Read Ninia Yali 2 YOHANES 1 Bible Online

2 YOHANES 1 - Ninia Yali bible

2 YOHANES 1

¹An henowe anyo en, hat nerek[1] Allah en momal-hapsi anyo hat homaliki hinim surat su bal-hesauk kahi. Allah demdoho on nit nenendama wereg, ne, eke ninim mundoho mundoho welamuhuk mu re, an den nenda demdoho hundig henepuk kahi. An den neg de fug famen, it mundoho Allah demdoho on enelukdeg halug, enenda hundig henepuk.

³At Nenakni Allah, Amloho Yesus Kristus anyo inim en nenelaheg beheg, enenda sakoreg en nenebeheg, nenenda hambukdoho nenobahakeg, nit demdoho wene nenelukdeg lit, nenenda hundig boruk kahe nesalug, nenepuk kamag.

⁴Nit duruk kamag ulug Nenakni en melale nenobahasi higitdoho, hat homaliki foma demdoho wene eneluk atlug dil lauk mu, hesauihikdeg nahayeg humon hauihik.

⁵ Ai halug, ketia re, nerek. Melale hobaharuk kwit bal-hutuk kahi fug. Ite, wene endam et holduhup anyo. Nenenda-henenda hundig boruk kamek, ulug, mingming-habihi.

⁶Nenenda-henenda hundig boruk kahe halug de, ebe Allah en wene melale nenobahasi anyo higitdoho duruk kahe ai. Endam et wene melale nenobahasi wene holduhup anyo ebe su. Hit hit nenenda-henenda hundig boruk kwit, debeseil noruk kamek.

⁷It ap, ap homi lal-enepuk on di o su o suma humdoho wilibik lausa. It ap ai en, “Yesus Kristus ap endag-atlug wahasi,” ulug, fag-duruk eleg. Ap aireg on ap homi lal-enepuk on, ne, Kristus aselei on it ai wereg.

⁸Aireg ma, hit wowag ulug niren henepuhuk anyo[2] fotog-esehep ha no, Allah en onggo fano on mundoho og-hesahu on ai hwelahup ulug, henenda kahaleg lamek.

⁹Ap eke Kristus wene melaloho hweag-nesauk katsi wene anyo foroho welam fug angge embeselug, amu on dil lauk halug, Allah ebe at endama wereg eleg. Ap eke Kristus wene melaloho hweag-nesauk katsi wene anyo foroho lit, duruk halug, Nenakni inim Amloho inim at endama wereg.

¹⁰Ai halug, ap eke henekit waharuk kwit, Kristus en melaloho hweag-nesasi wene anyo fug famen, amu on hweag-hesa waharuk halug, dang-enebeheg, henobam kwik wamag ulug og-enebeheg, duk fug.

¹¹Ap eke en ap ai on dangdoho wauk halug, at siag duruk ale inim higitdoho duruk.

¹²Hweag-hesa ale wene humdoho wereg famen, surat fam baloho hweag-hesamin nerim. Ite, nenahayeg humon hahuk en, henekit waruhukdeg, wene hit hinil hanim uhuk ale nenda ebereg lahi.

¹³Hat hehe Allah momalsi on anyo omaliki[3] en dang-henebehesa.