Read Ninia Yali HAKIM-HAKIM 9 Bible Online

HAKIM-HAKIM 9 - Ninia Yali bible

HAKIM-HAKIM 9

¹Nukoho eke salim de Abimelekh hun Gideon amloho anyo re o kota Sikhem at isinga erekwi at amusi enekit lebag. Lebagdeg de etmano en it inim ele matuk kwit,

²hiren ap homi o Sikhem on abirangge hein og-esauk kwit de, diroho hein og-esakiyug, “Hit henenda alere at Gideon omaliki enebe 70 en etan melal-henepuk kwit, diroho diek suroho diek ulug hweag-hesauk ale henenda a? Ite ap misig en eke melal-henepuk wereg lit diroho diek suroho diek ulug hweag-hesauk kalep ulug henenda a? An hininim welahi au ohore hit henamebon welahi ulug enendama kwelabe feseiyug,” ulug hweag-esebag.

³Ai ulug hweag-esa lebag ma it at Abimelekh isinga owe aut mel etmano ap homi o Sikhem on wereg ma enekit lebagdeg de wene Abimelekh en ebag on etmano mundoho hweag-esebag. Hweag-esebag ma ap homi o Sikhem on etmano en uruk kwit, “At Abimelekh aire nit nenamep minggirig on deg ma, ulug de at Abimelekh ele holoho ombolim lauk kamul,” ulug ebag.

⁴Ai ebagdeg uang perak on 70 en angge kembu obam ebe unuk de Baal-Berit fahet apne waukmu en webagdeg de at Abimelekh og etfag. Og etfag ma re Abimelekh en de ap fomane enobabut hape enap mun enolok on at inim sebe ukwag ulug onggo og-esebag.

⁵Airoho og-esalug inim de at akni obam o Ofra lebag. Lebagdeg ori autsi mel etmano helep misig on fam eke fesebagdeg binggi enowatfag. Famen de Gideon amloho elabo on unuk Yotam ai neg de ebe herag atfag ai en de at inim enowatfag fug.

⁶Airoho enowatfag ma ap homi o Sikhem mel o Bet-Milo mel welatfag on enebe abirangge kabog-debagdeg o Sikhem e batie indipmu ousama hag etma lebag. Lebagdeg de etan de at Abimelekh enowe raja welamag ulug unduhuk febag.

⁷Unduhuk febag ma, at Yotam en esanggo holfagdeg, Dom Gerizim funumu inaik lahabagdeg alukwe ap Sikhem on wereg fil etmano deg lit ele hum fam diroho suahal ebag, “Hit ap homi Sikhem on su hit henele urukmu Allah en oho hit henele holukwagdoho re an den wene imin on ai henesanggo holiyug.

⁸Nukoho eke salim atfag alere it e omano enowe raja unduhuk foul ulug kabog-duswa. Airoho kabog-duswareg de e zaitun fam uruk kwit, Hat de nit nenakni raja aruhun, ulug hweag-utuk men de,

⁹at e zaitun anyo en de, An nahalue fam de kembu dewa mot-debeheg, ap homi mot-debeseheg, duruk kamag ulug nanggen yihiruk kahi on ai yihuk eleg angge bale folug an nebe henakni raja am alere nerim, ulug isi.

¹⁰Airoho isimu re it e omano en de e ara fam uruk kwit de, Hat e ara au raja nit nenobahet atmihin, ulug hweag-utuk mu re,

¹¹at e ara anyo en de, An hit henakni raja atlug nanggen unduk miron yihiruk kahi on ai yihuk eleg angge bale folug hit henobahet raja wereg alere nerim, ulug isi.

¹²Ai ulug, de it e omano en de e anggur indip fam uruk kwit de, Hat hebe au nit nenobahet raja atmihin, ulug hweag-utuk men aren de,

¹³An hit henobahet raja atlug de, nanggen yihiruk kahi on ai fam kembu dewa endama ahayeg debeheg ap homi enendama enahayeg debeheg, duruk kahi on ai yihuk eleg angge embesehuk de fug, ulug isi.

