Read Ninia Yali HAKIM-HAKIM 8 Bible Online

HAKIM-HAKIM 8 - Ninia Yali bible

HAKIM-HAKIM 8

¹Ap Efraim on etmano watfagdeg Gideon fam uruk kwit, “Haren ap Midian on enowarik lamin ulug waharuk kwit nit hweag-nesa fug angge dirihin! Aire nunggwelug haren nit airoho nenepihin?” ulug iren enele airoho Gideon fam enele suahal hweag-etfag.

²Famen Gideon en onggo uruk kwit, “An den dirihik ale ai hiren duruhup on nim higit ha man de, an den etare mun hareg. An nautsi abirangge en mundoho duswa on etma re horog hareg famen de, hiren dorangge duruhup on eta neg de indip mun leho.

³ Aireg ma re Allah en de ap homi Midian on enori biren angge, Oreb ha, Seeb ha re hit henenggikmu fesimu, enebe hiren enowatuhup eta, an dirihik on fahet nalong bolug mot-nabuk alereg behep? Mun eleg. We hit neg de henalongdoho mot-henebuk alereg,” ulug hweag-esebag. Gideon en airoho hweag-esebag ma neg de it enehummu ahe eleg atfag.

⁴Ai salim de Gideon autsi enebe 300 en etano nim de Ik Yordan baloho wilibik lebagdeg, enomamne mun eleg atfag famen de it selei on etmano mug-eneplug lebag.

⁵Lebagdeg de o Sukot huli aik lebag. Aik lebagdeg Gideon en ap homi o kota ai on fam hweag-esauk kwit de, “An nautsi enomamne eleg atuk kweleg, ap homi Midian on enowesi Raja Zebah ha Salmuna ha mug-eneplug waharuk kahema re, siburu dorangge eke og-esakiek,” ulug hweag-esebag.

⁶Airoho hweag-esebag famen it ap o Sukot on etma melal-enepuk on en uruk kwit de, “Aire iren ap Zebah nim Salmuna nim oan sen-enebuk fug angge en siburu heng-nenebehep aire nunggwelug siburu og-esaul. Eleg u,” ulug hweag-esebag.

⁷Airoho ebag ma, Gideon en uruk kwit, “Fano hweag-nerehep! Fobik TUHAN en Zebah nim Salmuna nim an nenggikmu fohumu, enalong elehap debeselug halug de, an den hun yeik aeg olok on mel alog mel o leimu wereg angge fam lal-fisog henowarik waruhuk,” ulug ebag,

⁸Airoho hweag-esalug de bekit lebagdeg de o Pnuel huli aik lebag. Aik lebagdeg o etman oho autsi fahet siburu heng enepfag. Famen de it ap Pnuel on en de ap Sukot on en hweag-etfag hagdoho hweag-etfag.

⁹Airoho ebag ai en de Gideon en it fam uruk kwit, “An de koloroho lamindeg fobik nambol somban watmin boruk kahi. Mu re eta li em an waharuk kwit o yaron menara kota suma helep sep hun-hun wirig on etma molulukdoho embesehuk,” ebag.

¹⁰Gideon en airoho hweag-esebag li em etare, Zebah ha Salmuna ha re enautsi tentara esan lohwaleg enobam mo lahaik waharuk fil etma on, atam esan lohwaloho watfag on etmano, it Israel on en de enebe 120.000 enowatfag ma re, enebe 15.000 en hagdoho neg atfagdeg, o unuk Karkor lebagdeg welatfag.

¹¹Wereg ma re Gideon anyo enombolim lebagdeg de o Nobah mel Yog-Beha mel etma re timur fil etma, o leimu ap homi enepe wong saleg wereg ma fetagdoho it eneselei on etmano enekit hou wilipfag.

¹²Wilipuk kwit de ap biren it Midian on enowesi Raja Zebah ha Salmuna ha etano heiye bologdoho wilibik lebag famen de, mug-eneplug lebagdeg sen-enebik lebag. Sen-enepfag ma re enautsi tentara esan lohwaleg anyo enenda nong-hong ebagdeg buhulfag.

¹³At Gideon en de weim airoho yaplug sombandoho waharuk kwit de o Heres lahaik lauk kwe anyo watfag.

¹⁴Waharuk kwit de etan de ap Sukot on sauwe omalik eke senetfagdeg hein og-hauk kwit de, “Ap o Sukot on enowesi kaindeg inunuk hweag-nimin,” ulug hweag-etfag ma, nimi anyo en de ap kaindeg enebe mundoho re 77 en inunuk domog lisu baloho Gideon og-etfag.

¹⁵Og-etfag ma Gideon en ap homi o kota Sukot on enowesi kaindeg omano enekit watfagdeg hweag-esauk kwit, “An den Zebah mel Salmuna mel owan sen-enepuk eleg ai en, hat let-heaul fug ulug uruhup no? An nautsi siburu mun obok en enomamne mun eleg atsi mu wereg kweleg, hiren de hat hautsi siburu og-esaul fug ulug uruhup behi. Famen de, fu hakiek! Ap Zebah nim Zalmuna nim etano enebe dia,” ulug hweag-esebag.

¹⁶Airoho hweag-esalug de yeik aeg wereg angge on mel ne alog angge on mel o leimu wereg angge webagdeg, ap homi o kota Sukot on enowesi etmano yeik lal-fisog fuk-fakdoho enowatfag.

¹⁷Enowatfagdeg o Pnuel anyo helep sep hun-hun wirig on etmano moluluk eseheg, ap homi o etman on ap on neg enebe abirangge binggi enowareheg, debag.

