Read Ninia Yali WAHYU 14 Bible Online

WAHYU 14 - Ninia Yali bible

WAHYU 14

¹ Ai duruk mu hauihikdeg, ekenim na og-hauk kwit, it ap enebe 144.000 anyo, Domba omalik unuk inim, Akni unuk inim, enemu domog enelahama lisu baleg wereg on Domba omalik inim Duk Sion fam unduhuk wereg ma esauihik.

²Esauihikdeg, ekenim na og-hauk kwit, ik hul humon wamburuk kwit, aplohok dung-dung eheg, ululu aplohok humon sipuk-deheg, duruk anyo hag o boholman ap humdoho en kitar kecapi kweng-duruk mu, ele uruk anyo hag, ele eke uruk mu holdihik.

³Holduk kwit, at ap homi fahat-enesug lit, takhta fam hwerieg anyo inim, ap homi enapeleg on enoluk wereg enebe ohwan anyo inim, it boholma on enowesi anyo inim inil hanim suni nigon uruk mu holdihik. Ne, suni nigon holdihik ai, it ap homi hesangge on en enoluk am fug alereg. Ite, it ap homi kwenangma on enesahalimen enebe 144.000 enonggo baloho enahap wendaroho fesesi anyo neg enoluk atlug uruk mu esauihik.

⁴It ap ai, homi ahap enapelegdeg lit, homi hwela fug angge enebe siahap-dausa fug. It ap ai, Domba omalik o kema-kema lauk halug, at mutlug laheg neg duruk. It ap ai, di angge su angge atam on Allah obahet foruk hag, it anyo neg Allah inim, Domba omalik inim, enobahet eneko welamag ulug, ap homi enesahalimen enonggo baloho enahap wendaroho fesesi.

⁵ Fesesi anyo seiale eke uk fug angge welatswa ma, siag eke enobam dopno-esa fug alereg ma esauihik.

⁶Ai esauihikdeg, malaikat eke bohol bik-bul kwe darulug, it di ap homi su ap homi kwenangma on anyo, it di obam su obam wereg on inim, it enunggul unuk humdoho domog inim, it enele enemu domog inim, it enahap enemu domog inim, enesanggo holukwag ulug, wene Fano Wene mundoho welaruhu on hweag-esamin ulug, lauk mu hauihik.

⁷Ne, hweag-isil lauk kwit, “Allah en henawene bilinggoho ayo wiruhu en-henebuhu salim horog aik waha ma, at bohol inim, kwenang inim ik laut inim, ik eleruk on inim, wal-debag anyo apma sebe ulug, mot-deheg, Allah henakol boruk kwit, at neg leho feheg, duruk kamek,” ulug, ele humon fam hweag-esauk mu hauihik.

⁸ At hweag-esasi mu, are malaikat eke bireneg on ombolim il lauk kwit, “It ap homi o kota leho on Babel wereg on en duruk ai, it hwe hambena on hag deg ma, ahalue wenenebo enepuk on homoroho nauk halug hesangge dil lauk anyo hag, homi hesangge enebil laheg, enenda nauk halug neg dil laheg, duruk kwit, nit duruk kahe su, it di ap homi su ap homi munobam manobam wereg on mundoho, higitdoho neg dukwag ulug, debesousa ma, enobam inim, enebe inim, mun lilibuk-lalabagdoho eleg ahesa. Mun lilibuk-lalabagdoho eleg ahesa!” ulug, il lauk mu holdihik.

⁹It malaikat biren anyo airoho il lausa ma, enare eke henahaneg on enombolim il lauk kwit, “It ap homi en olomene inim, ahut wal-heheg buhundeg anyo inim apne weheg, ne, at omaliki ulug enehaleroho welamag ulug, enelahama ane, enenggikmu a, unuk balukwag ulug, fano beheg, duruk halug, diroho enebuhu.