¹⁴Airoho uswa ai en de it e etmano abirangge en de e alog-alog ahan anyo fam uruk kwit de, Hat neg raja nit nenobahet amin,

¹⁵ulug hweag-utuk men de, aren de, An hit henobahet raja amag ulug henendaman demdoho behepdeg ehep halug de an nalong apma kwik manik. Ne, hit henerim halug de an nenggik amlo alog on oma en de indok ambulbul wilipuk kwit de e lak indip o Libanon fam oma wilibig wereg on etma indok en namisi, isi,” ulug hweag-esebag.

¹⁶Yotam en de airoho hweag-esalug de ap homi Sikhem on omano wene eke diroho hweag-esebag, “Hiren Abimelekh henakni raja welamag ulug unduhuk foruhup on aire demdoho mun higitdoho duruhup a? An nakni Gideon ebe mel ne at ahain elekwe on en enunggul unuk agdoho on etmano mel enobam debesouk alere ai debehep ai a? An nakni en hit henobahet omamneroho mun fano ale henepuk katsi on anyo onggore at fahet fano ale duruhup ai a?

¹⁷Hit henebe ap homi Midian on enapma weregman aren fiselaroho wilibi henobahamin ulug, ebe waruk ale duruk kweleg ning-nangdoho duruk katsi ale anyo henenda ebet hakiyug.

¹⁸Aren airoho duruk katsi famen de ketia hiren nakni Gideon ahain elekwe on onggo bal-enepuhupdeg enebe 70 en angge helep misig on fam feselug, misig on fahet abirangge enowatuhup. Abimelekh aire an nakni amloho, ohwe hweimohwe anyo en ondoho on anyo re. Famen de hit ap homi Sikhem on en de at Abimelekh ai hit henamep minggirig deg en ulug at ebe raja unduhuk foruhup ai.

¹⁹Yoho hiren an nakni Gideon ahain elekwe on nim siahap enebehep ale ai demdoho mun higitdoho neg duruhup halug de, at Abimelekh hinim wereg lit, at obahet hit henenda henahayeg heheg, ne hit henobahet at endama ahayeg heheg, duruk kwit welamuk.

²⁰Aireg famen de airoho duk fug on famen duruhup halug de, Abimelekh ilonggoman indok wilibik watlug hit ap homi Sikhem on nim, Bet-Milo on nim welahep on etma felelengdoho han nenggeg, dukwag. Ne, hit ap Sikhem on mel Bet-Milo on mel hinilonggoman indok wilipuk kwit de Abimelekh ebe han nowag,” ulug hweag-esebag.

²¹Yotam en de airoho hweag-esalug de, owe Abimelekh akol en de, heiye o Beer lebagdeg welatfag.

²²Wereg kweleg de at Abimelekh en de ap homi Israel on melal-enepuk kwit weregman de 3 tahun welatfag.

²³Airoho welatfagdeg Allah en Abimelekh nim it ap homi Sikhem on nim minggit-manggat amag ulug debesebag ma, iren at il deg ale debag.

²⁴Airoho atfag aire Abimelekh nim ap homi Sikhem on nim en Gideon omaliki 70 en etano enowarukwag ulug endama log-bog hebag on anyo onggo debag.

²⁵Ap Sikhem on en Abimelekh kwe balduk on ap dom funu kwe feseil lebag. Ap homi kwe etmano lauk on ap kwema fesebag on etmano en sen-enepuk katfag. Ai fam airoho duruk ale anyo Abimelekh hweag-irik lebag.

²⁶Eta li em Gaal hun Ebed amloho anyo re o Sikhem welaikoho ori nim seberoho watfag, ne it ap homi Sikhem on en oho re at fam enenda dipdeg latfag.

²⁷Aireg lit iren anggur anggen yabukmu dahanik lebagdeg, anggur ahaik bereloho ik nauk on debebagdeg, iren soni esetfag. Esetfagdeg de iren de enanggembu dewa apne waukmu etmano en enasiburu nenggeg, enahaik nenggeg duruk kwit Abimelekh anyo wip deberuk katfag.

