Read Ninia Yali WAHYU 12 Bible Online

WAHYU 12 - Ninia Yali bible

WAHYU 12

¹Ai en, boholma etma enakol wereg on duk fug alereg on eke humon duruk mu hauihik. Hauk kwit, hwe eke bigalem ebe fam unduhuk lit, asum hag mo wandeg, ne, sohwalanggen nesanggoen kware-kware hag bugdeg ma hauihik.

²Hwe anyo ahummu omalik welatsi mu, omalik enderukwag ulug, il fenggen atsi mu ouk nenek duruk kwit, ele ngarisi.

³ Ai en, boholma etmano enekol wereg on duk fug alereg on amu on eke duruk mu hauihik. Hauk kwit, manu mebon humon ebe misig famen, unggul sabiren, ne, andimuk numen wereg ma hauihik. Ne, eke unggul sabiren anyo fam kware-kware sabiren bugdeg ma hauihik.

⁴ At manu anyo en ahae kwearuruk kwit, sohwalanggen boholma wereg on foma biren hag wereg kweleg, minggiroho eke neg sepertiga anyo loloho kwenangma belabik wahasi. Belabik wahasireg, “Hwe anyo omalik endetuk halug, an bil-hamin,” ulug, hwe omalik enderikoho lit duruk mu, aluluk kahalik wahasi.

⁵ Wahasireg wereg ma, at ap domuk bosie on enggikmu wereg lit, di ap homi su ap homi mundoho apma feselug fahat-enesug welamag ulug, at hwe anyo en ap omalik endetsi men, omalik anyo hamboko walug, at Allah fahat-enesugmu takhta at Allah akit feik lahasi.

⁶Feik laharuk kweleg, at hwe anyo o leimu ap homi elegma welamag ulug, Allah en obale eke buhundoho fesesimu etma longgo ik lasireg wereg ma, foroho wereg kweleg, 1.260 hari wereg ma hauihik.

⁷ Ai duruk mu hauihikdeg, boholma etmano dog apuk mu esauihik. Hauk kwit, at Mikhael autsi malaikat omano inim en, manu humon anyo autsi inim dog abeheg, duswa famen,

⁸it Mikhael autsi anyo inim en manu anyo autsi inim sebele feseswareg, “It boholma welam siag,” ulug,

⁹ at manu humon anyo autsi inim boholman belabik wahausa. Manu humon belabik wahausa anyo o endamet angge di ap homi su ap homi mundoho lal-faldoho enebil noruk katsi on unuk Iblis, eke unuk Setan at deg ma, at autsi mundoho inim lisoho o kwenangma belabik waharuk mu hauihik.

¹⁰ Belabik waharuk mu hauihikdeg, ele humon eke boholman uruk kwit, “At Nenakni Allah il hanim hupmu hubet nenori nenerekwi Allah omaliki wene enobam dopno-eseheg duruk on anyo, mundoho belabik wahausa ma, at Nenakni unuk bogdeg raja Allah omamne fam Iblis sebeloho folug, enahap wendat-enebeheg, di ap homi su ap homi mundoho apma feseheg, ne, di ap homi su ap homi mundoho en at Allah en eneko unduhuk febag on Kristus neg anggilug boruk kwit, at ele holduk kamag ulug, debeseheg, deheik su.

¹¹It nenori nenerekwi Allah omaliki anyo en Allah andomba amep enobahet wilipsi wene demdoho bolug, enenda ai fam furebeheg, ne, Nenowaruhup fano, ulug, inili og-da fug angge Allah wene walug fag-dil laheg, duruk kwit, Iblis anyo sebeloho fousa.

¹²Sebeloho fousa ma, hit o boholma welahep on su, henahayeg boruk kamluhup famen, hit kwenangma welahep on inim, ik laut fam welahep on inim, at Iblis anyo en, An dorangge neg welatlug nonggwareg eleg aruhuk, ulug, olukdeg lit en, olok humon beil henenggelegma wambik wahasi mu, henelaheg,” ulug, boholman ele uruk mu hauihik.

¹³Ne, at manu anyo en, “An kwenangma mundoho belap-nabik wahesa hihi,” ulug, furebesireg, at hwe, ap omalik endetsi on anyo, mutlug lasi.

¹⁴ Mutlug lasi mu, manu en hwe anyo seneruk no, ap homi elegma welamag ulug, at Allah en obale buhundoho fesesimu daroho lowag ulug, suwe ikwesahop ahwerabul on og-itsi mu daroho etma lasireg, Allah en foroho kweleg, tiga setengah tahun wereg ma hauihik.

¹⁵Ne, hwe anyo lauk kweleg, ik fu en hwe anyo harulug lowag ulug, manu anyo en ik eleruk humon hag, ambilikmen ik luko mondorik lasi.

¹⁶Airoho mondotsi famen, ap homi en hwe anyo ebe deluk hag kwenang belangdoho ik anyo belapsi mu, eleg atuk mu hauihik.

¹⁷Airoho eleg atuk mu, manu anyo en hwe anyo fahet olok humon beil lauk kwit, it Allah en, Diroho diyug airoho diyug, ulug, wene melale nenobahabag wene furoho dil laheg, it Yesus en wene fagdoho hweag-esasi wene demdoho bolug fureberuk kwit, higitdoho dil laheg, duruk on mundoho hwe omaliki it neg deg ma, inim weim yapuk katmin, ulug, mug-eneplug lauk mu hauihik.

¹⁸Ne, manu anyo lauk kwit, ik laut inggimu etmano inaik[6] lauk mu hauihik.