Read Ninia Yali 3 YOHANES 1 Bible Online

3 YOHANES 1 - Ninia Yali bible

3 YOHANES 1

¹ Gayus nare, an howe demdoho nenenda hundig hapuk kahi on anyo en surat su bal-hirik.

²Naut nenda hundig on! Hat henda fano welahen anyo hag, hat hebe higitdoho ouk eleg angge, di angge su angge duruk kwit, fano neg welamag ulug, Allah hweag-utuk kahi.

³Haren demdoho wene hole folug higitdoho duruk kahen ai en, it nenori nenerekwi Allah omaliki on eke nakit wahausareg, diroho hweag-nutswa. “Aren demdoho wene foroho lit fano higitdoho duruk,” ulug, habug hweag-nutswa ma, nesanggo holdihikdeg nendaman nahayeg humdoho hauihik.

⁴Amu ale fahet nahayeg dotdeg hag famen, an nomaliki demdoho wene higitdoho dil noruk ulug, uruk on nesanggo holduk kahi ai fam neg nahayeg humon hauk kahi.

⁵Naut nenda hundig on! It nenori nenerekwi Allah omaliki hea waharuk halug, it foma enebe hapeleg on famen, enobahet di angge su angge debeseruk kahen ai, dipdoho neg duruk kahen.

⁶It ap hea waharuk on anyo en, nit Yesus omaliki suma kabogdeg on ninil hanim habug uruk kwit, “At Gayus anyo enda hundig nenepuk kwit, airoho nenobahasi,” ulug, fagdoho hweag-nesausa. It airoho hea waharuk anyo fanoroho lauk kamag ulug, Allah ahayeg howag ulug, fano debeseruk kwit, mon-enepuk karuhun.

⁷It ap ai, Kristus obahet dil lauk kwit, “It ap Kristus demdoho boruk eleg on enengge eke hwelahuk fug,” ulug, dil lauk mu,

⁸nit Kristus omaliki en nenori nenerekwi ai on demdoho wene hweag-isil lauk ai inim seberoho dil lauk hag let-esahuk fano.

⁹An wene eke Yesus omaliki hinim kabogdeg on anyo fahet surat horogdoho baloho mondorik waharihik famen, at Diotrefes onggwareg en, “An enenggelegma leho fahat-damin,” ulug, enda boruk ai fam an nele furebesi fug.

¹⁰Airoho duruk ai re, eke re seiale nit nenebug siag uruk. Airoho uruk kwit, endaman de, “An duruk kahi ai re dorangge mabendoho hag. Fobik eke inim logdoho duhuk,” ulug, boruk kwit, it Allah omaliki eke waharuk em, at ebe en og-enebuk fug angge wereg lit, it eke en, “Og-enepul,” ulug duruk em, bet-enebeheg, enebe Yesus omaliki kabog-durukmen muko wilibe feseheg, duruk ai en, an nebe waruhukdeg, at duruk on ai fureboukwag ulug, enggali waruhuk.

¹¹Naut nenda hundig on! Siag on wal-heheg duk fug. Ite, fano on neg wal-heheg duruk kamin. Ap eke fano dil lauk ai, Allah en ondoho on wereg, ne, at ap eke siag dil lauk anyo Allah apeleg on wereg.

¹²At Demetrius anyo it di ap su ap anyo en abug balduk kwit, fano neg uruk mu esauk kahi. Demdoho wene higitdoho dil noruk fam, ap su nangginig on fag atuk. An oho, “At obabut fano,” ulug, fagdoho hweag-hirihi, ne, an nil halug demdoho neg uruk kahi ai holukdeg lahen.

¹³An den wene eke hweag-hom ale on humdoho wereg famen, surat bal-hitmin nerim, ite,

¹⁴horog ketia heahuk ebereg lahi mu, eta li bekit seberoho nenele maruhuk.

¹⁵Allah en henda hambukdoho hobahaukwag. Hori herekwi suma wereg on en mundoho dang-habehesa. “Yohanes en dang-henebeheik,” ulug, nori nerekwi enunuk hunduko dang-enebiyug.