Read Ninia Yali WAHYU 15 Bible Online

WAHYU 15 - Ninia Yali bible

WAHYU 15

¹Ai en, fobik boholman enakol wereg on mun alongdeg ma yanderuruk on eke duruk mu hauk kwit, it malaikat enebe sabiren en ap homi ouk anggin-fanggin enobam fesoukwag ulug ouk indip sabiren hwalduk mu esauihik. It malaikat sabiren su en ap homi ouk enebukwag ulug ouk sabiren anyo enobam feseik waharuk mu, ap homi ouk nenek dil lauk kweleg, Allah olok enobam wereg anyo o ahae fotogdoho debesehup mu neg de, Allah endama olok boruk anyo eleg aruhu.

²Ai hauihikdeg, ik sene humon yenggeleg famen, orohole inapumag hag anyo anggelegman indok ambulbul ulog duruk kweleg, it ap homi en olomene ikman wilibik waharuk mu atam hauihik anyo inim, ahut wal-heheg ilirangge buhundeg inim, apne wa fug angge wereg lit, at omaliki ulug, enehaleroho unuk enelahama ane, enenggikmu a balukwag ulug, wausa fug anyo, ik aegma Allah anggitar kecapi enenggikmu foroho lit, unduhuk wereg ma esauihik.

³ It ik aegma airoho unduhuk wereg lit, Allah amingming angge Musa asuni inim, Domba omalik asuni inim, uruk kwit, diroho uruk katswa. “Allah Nenakni Raja welahen, o i, homamne along humon su, hat duruk kahen anyo mun alongdeg ma, ap homi en yande-hapuk kwit, wereg. Di ap homi su ap homi[7] abirangge, munobam manobam wereg on mundoho, enakni raja hat wereg lit, dipdoho neg debeseheg, duruk kahen, demdoho neg deheg, duruk kahen.

⁴ Hat hamu neg siag duk fug angge, hat fano neg welahen ma, it ap homi sa mel en hag, mot-habuk fug angge welam alereg? Hat hanggilug boruk kwit, hunuk leho fouk fug angge welam alereg? Mun eleg, Haren ap homi duruk esalug, enewene biling-enepuk kwit, ayo wiroho en-enepuk kwit, dipdoho neg debeseruk kahen anyo heausa ma, di ap homi su ap homi abirangge, munobam manobam wereg on mundoho, hakit watlug, mot-hapuk kamuhup, o i,” ulug, suni airoho uruk mu esauihik.

⁵ Airoho uruk mu esauihikdeg, boholma Allah obam wirigmu sok hut-atuk mu, Allah nimim wereg boukwag ulug, o sabo sum fam wirig kemah anyo ilonggoma wereg ma fu hauihik.

⁶Airoho sok husig wereg ma, it malaikat enebe sabiren ap homi ouk anggin-fanggin enobam fesoukwag ulug, ouk indip sabiren hwalduk kwit wereg anyo, enesum lahabeg sum kuron helag-felag angge duruk on yihig on wandoho, ne, enombahaluk emas fam buhundeg on enemig kwe bugdeg lit, etman wilibik waharuk mu esauihik.

⁷Wilibik wahausa ma, it ap homi enapeleg on enoluk wereg on enebe ohwan omano on misig eke en, at oluk mundoho eitog wereg Allah olok ap homi enobam fesoukwag ulug, waruk emas on fam ahalue ele sopdoho hwenanggeg angge, it malaikat enebe sabiren anyo hundomog og-esauk mu hauihik.

⁸ Og-esauk mu hauihikdeg, Allah mun omamne humdeg lit, ebe mun leho wereg man, hobu laharuk kwit, Allah obam wirigmu mundoho hopo isi mu, it malaikat enebe sabiren anyo en ouk indip ap homi enobam o ahae fotogdoho owan feseruk eleg kweleg, ap homi en Allah obam wirigmu kuk fug ale atsi mu hauihik.