Read Ninia Yali WAHYU 13 Bible Online

WAHYU 13 - Ninia Yali bible

WAHYU 13

¹ Ai duruk mu hauihikdeg, ik laut famen olomene hag eke wilibik waharuk mu hauihik. Ne, at olomene anyo unggul sabiren wereg kweleg, andimuk numen wereg ma hauihik. Ne, andimuk numen anyo hundomog fam kware-kware bugdeg, ne, unggul sabiren anyo hundomog fam Allah unuk siahap-biahapdoho foruk on ulug lisu baleg ma, hauihik.

² Ne, olomene hag olok humon ikman wilibik waharuk mu hauihik anyo, orohole olomene humon macan tutul hag wereg lit, eyog de bak humon beruang eyog hag, ne, ambilik de olomene singa ambilik hag hauihik. Ne, manu humon anyo en, “An nomamne nalong deg lit, an nawene melal-enepuk kwit, welahimu takhta anyo, hat nobalma welatmihin en, unduhuk hobahaki,” ulug, olomene anyo unduhuk foruk mu, hauihik.

³Hauihikdeg, olomene unggul sabiren anyo eke misig binggi watswa ma, mun waralep famen, oluk atsireg watswama fano ahumbut atlug ebe oluk atsi mu, it di ap homi su ap homi kwenangma on mundoho enakol en, “Yehei u!” ulug, olomene anyo mutlug lauk mu esauihik.

⁴Mutlug lauk kwit, manu humon anyo en at olomene ikman wilibik wahasi on kain unduhuk fesi mu, manu humon anyo apne weheg, ne, olomene anyo mel apne wauk kwit, “Olomene olok humon hag eke wereg eleg ma, sa mel en inim weim abuk alereg behep?” ulug, apne weheg, duruk mu esauihik.

⁵ At olomene ikman wilibik wahasi anyo en, bigalem 42 en enam atuk kweleg, leho fahat-dauk kwit, Allah unuk siahap-biahapdoho foruk kamag ulug, debesi.

⁶Debesi mu, wereg lit, olomene anyo en ele il lauk kwit, Allah ebe inim, Allah unuk inim, Allah weregma inim, ne, it boholma wereg on inim, mundoho, ele fam siahap-biahapdoho feseil lauk mu hauihik.

⁷ It ap homi enunggul unuk domog inim, it enahap enemu hundomog inim, it enele enemu hundomog inim, it ap homi di obam su obam wereg on mundoho inim olomene olok humon anyo apma sebele feselug, it demdoho boruk on Allah omaliki inim weim apuk kwit, mun sebeloho fesoukwag ulug, debesi.

⁸ Debesi mu, it ap homi enoluk mundoho welamuhup ulug, Domba omalik watswa anyo en bohol kwenang owan wal-duk fug mu buku fam enunuk balfag on anyo neg, olomene anyo mot-duk fug angge wereg kweleg, it ap homi kwenangma wereg on humdoho en olomene anyo unuk mot-duruk mu esauihik.

⁹ An den wene hweag-hesamin su. Hit Allah omaliki seneko sabu hetdoho kwelap-henebuhup ulug, wereg halug, airoho neg deheg, ne, karog yaron fam binggi henowaruhup ulug, wereg halug, airoho neg henowareheg, duhup mu, hahup angge re, hit henenda Allah obam henomamneroho dip-debelug, henenda hambukdeg lit, wauk kamuhup, ulug, hweag-hisihi mu, henesanggo holuk alereg halug, furoho holduk nu.

¹¹Ai en, an ekenim na og-hauk kwit, fobik en olomene eke kwenang elman lahaik waharuk mu hauihik. Ne, olomene anyo unggulmu domba omalik andimuk hag, andimuk biren wereg ma hauihik famen, ele re, manu humon ele uruk hag uruk mu hauihik.

¹²Olomene ikman wilibik waharuk mu atam hauihik anyo il hanim, olomene fobik hauihik anyo en onggwareg higitdoho neg unduhuk wereg lit, it ap homi kwenangma on mundoho hweag-esauk kwit, “Olomene binggi watswa ma waralep famen, oluk atsireg watswama fano ahumbut atlug ebe oluk atsi anyo apne wauk kamek,” ulug, ele omamne fam hweag-esauk mu hauihik.

¹³Ne, at olomene fobik kwenang elman lahaik waharuk mu hauihik anyo en enekol wereg on duk fug alereg on dil lauk kwit, ap homi mundoho inil hanim indok ambulbul boholman kwenangma belabik waharuk mu hauihik.

¹⁴Ne, olomene atam ikman wilibik waharuk mu hauihik on il hanim, enakol wereg on duk fug alereg on duruk kamag ulug unduhuk fesi anyo dil lauk kwit, di ap homi su ap homi kwenangma on lal-enepsireg, hweag-esauk kwit, “Hiren an nare olomene eke karog yaron fam binggi watswa ma waralep famen, fano ahumbut atlug ebe oluk atsi anyo ahut wal-heheg, ilirangge apne wauk kamuhup en buhun-duluhup,” ulug, hweag-esasi.

¹⁵Hweag-esasi mu, ilirangge buhun-duswa ma, ilirangge anyo en ele eheg, it ap homi ilirangge anyo apne waul fug boruk on enowareheg, duruk kamag ulug, olomene fobik kwenang elman lahaik waharuk mu hauihik on en, ambilik ahae ilirangge endama kwelabukwag ulug, omamne og-utlug unduhuk fesi mu hauihik.

¹⁶Ne, at olomene fobik on en it ap enunuk sebeleg inim, it ap enunuk bogdeg inim, it enenggik wereg on inim, it enenggik eleg on inim, it ap homi wundet-angge on inim, it enamingming angge on inim, mundoho enenggik bekit fil fam ane, enelaha fam a, enehaleroho lisu bale feseil lauk kwit,

¹⁷“It ap homi an nunuk a, nunuk obalma nomor ane, eneg angge lisu baleg eleg halug, enengge onggo bal-deheg, di angge su angge hundureheg, duhup fug,” ulug, melale feseil lauk mu, hauihik.

¹⁸Airoho duruk mu hauihik anyo, it enenda wereg on en neg furebouk alereg. At olomene anyo en nomor bale fesi ai, ap homi en ap eke unuk obalma wal-heheg wenaharuk anyo on 666 deg ma hit fureberuk kahep on en wenggeliek.