Read Ninia Yali WAHYU 11 Bible Online

WAHYU 11 - Ninia Yali bible

WAHYU 11

¹ Ai hweag-nutuk mu hauihikdeg, domuk hag ilirangge eke og-nutuk kwit, “Ahwi. Allah obam wirig inim, Allah andomba waroho indok yaldukmu inim, ilirangge wal-heheg, ne, ap homi Allah obam wirigmu Allah mot-dik kuruk on enebe wenag-eseheg, dil lakin.

² Dil lauk kwit, Allah obam wirig bumbukmu etano, it ap homi dagma on en o kota fano Allah obahet eneko wereg etano bigalem 40 en enam dauk kweleg, eneyog en siahapdoho sobitil lauk kamag ulug fesesi mu, wal-ha fug, embesein.

³Ne, it ap enebe biren eke nawene hweag-esauk kamag ulug mon-enepuk on anyo en ap homi enelaheg en karung hag belahi sum orohole sing on wandeg lit, nukoho enenggik 1260 hari duruk kwit, hweag-esauk kamuhup en unduhuk fesehuk,” ulug, hweag-nutuk mu hauihik.

⁴ E zaitun biren inim, ne, lampu owag biren inim, at di angge su angge kwenangma on mundoho hwalduk on Tuhan apma wereg anyo hag, it Allah wene hweag-esauk enap enebe biren ai.

⁵It ap eke en, “It biren anyo enowatul,” ulug, duruk halug, it ap biren ai, enambilikmen indok ambulbul wilibik waharuk kwit, it inim minggirig on yonggwaloho enowatil lauk karuhu. Aireg ma, ap eke en, “Enowatmin,” ulug, duruk men, airoho neg wararuhu.

⁶ It ap biren anyo, it enendan bolug, “Nit wene owan hweag-esauk kwit wereg kweleg, osit nauk kam fug,” ulug, uruk halug, osit na fug angge hobi neg welaheg, ne, iren, “Di ahaik su ahaik mep amag,” uruk halug, mep neg aheg, ne, iren, “O kwenangma suma ouk nigon ap homi wat-enebil wamag,” uruk halug, ouk neg mondorik waheg, airoho neg dil noruk kamag ulug, Allah en unduhuk feseruk mu hauihik.

⁷ It ap biren anyo wene hweag-esauk kamag ulug, mon-enepsi anyo ahae fotogdoho hweag-esahup mu, maro nigon hag bohwe elma oholuk mun yatdeg etano en lahaik watlug, it ap biren anyo mug-eneplug lahureg, weim apuk kwit, sebele feselug enowaruhu.

⁸ Ware feselug, enebe wareg anyo filik amag ulug, o kota humon, Tuhan e salib fam watswama etano embesehup. O kota humon ai, it foman wene hwenaroho uruk kwit, unuk Sodom eheg, unuk Mesir eheg, ulug, urukmu etmano enebe embesehup.

⁹Embeselug wereg ma, tiga setengah hari owan duruk kwit, it di ap homi su ap homi enahap enemu hundomog inim, enunggul unuk humdoho domog inim, it ap homi munobam manobam wereg on inim en enebe wareg anyo, Sal-enebuk fug, ulug, owikmu kwelabe fesouk fug angge wereg lit, fu esa waheg, duruk kamuhup.

¹⁰It ap homi o kwenangma suma wereg anyo mundoho en, “It Allah wene hweag-esauk enap biren su en uruk katswa fam anggin-fanggin mun nigon nenobam mondorik waheg duswa ma, iyale fano waratswa,” ulug, enahayeg humon beil lauk kwit, soni esag-deheg, enengge it-it yohwan-deheg, duhup.

¹¹ Duhup famen, tiga setengah hari owan duruk kweleg, at Allah en it ap biren anyo enebe enoluk apdoho sat kwelap-enebik waruhu mu, it biren enoluk inamuhup angge re, it di ap homi su ap homi inil esauk kwit, “Yehei u,” ulug, enakol humon owan boruk kamuhup.

¹² Boruk kweleg, ai en ele humon eke boholman it ap biren hweag-esauk kwit, “Hit ap biren su, suma lahaik manik,” ulug, hweag-esahu mu, it ap homi, “Iyale fano waratswa,” ulug, bohup on mundoho inil hanim hena anggelegma boholma laharuk mu hahup.

¹³ Eta li airoho owan duruk kweleg, meik humon lang-duruk kwit, ap homi enobam wirig anyo foma sohoen minggiroho embeseruk kwit, foma num on anyo meiyaloho wambeheg, ap homi humdoho enebe 7.000 al bereloho sal-enebeheg, duhu halug, it ap homi foma enoluk welamuhup on enakol humon en at boholma wereg Allah anyo leho fohup mu hauihik.

¹⁴“Enelaheg,” ulug, henahanam uruk mu, holdihik anyo bireneg on duruk mu, hauihik anyo hweag-hisihi ai famen, fobik on eke hauihik anyo hweag-hesamin mu, furebeiyek.

¹⁵ Ekenim na og-hauk kwit, it malaikat enebe sabiren anyo eke sabireneg on en trompet ele furisi mu, it boholma on enele humon uruk kwit, “It di ap homi su ap homi, it ap o kwenangma suma enunuk bogdeg enapma welatswa anyo mundoho, ketia Nenakni Tuhan Allah inim, aren eneko unduhuk febag on amloho Kristus anyo inim fahat-enesug kweleg, enele holduk kamag ulug, enapma aik kuswareg wereg. Ne, enapma aik kuswareg wereg ma, at Kristus anyo en bok am fug angge mundoho fahat-enesug laruhu” ulug, uswa.

¹⁶Airoho uswa ma, it boholma wereg on enowesi enebe 24 en Allah alukwe fil takhta fam hwerieg wereg anyo en, Allah apma enorohole belaboho sebe ulug, Nenakni Allah mot-duruk kwit,

¹⁷“Hat Nenakni Tuhan Allah, ya u i, homamne along humon deg lit, atam welatihindeg, ketia higitdoho heitog welahen. Hat di ap homi su ap homi mundoho enowe hunuk bogdeg lit, fahat-enesug laruhuk ulug, honggwareg unduhuk fahat-dauihin mu, dang-hapuk kahe.

¹⁸ Di ap homi su ap homi mundoho enolok en, At Tuhan en fahat-nenesug welam ale nenerim, ulug, il lauk anyo, haren holok enobam feseik waheg, it ap homi warail lausa on enawene bilinggoho ayo wiroho en-enebeheg, it hamingming angge nabi anyo inim, it hat homaliki demdoho boruk on inim, it hat hunuk halug hanggilug boruk on inim, it enunuk leho on inim, enunuk sebeleg on inim, mundoho fano duswa halug, onggo higitdoho debeseheg, it o kwenangma siahapdoho foruk on siahapdoho feseheg, duhun sali horog aik wahasi mu, dang-hapuk kahe, ya u i,” ulug, mot-duswa.

¹⁹ Airoho mot-duswa ma, Allah obam wirig boholma etano sok husisi mu, Peti Sali wareg fam yohwareg anyo o ilonggoma enam atuk mu, nil hauk kweleg, oeal lepeng-heheg, ululu aplohok sipuk-deheg, o meik lang-deheg, osit lumbiak nenggeg, duruk mu hauihik.