¹⁰ Ap homi anggur ahalue ik inim hwenangguk fug angge bekit nauk kwit, unduk ale humon neg-hauk anyo hag, Allah en it ap homi ai, enelaheg bouk fug angge olok humon enobam feseruk kwit, indok ambulbul inim, amben siag angge orohole selon belerang inim, enobam fesehu mu, iren it malaikat Allah obahet eneg wereg on anyo inim, Domba omalik inim, inil hanim ouk humdoho nenek duhup.

¹¹ Ai en, it ap homi en olomene inim, ahut wal-heheg ilirangge buhundeg inim, mot-duruk on, it at omaliki ulug enelahama ane, enenggikmu a, unuk enehaleroho baleg wereg on mundoho, Allah olok en enobam indok fesesi mu, hup anggo inim, nukoho inim, it kel wat-da fug angge ouk nenek duruk kweleg, hobu anyo eleg am fug angge mundoho lahakeg neg duruk karuhu,” ulug, uruk mu, holdihik.

¹²Aireg ma, it ap homi Allah en, Diroho diyug, airoho diyug, ulug, wene melale fesebag wene furoho dil laheg, Yesus demdoho bolug, obam dip-debeheg, duruk on Allah omaliki anyo en enenda Allah obam enomamneroho dip-debelug, enenda hambukdoho welamag.

¹³Ai en, boholman ele eke uruk kwit, “Ketian it ap homi Tuhan inim hundig lit, waramuhup anyo, enahayeg boruk kamuhup, ulug, lisu balin,” ulug, hweag-nitsi mu, Allah Aheime en, “Demdoho ehen. Iren Allah eyabuk asingsing basingsingdoho duruk kamuhupdeg waramuhup mu, Allah en onggo higitdoho debesehu mu, it yabuk anggin on mun debelug, kel wat-dauk kamuhup angge re, enahayeg,” ulug, uruk mu holdihik.

¹⁴ Wene airoho uruk mu holdihikdeg, ekenim na og-hauk kwit, ap endag-aik wahasi on anyo kware-kware mahkota emas on unggulmu wandeg, ne, karog kwandik on sabit olok lebe-lebe on enggikmu foroho lit, anggulog kuron fam hwerieg ma hauihik.

¹⁵ Hauihikdeg, ai en, malaikat amu on eke Allah obam wirigmen wilibik watlug, ele humon fam at anggulog fam hwerieg anyo hweag-utuk kwit, “O kwenangma yahainma anggen yihig mundoho wirik atsi mu, balduk sali horog aik waha angge re, balduk katmihin en henggarog walug balik wambin,” ulug, hweag-itsi.

¹⁶Hweag-itsi mu, at anggulog fam hwerieg anyo en enggarog lebe-lebe on anyo walug kwenangma anggen yihig anyo balik wambisireg, mundoho baldil lauk mu hauihik.

¹⁷Ai en, boholma Allah obam wirigmu etman malaikat eke en karog sabit lebe-lebe on eke enggikmu walug wilibik waharuk mu hauihik.

¹⁸Ne, malaikat amu on eke Allah andomba waroho indok yaldukmu hwalduk on anyo yaldukmu etman wilibik watlug, at malaikat enggarog lebe-lebe on Allah obam wirigmen wilibik waharuk mu hauihik anyo, ele humon fam hweag-utuk kwit, “O kwenangma yahainma anggur anggen yihig anyo mundoho wirik atsi mu, baloho andog-dimihin en hanggarog walug balik wambin,” ulug, hweag-itsi.

¹⁹Hweag-itsi mu, at malaikat anyo en enggarog lebe-lebe on anyo walug, kwenangma anggur anggen balik wambulug, anggur anggen abirangge baloho feil lasireg, Allah olok hape on en sahal-fahaldoho berelukwag ulug anggur ahalue bereldukmu etmano belabik lauk mu hauihik.

²⁰ Belabik lasi mu, anggur anggen bereldukmu o kota dag fikit eneyog en berelduk men, ap homi enamep ik eleruk on lauk hag, ambut fil 300 kilometer hag wirig-aik lauk kwit, ik ahum il yatdeg 2 meter hag laharuk mu hauihik.