²⁸Iren uruk kwit, “Nit aure nangginig nenap en at Abimelekh apma sebe uruk kahe no?” ulug ebag. Ne, at Gaal en uruk kwit, “At aire ebe demdoho re sa? At ebere hun Gideon amloho at aut apma on Zebul anyo nim, nit nenomba Sikhem akni Hemor anyo amingming angge atfag on fug a!” Ebe anyo ulug ebag.

²⁹Eke uruk kwit, “An den ap homi Sikhem on su melal-enepuk kaleman de, dik-demdoho at Abimelekh ai il owag mun eleg alep! An den at fam uruk kwit[8] Yoho ma! Hat hautsi tentara kabog esalug weim apul en wilibik ma!” ulug hweag-etle ebag.

³⁰Ai ebag ma at hun Zebul o kota Sikhem ai along welatfag on anyo en de at Gaal en ebag ale anyo esanggo holfagdeg de ahummu olok atfag.

³¹Aren de wene yonggo hun Abimelekh akit o Aruma wene diroho walug hweag-irik lowag ulug mondotfag: “Gaal hun Ebed amloho anyo ori nim seberoho o Sikhem wahesareg hat il habukwag ulug ap homi suma on fam enendama kwelapuk.

³²Anggere hat hebe nim ne it ap homi hat on nim de o hup anggo yabukmu herag aik lakiyug.

³³Ne, o sono lahe mo lahabik waharuk halug de, fetag-fetag o kota ai dog sinalik kwiyug. Ne, at Gaal nim at autsi nim en hat hinim weim apul ulug wilibik waharuk halug de, at wilibik waharuk li em etare eiyale deg ma re haren at luluhun esakiyug!” ulug mondotfag.

³⁴Ai ebag ma re at Abimelekh nim autsi abirangge nim de o hup anggo wilip atfagdeg de, it enebe dakdoho re esan ohwan debebagdeg o kota Sikhem anyo walinggoho salik lebag.

³⁵Salik lebagdeg etano Abimelekh nim autsi nim etano en inil hauk men de at Gaal anyo wilibik watfagdeg de o kota sokolma etano unduhuk latfag ma, re it enebe abirangge anyo saleg latfag ma etmano en wilibik watfag.

³⁶Wilibik laukmu at Gaal en il esebagdeg, aren Zebul fam uruk kwit, “Ap dom bunu kwe en wambik waharuk angge, fu esakin!” ulug hweag-etfag. Ai ebag ma at Zebul en, “A! Etma ap de fug, etma re dom kwe etma ahohwe en deg,” ulug hweag-etfag.

³⁷Ai ebag ma at Gaal en uruk kwit, “Demdoho! Ap enebe alo kwe en wambik waharukmu re, esan misig ekere o ousa ahan batie wilibig fil en suma fil waharuk ai!” ebag.

³⁸Airoho ebag ma at Zebul en Gaal fam uruk kwit, “Hat hele ahako deg lahen on anyo re ebe ke? Endam haren uruk kwit, nunggwelug niren Abimelekh apma sebe ul? ulug irihin anggere ap haren halitno enepihin enap omano oma re abi. Yoho ketiare it nim weim yabik lakin!” ulug ebag.

³⁹Ai ebag ma re at Gaal en de ap homi o Sikhem on og-eneplug wilibik lebagdeg de at Abimelekh nim weim yabik lebag.

⁴⁰Famen de Abimelekh en at fil mon-ha wahail lauk en de, at anyo heiye lebag. Ne, ap wareg wamburuk men neg de o kota sokolma etmano fam deg latfag.

⁴¹Airoho dulug de at Abimelekh anyo sombandoho o Aruma lebagdeg etma yugdoho welatfag. Ne, Zebul en de Gaal anyo ori nim o Sikhem en muko wilip enepfag ma re, it enebe etma eke welatfag fug.

⁴²Likia re ap Sikhem on o kota embeselug de yabukmu laul ulug lebag. Laukmu re it duruk ale anyo at Abimelekh fam hweag-irik lebag.

