Read Ninia Yali HAKIM-HAKIM 6 Bible Online

HAKIM-HAKIM 6 - Ninia Yali bible

HAKIM-HAKIM 6

¹Airoho welatfagdeg de ap homi Israel on TUHAN ele sahaloho siag debag. Airoho debag ma, TUHAN en it enebe ap homi Midian on enapma fesebag ma tahun sabiren sebel-enusug latfag.

²Airoho wereg lit de ap homi Israel on de ap homi Midian on fam mun enakol en de owik elekwe mel dom kwe en ap en inil esa fug kwe mel etmano heraho latfag.

³Airoho wereg lit de it Israel on en yabuk wiroho di angge su angge yatuk mu re, ap Midian on mel Amalek on mel, ap amu on o bini lei kwe wereg on etma mel seberoho re Israel on enowatul ulug watfag.

⁴Watfagdeg de it enobam sabo sum on fam de kwenang it Israel on en fam etmano witfagdeg de eneyabuk a yaho omano unggul watil il selatan fil o Gaza maseroho etma fam feik lebag. Nin de it Israel on en enowam sapi, domba, keledai omano oho hwelalug lebag. Iren de dorangge ulug oho eke embesebag fug mu re ap homi Israel on enasiburu nauk on mun eleg atfag.

⁵Ap homi etmano re enebe esan-esan on enowam et, ne enobam sabo mel et de wenahauk fug aleroho watfagdeg de iren ap homi Israel on enanggwenang fam mun siahap deberuk katfag.

⁶Airoho durukmu ap homi Israel on en diroho suroho ulug debesouk fug ale atuk katfag.

⁷Airoho atuk katfag ma re it ap homi Israel on en de TUHAN en it fam letdoho ap homi Midian on ai enowarin ulug enele heng ebag.

⁸Heng ebag ma TUHAN en it enakit nabi misig eke mondorik watfag ma, nabi anyo en uruk kwit de, “Ap homi Israel on henakni TUHAN Allah anyo en de diroho eheik, Ap homi Mesir on en sebeloho fahat henusugmen An den fiselaroho wilibi henobahaik waharihik.

⁹An den de hit ap homi Mesir on en henowatul ulug duruk men deloho henobahakeg, ne ap homi o kwenang su on hit henowatul ulug duruk on etma fam en deloho henobahakeg, dirihik. Airoho dirihik deg de hiren ap homi suma on enowatul ulug durukmu re, An den it mug-eseheg, ne kwenang iren on de hit og-heseheg, dirihik ai.

¹⁰Airoho og-hesahuk ulug duruk kwit de, An den atam diroho hweag-hesauihik anyo, An nebere hit henakni TUHAN Allah, deg ma re hiren de ap homi Amori on enobam de ketia hit welahepma au en kembu dewa fam apne wauk on etma fam eke apne wahup hayog irihik. Famen de hiren An nele holoho duk ale mun henerim, ulug TUHAN en hweag-hesasi,” ulug hweag-esebag.

¹¹Nukoho eke salim de Malaikat TUHAN eke o kota Ofra etma watfagdeg e batie hun Yoas unggul unuk agdoho Abiezer on anyo en ahan indipmu etma hwerieg latfag. Hwerieg wereg kweleg de at Yoas amloho unuk Gideon anyo re ap homi Midian on en inil neano ulug heraho lit anggur anggen bereldukmu etmano gandum anggen loloho belabeheg, asinahap wilibeheg, eneko foruk katfag.

¹²Airoho durukmu re Malaikat TUHAN anyo at olohotma inaik watfagdeg hweag-utuk kwit, “Nimi sauwe homalik hambong sisereg homalik su namloho e! TUHAN hinim welahep,” ulug hweag-etfag.

¹³Airoho hweag-etfag ma, Gideon en de, “Ai famen de Nowe! Dik-demdoho TUHAN nit ninim wereg halug de, wene mundoho oma nunggwelug nit nenobam atuk? Nit nenaknisi en de, TUHAN en di ale su ale along on duruk kwit o Mesir en og-neneplug wilibik wahasi ulug dindilduk katswa. Famen de Aren ketia nit fotog nesalug ap homi Midian enap en sebel nenusug lamag ulug it enenggikmu nenobahasi etma re!” ulug hweag-etfag.

¹⁴Airoho hweag-etfag ma TUHAN en wene melaleg su Gideon fam hweag-etfag, “Ap homi Israel on, ap Midian on enalong apma wereg on aire hat homamne wereg on eta abirangge fam fiselaroho wilip enebik lamihin en ulug An den mingmingdoho mon-hapuk kahi,” ulug hweag-etfag.

