowag ulug akit etma waharuk katfag.

⁶Nukoho eke salim de aren hun Barak, Abinoam amloho o kota Kedes it Naftali on enanggwenang fam wereg ma wol-dik lowag ulug mingming enepfag. Airoho ebagdeg aren Barak fam uruk kwit, “Ap homi Israel on enakni TUHAN, Allah anyo en awene melaleg su, Ap on neg it enunggul unuk Naftali on mel Zebulon on mel enebe 10.000 en kabog esalug og-eneplug de Dom Tabor fam manu.

⁷Ne, An den at Sisera hun Yabin autsi sehen foroho enowe panglima autsi tentara mel kereta dog yapuk on mel de hat hinim weim yabik lowag ulug debeseminmu it o ik Kison ikma wamukohoreg. Famen weim ai yapuk on fam de An den hat halonge hobahamin, eheik” ulug hweag-etfag.

⁸Ai ebag ma Barak en Debora fam uruk kwit de, “Haroho lamihin halug de an nim lamin! Famen de hat lamihin fug halug, an oho lauk ale nerim,” ebag.

⁹Ai ebag ma Debora en uruk kwit, “Fano, an oho lamin! Famen de furebeiyug, hat halongap hobahakup fug. Homi fene en TUHAN en at Sisera along elehapdoho fohu,” ulug ebag. Ai ebag ma re Debora nim Barak nim seberoho re o Kedes lebag.

¹⁰Ne, Barak en ap unggul unuk Naftali on mel Zebulon on mel lohwal esebagdeg o Kedes lebag. It Barak nim Debora nim laukmu ap ininim lebag on de enebe 10.000 en lebag.

¹¹Eta li em de hun Heber aire Keni ahun, ap at unggul unuk on fam en amu en atfagdeg welatfag. (Keni enap aire at Musa ombarik Hobab anyo ambiangman ondoho on.) At Heber de lebagdeg o Zaanaim, o Kedes en de horogdoho, e batie horogma etma obam sabo sale febagdeg welatfag.

¹²At Sisera en hol-hauk men de Barak de Dom Tabor fam laha urukmu holfagdeg folo-folo etano neg,

¹³angge kereta weim yapuk on besi fam wirig angge 900 en etano andog halug de, autsi dog yapuk enap nim seberoho re, o Haroset-Hagoyim en og-eneplug de o Ik Kison ikma lebag.

¹⁴Ai en de at Debora en Barak fam uruk kwit de, “Hakni TUHAN en melal-hapuk angge re, lakin! Yoho su salim de at Sisera ai fam en Aren halongap hobahaik kohoreg,” ulug ebag. Ai ebag ma re, at Barak anyo Dom Tabor fam en autsi enebe 10.000 en etano nim seberoho wambik watfagdeg de

¹⁵at Sisera fam weim sinalik lebag. Ne, TUHAN en de Sisera autsi sehen seneg on etmano nim, kereta dog yapuk on etmano nim, nong-hong esebag ma re, at Sisera anyo kereta anduhunmu en wambik watfagdeg, eyog fam heiye lebag.

¹⁶Barak en de it eneselei on anyo enangge kereta dog yapuk on mel, ap enebe mel mug-eneplug lebagdeg o Haroset-Hagoyim fam aik lebagdeg at Sisera autsi sehen foroho on abirangge anyo mundoho enowatfag; ap misig eke oluk lili febag fug.

¹⁷Airoho duruk kweleg anyo re at Sisera re heiye lebagdeg de hwe Yael, hun Heber ohwe, Keni on ai obam saboma lebag. Aire at Raja Yabin obam Hazor on ai en de hun Heber ahain elekwe on etma nim balireg latfag ma atlug debag.

¹⁸At Sisera waharukmu re at Yael en dangdoho webagdeg uruk kwit de, “Nakni an nobam saboma kwik ma; hakol duk fug,” ulug hweag-etfag. Ai ebag ma re Sisera anyo o saboma kwik lebag ma, re at Yael en de at Sisera ebe heraho lamag ulug sum boroho belabeg on fam sale febag.

¹⁹At Sisera en Yael fam uruk kwit de, “An ik obok napuk en de, ik dorangge lohon og-nimin,” ebag. Ai ebag ma re Yael en de ahaikwag ahap on fam, ahowe hwenanggoho forukmu anyo en husebagdeg de, Sisera nowag ulug og-utlug de nikangge sum boreg on anyo en sale febag.

²⁰Airoho debag ma at Sisera en Yael fam uruk kwit de, “Lalug de o sabo sokolma eta unduhuk lamin. Ne, ap wamlusareg hein og-heauk kwit, ap suma wereg a, uruk halug de, eleg iyug,” ulug hweag-etfag.

²¹Sisera re ebe kwe lebag angge en noho il duruk en de noho homogdoho nohobag. Nohobag ma re Yael en de bosiemanggen watuk angge nim ne e louk hilinggig misig eke nim webagdeg ougwal fam deloho fug-fug debebag ma re kwenang nim ahundip deg latfag. Airoho at Yael en Sisera watfag.

²²At Barak en de Sisera heraril lauk men de, Yael en Barak dangdoho webagdeg obam hweag-utuk kwit, “Ma, ap haren heraruruk kahen on ai an den unug-hirikohon lahi,” ulug hweag-etfag. Hweag-etfag ma Barak Yael inim kwik lebagdeg duruk men Sisera anyo ebe mundoho waratfag ma re e louk ougwal fam deloho fug-fug deg lit kwenangma wareg latfag.

²³Nukoho ai salim de Allah en ap Raja Yabin, Kanaan ahun ai fam en it Israel on fam enalong og-esebag.

²⁴Raja anyo re il eke nim eke nim fam de ap Israel on en wendal neg haukmu welatfagdeg ambiangma en de ebe waratfag.