Read Ninia Yali WAHYU 10 Bible Online

WAHYU 10 - Ninia Yali bible

WAHYU 10

¹Airoho duruk mu hauihikdeg, ai en eke na og-hauk kwit, malaikat along on eke hena asum hagdoho hwilip-debelug, uare kware-kware hag unggulmu bugdeg lit, ne, orohole re mo hag deg lit, eyog de indok ambulbul ulog duruk kwit, boholman wambik waharuk mu, hauihik.

²Enggikmu buku baleg hwililipdeg on dorangge eke fisela-deberuk kwit, eyog bekit fil ik laut emberim fam feheg, ne, eyog hware fil kwenang fam feheg, debelug wereg lit,

³olomene singa en ele mun humdoho ngaruruk anyo hag, ele humon isi mu, ululu sabirenam ele sipuk-duruk mu nesanggo holdihik.

⁴Ululu sabirenam ele sipuk-duruk mu nesanggo holdihikdeg, an den, Airoho, ulug, lisu balikoho lit duruk men, boholman ele eke hweag-nutuk kwit, “Ululu sabirenam ele uruk mu holehen ai baluk fug. Ite, hendama neg heraho welamag,” ulug, hweag-nitsi.

⁵ Hweag-nitsi mu, malaikat eyog eke ik laut emberim fam feheg, eyog eke kwenang fam feheg, duruk kwit, unduhuk wereg ma, hauihik anyo en demdoho boukwag ulug, enggik bekit fil boholma lahabe folug,

⁶bohol inim, boholma wereg on inim, kwenang inim, kwenangma wereg on inim, ik laut inim, ik ahummu wereg on inim, mundoho wal-debag on at mundoho eitog oluk wereg anyo unuk hombuk balduk kwit, “Ekenim nangnoruruk kwit, welam fug.

⁷Ite, at Allah en at awene heraho welatfag on it at amingming angge en hweag-esauk katfag anyo, it malaikat enebe sabiren anyo eke sabit on anyo en bohweap trompet owan fururuk eleg ma fururuk salim, wene anyo dip-uhu,” ulug, uruk mu, holdihik.

⁸ Holdihikdeg, ai en boholma ele eke hweag-nutuk mu holdihik anyo, ekenim hweag-nutuk kwit, “At malaikat eyog eke ik laut emberim fam feheg, eyog eke kwenang fam feheg, duruk kwit, unduhuk wereg anyo, buku baleg hwililipdeg on dorangge enggikmu fisela-debelug wereg ai, wag lakin,” ulug, hweag-nitsi.

⁹Hweag-nitsi mu, malaikat anyo akit lauihikdeg, “Buku baleg hwililipdeg dorangge ai og-nimin,” ulug, heng-dirihik mu, aren og-nutuk kwit, “Oko nakin. Namihin men, hambilikmu unduk kin ahalue hag mitdeg ma neg-hamihin famen, hahummu neg de unduk alereg ma hamihin,” ulug, hweag-nitsi.

¹⁰Hweag-nitsi mu, buku anyo malaikat enggikmen oko nauihikdeg, nambilikmu unduk kin ahalue hag mitdeg ma neg-hauihik famen, bil-halug, nahummu wambisi mu, unduk alereg ma hauihik.

¹¹Buku nauihik mu, boholma ele eke hweag-nutuk mu hauihik anyo en, ekenim hweag-nutuk kwit, “Ap homi enahap enemu hundomog inim, it ap homi munobam manobam humdoho wereg inim, it ap homi enele enemu domog humdoho inim, it ap enunuk bogdeg inim, Allah en duhu wene su mundoho hweag-esauk karuhun,” ulug, hweag-nutuk mu hauihik.