⁴³Hweag-irik lebag ma re Abimelekh en de at ori andog esebagdeg de esan henahan kabog esalug de, it enebe yabuk kwe etmano salik lebag. Saleg lit aren esauk men de ap homi o Sikhem on etmano yabukmu laul ulug waharukmu esebagdeg de, at ebe salegma etmano en hou wilip atuk kwit it enebe binggi enowatfag.

⁴⁴It ap fomane esan biren etano re ap yabukmu enakol en lauk on etmano mug-eneplug lalug enowarik lauk kweleg de, at Abimelekh nim ap esan eke nim de folo-folo o kota kwik laukmu sokolma kwe balik lebag.

⁴⁵Ai debagdeg de at Abimelekh de nukoho hunduko anyo weim yapuk men neg debagdeg de, o kota anyo sebelik kwebagdeg, ap homi etmano enowatfagdeg, kota ebe mun luluhun-lalahan debebagdeg de mayu fole febag.

⁴⁶Airoho debag ale it ap o Sikhem hukdeg ma wereg on en enesanggo holfagdeg de, it enebe re kembu owik El-Berit apma elma etma kwebagdeg heraho latfag.

⁴⁷Airoho deg ma re ap homi en Abimelekh fam uruk kwit de, Ap o Sikhem hukdeg ma wereg on de etma kabogdeg wereg, ulug hweag-etfag.

⁴⁸Ma, at Abimelekh nim ne at ori nim de Dom Zalmon fam lebag. Lebagdeg de etman de yaha fam e enggik kong balfagdeg de at omaloma harulug waharuk kwit de, ap at ori etmano oho folo-folo airoho neg dukwag ulug hweag-esebag.

⁴⁹Hweag-esebag ma re it enebe domog en e enggik kong-debagdeg de at Abimelekh ombolim lebag. Lebagdeg de e enggik omano re ap Sikhem on anyo ilonggoma wereg kweleg de kembu owik elma anyo kabog-debagdeg de han yalfag. Ai fam de ap homi Sikhem on anyo re ap et homi et de 1.000 en hagdoho waratfag.

⁵⁰Anyo dulug de at Abimelekh o Tebes lebag. Lebagdeg aren o kota ai huk debagdeg de o ebe sebelik kwebag.

⁵¹O kota ebe bik-bulmu re helep sep hun-hun witil lahabag on omamne on misig eke welatfag. Wereg ma re ap homi o kota ai on de etma lebag. Lebagdeg de it enebe helep sep hun-hun wirig on anyo elma kwik lebagdeg de ilonggo fil en sok kelog debebagdeg it enebe emberimmu lahabag.

⁵²Airoho debag ma at Abimelekh anyo en de helep sep hun-hun wirig on anyo meiyaloho femin ulug etma lebag. At ebe sokolma aik lebagdeg aren han yalmin ulug duruk men de,

⁵³ hwe misig eke en de helep anggen sahalduk angge eke at unggulmu belabik watfag ma re, at unggul owag anyo erap debag.

⁵⁴Ai debag ma at Abimelekh en folo-folo ap sauwe en at asehen harulug lauk katfag on anyo wol debagdeg hweag-utuk kwit de, “Henggarog ai lisoho an binggi nowarin; an de hwe en watsi ulug uruk kamuhup aire nerim,” ulug ebag ma re, ap sauwe on anyo en de at Abimelekh anyo dale febag ma binggi waratfag.

⁵⁵It ap Israel on en hauk men de Abimelekh anyo mundoho waratfag ma hebagdeg de, it enebe mundoho enobam lebag.

⁵⁶At Abimelekh en ori enebe 70 en enowatuk kwit abut siag ale akni fam debag on anyo fahet Allah en airoho unggulmu febag ai.

⁵⁷TUHAN en de ap Sikhem on enobabut siag on ai fahet unggum enobam febag. Aren at Yotam Gideon amloho anyo en it hururung enepuk kwit it enobahet ale ebag on etano higitdoho atfag.