¹⁵Airoho hweag-etfag man de Gideon en onggo uruk kwit, “TUHAN nakni, nunggwelug an mingming napuk kahen? Ap homi Midian on en nit Israel on sebel nenusug wereg ma an den furoho del enebihi ha alereg a? Nit nenunggul unuk Manasye on de, ap fomane re enomamne dorangge oho wereg famen de, nenunggul unuk agdoho an nunggul unuk on de nenomamne mun eleg. Ne, an nunggul unuk on ai fomane re higitdeg famen de an de mun nong-hong deg lahi, nakni,” ulug hweag-etfag.

¹⁶Airoho hweag-etfag ma, TUHAN en uruk kwit de, “An den hat let heahukmu re, hat neg de higit deg lahen! Hat hamu neg en de ap homi Midian on ai enebe humdeg famen de we seramdoho ap misig on along elehap debouk hagdoho, enalong elehap debeselug luluhun esahun,” ulug hweag-etfag.

¹⁷Airoho ebag ma Gideon en uruk kwit de, “Nakni TUHAN Haren en an nobahet hendama nohokeik halug de, wene ai TUHAN en hweag-nereheik ulug an furebemin en de eneg ale eke debein.

¹⁸Hat hebe an nangno neauk kwit eiya wereg ma, an den Hat hobahet siburu eke wag lamindeg og-hirik watminmu lamihin en de eiya welamuk,” ulug hweag-etfag. Airoho ebag ma Aren de, “Fano. An de hat nikangge watmihin mu lamin en de dia nangno heauk kwit welatmin,” ulug ebag.

¹⁹Airoho ebag ma re Gideon anyo sombandoho olma lebagdeg de, kambing owan on eke waroho esetfagdeg, tepung 10 kilo webagdeg roti fituk angge ragi eleg angge weratfag. Airoho debebagdeg wam osoho anyo si yihig fam kwelaboho feheg, ik wam osoho ahaik anyo waruk fam hwenangge feheg, debagdeg de, abirangge anyo At og itmin ulug ebe e batie indipmu nangno hauk kwit wereg ma og irik watfag.

²⁰Malaikat Allah anyo en uruk kwit, “Wam osoho mel, roti weraho mel de helep su fam folug, wam eserehen on ahaik aire emberim kwe hilil esakin,” ulug hweag-etfag. Hweag-etfag ma re Gideon en de ebag ale etano higitdoho neg debag.

²¹Ai en de Malaikat TUHAN anyo en enggik en domuk keireg latfag angge anyo fam, wam osoho anyo mel, roti anyo mel, fam doung debebag. Airoho debebag ma re helep anyo fam en indok ambulbul kulung uruk kwit de wam osoho mel, roti mel omano mun felelengdoho nebag. Airoho debag ma Malaikat anyo longgo ebag.

²²Airoho atfag ma Gideon en boruk kwit de aire Malaikat TUHAN onggwareg ebe nakit waha bebag. Airoho bolug akol en uruk kwit de, “Nakni TUHAN Hebe Mun Leho welahen on, an de Malaikat Haren on etmano eke nim ninil fu-fu ahe ai en de, an nebe mun alemat aruhuk,” ulug hweag-etfag.

²³Ai ebag famen TUHAN en de, “Henda hambukdoho! Hakol duk fug. Hebe wararuhun fug lit deg,” ulug hweag-etfag.

²⁴Airoho ebag ma Gideon en mezbah eke witfagdeg unuk de “TUHAN aire nenda seap napuk on indip,” ulug soalfag. Mezbah aire o Ofra ap homi Abiezer on enobam kota ai fam wereg.

²⁵Hup ai salim TUHAN en wene melaleg Gideon hweag-utuk kwit, “Hat hakni en on sapi yohombuk mun ebe on[6] eke ebe umur tahun sabiren deg on eke wakiyug. Walug de hakni en kembu Baal fahet di angge su angge yalduk katsi mu fahet mezbah witsi on ai moluluk eseheg, kembu hwe on ilit angge ulug wirig on Dewi Asyera mezbah foma fil wereg on ai mel moluluk esakiyug.

²⁶Airoho debelug de moluluk esahun on eta emberimmu re mezbah hakni TUHAN Allah nobahet mun fanoroho wiriyug. Wiri folug de wam sapi yohombuk on anyo ebe abirangge TUHAN nobahet yal-nutuk on ulug yal-numuk. Kembu hwe on Dewi Asyera ilitdeg haren moluluk debehun on aire e yalduk on ulug ai fam yaliyug,” ulug hweag-etfag.