¹⁸Airoho dulug, fobik ap Zebah nim Salmuna nim etano fam uruk kwit, “Hiren ap o Tabor en enowatuhup on etma re enorohole re nangginig on enowatuhup?” ulug hein og-esebag ma, iren de, “Enorohole re hat hinim higit, ap kaindeg raja enomaliki enorohole hag on enowatuhuk,” ulug hweag-etfag.

¹⁹Ai ebag ma Gideon en de, “Etare an nori nautsi, nenesinga misig on en endag nenepsi on enowatuhup. Hiren it eta enowatlep fugmen de dik-demdoho anggere an den oho hit henowatmin fug ulug hweag-hesele,” ulug hweag-esebag.

²⁰Airoho hweag-esebagdeg, Gideon amloho wandeba on unuk Yeter anyo fam uruk kwit, “Ap eiya haren binggi enowarin,” ulug hweag-etfag, famen Yeter ebe ket sauwereg lit karog lisoho walug enowaruk ale akol en de embesebag.

²¹Ai debag ma it Zebah nim Salmuna nim en Gideon fam uruk kwit “Ao, hat hebe ap deg lahen halug de, hat honggwareg henggik en nenowatmihin mu re,” ulug hweag-etfag. Airoho hweag-etfag ma Gideon en it binggi enowatfagdeg de it enowam unta anggolop kwe alili angge boreg latfag angge etmano mundoho hwelebag.

²²Webag ma it Israel on en Gideon fam diroho ebag, “Haren nit ap homi Midian on enapma weregman fiselaroho nenobaharihin ai en de, hat hebe nit nenowe sen-nenusug welaruhundeg, hat hamloho en sen-nenusug welaruhureg, fobik hat homba en oho nit sen-nenusug welamuhup,” ulug hweag-etfag.

²³Ai ebag ma Gideon en uruk kwit, “Airoho re fug. An hit henowe wereg lit melal-henepuk karuhuk fug. Ne, an namloho en ohore fug. We nenakni TUHAN neg de hit melal-henepuk on wereg,” ulug hweag-esebag.

²⁴Ai ebag famen de Gideon en wene eke uruk kwit, “Wene misig neg eke hweag-hesa. Ap neneselei on en enalili angge enesanggomangge kwelabeg on wauhup on etma, henebe hundomog en abirangge an og-nirik manik,” ebag. (Ap Midian on etma re it ap o iliangge lei kwe wereg on amu on etman deg hagdoho enalili angge enesanggomangge kwelabeg latfag ma webagdeg atlug airoho ebag ai.)

²⁵Airoho hweag-esebag ma, ap homi Israel on en hweag-utuk kwit de, “Fano. Nit nenenda fano fam hat og-humul,” ulug ebag. Ai ebagdeg, sum kain doale folug de, enebe domog en eneselei on en enalili angge enesanggoma kwelabeg on deloho webag on etmano mundoho feik watfag.

²⁶Airoho og-etfag on etan no emas on neg anggin de 20 kilogram en am aleroho atfag. Enalili angge foma siong mel, sum il ungu it ap raja Midian on en wandeg welatfag on mel, enowam unta alili angge anggolopma bug deg on mel de anggin ilit hebag fug. We emas enesanggomangge on neg wal-hebag.

²⁷Airoho og-irik watfag ma re anggin ilit hebagdeg, Gideon en de emas anyo mel fam de kembu eke ilitdeg eke witfagdeg de at obam sili o kota Ofra etma febag. Airoho wiroho febag ma it Israel on enenda anyo fam dipdeg lit mot-dik lauk kwit de Allah fam fubi debouk fug angge welatfag. Airoho duruk katfag on ai fam de at Gideon onggwareg fahet inim ne it ahain elekwe on mel fam de sabu yepdeg ma hag atfag.

²⁸Ap homi Midian on de it Israel on en enalong elehapdoho fesebag ma re iren diroho-suroho duk fug ale neg atfag. Ma re Gideon en ap Israel on fanoroho melal-enepukmu wereg lit at ebe oluk wereg li re weim lioleg angge fanoroho neg de 40 tahun en welatfag.

²⁹Gideon en weim airoho yaplug sombandoho obam watfagdeg etma welatfag.

³⁰Etma wereg lit, at ohwesi humdoho welatfag ma re omaliki enebe re 70 en welatfag.

³¹Ne, ohwe hweimohwe anyo re o Sikhem welatfag. Wereg lit de hwe ai en omalik eke endetfag ma, akni en unuk Abimelekh soalfag.

³²Airoho endag-enepfagdeg Yoas amloho Gideon anyo ebe umur mun sobal atfagdeg waratfag. Waratfag ma re ebe wareg de ap homi enunggul unuk agdoho Abiezer on enobam Ofra etmano, Gideon akni Yoas salfag ma etma salfag.

³³At Gideon ebe waratfag ma re ap homi Israel on TUHAN fam dipdoho welatfag fug. Iren de Dewa Baal fam apne wauk kwit, Baal-Berit anyo re dewa iren on debebag.

³⁴Iren enakni TUHAN Allah ap homi it enaselei on it enaluluk kwe wereg on etmano fam en fiselaroho fesebag on anyo fam duruk kam fug angge duruk katfag.

³⁵Airoho duruk kwit, iren de Gideon ebe oluk wereg lit ap homi Israel on melal-enepuk katfag ale anyo onggo iren at Gideon ahain elekwe on fano ale enepuk katfag fug.