²⁷Airoho hweag-etfag ma re Gideon en de amingming angge num en wenako yonggo fesebagdeg TUHAN en diroho diyug ulug ebag ale etano higitdoho dik lebag. Airoho debag famen ap homi at owesi autsi mel, o kota at wereg ma etma on mel fam akol en o nukoho angge duk fug angge, hup anggo debag.

²⁸Airoho debag ma, ap homi o kota etma on hubet inatfagdeg inil hauk men, Baal fahet mezbah anyo mel, kembu hwe Dewi Asyera ilit deg angge unduhuk on anyo mel mun daloroho yinggigmu re obalma etano mezbah misig eke wirigmu re sapi yohombuk on TUHAN enda ahayeg howag ulug waroho yalfag angge deg latfag.

²⁹Aireg latfag ma it-it hein og-og atuk kwit, “Suma re sa mel dehesa?” ulug hein og-enebil lauk men de, at Yoas amloho Gideon anyo en deheik, ebag.

³⁰Ai ebag ma iren Yoas fam uruk kwit de, “Hat hamloho en de mezbah Baal anyo mel, ne hwe Dewi Asyera ilitdeg unduhuk on mezbah foma fil wereg angge anyo mel dukom eseheik. Ma re hat hamloho aire ketia dia walug wilibik ma. At ebere waratmisi!” ulug ebag.

³¹Ai ebag famen Yoas en it ap Gideon watul ulug ebag enap anyo fam uruk kwit, “Hit de kembu Baal ibil ahepdeg alele wauk kwit uruk kahep au a? Ap sa en Baal ibil atuk halug de ketia dian watul. Ne, Baal aire demdoho allah halug mezbah moluluk eseheikma etan onggwareg en along bal dowag,” ulug hweag-esebag.

³²At Yoas en uruk kwit, “Baal fahet wam waroho yal-utuk mu mezbah anyo at Gideon en moluluk debeheikma re at Baal en neg Gideon warukwag,” ulug ebag ma, etano lien angge re at Gideon unuk de, “Yerubaal”[7] ulug soalfag.

³³Eta li em de ap homi enunggul unuk Midian on mel, Amalek on mel, ap homi enunggul unuk eke o iliangge leimu Ik Yordan foma fil mo lahaik waharuk fil etma wereg on mel, mundoho kabog-debag. Kabog debagdeg de Ik Yordan baloho watfagdeg de enobam sabo sum fam o Yizreel donggo kwe etma witfag.

³⁴Airoho witfag famen de TUHAN Aheime Gideon fam atfagdeg, ap enunggul unuk Abiezer wereg kwe on at nim seberik wamag ulug wol-enepuk kwit bohweap trompet ele furebag.

³⁵Airoho wol-enepfagdeg, aren nin yonggo re it enunggul unuk Asyer on mel, Zebulon on mel, Naftali on mel, Manasye Ik Yordan ikman mo bekit fil et hware fil wereg on et mel, at nim seberik wamag ulug yonggo mondotfag. Airoho mondotfag ma re it enebe mundoho aire at Gideon let dukoho akit watfag.

³⁶Watfag ma Gideon en Allah fam uruk kwit de, “TUHAN nakni, Haren an hweag-nutuk kwit, ap homi Israel on fiselaroho fesehun en hayonggo hobaharuk kahi ulug hweag-nitihin anyo,

³⁷ebe demdoho halug de kwenang an welahimu diare niren gandum anggen lolduk kahema welahi. Mu re an den domba oruk baleg su eiya foruk kahi. O sono hubet lahe lil en domba oruk au fam kulureberuk halug de, an den ap homi Israel on fiselaroho enobahaukwag ulug demdoho nayonggo fesi, ulug furebehuk,” ulug hweag-etfag.

³⁸Airoho hweag-etfag ale anyo demdoho airoho atfag ma, at Gideon en hubet sekandoho il ha lebagdeg de, domba oruk fam lil suknig on anyo ahaik bereloho re waruk misig fam ele sopdoho febag.

³⁹Airoho hwenangge febagdeg Allah fam uruk kwit de, “TUHAN nakni, an den wene fobik eke hweag-hutuk kahimu bet nabuk fug, nakni. An nenda wenggeloho re domba oruk su fam fobik wal hamin. Airoho wal hauk men, domba oruk baleg su fam lilangge en kulurebouk fug angge dombon deg wereg kweleg kwenang neg kulureg halug de, an furebemin,” ulug hweag-etfag.

⁴⁰Airoho hweag-etfag ma, o hup anyo salim, Allah en de Gideon en heng ebag ale anyo higitdoho debag ma, likia hubet de domba oruk anyore dombon deg wereg kweleg de kwenang neg lil en kulurebebag ma hebag.