Read Ninia Yali WAHYU 16 Bible Online

WAHYU 16 - Ninia Yali bible

WAHYU 16

¹Ai duruk mu hauihikdeg, Allah obam wirigmu etman ele humon it malaikat enebe sabiren anyo hweag-esauk kwit, “An Allah nolok ap homi enobam fesoukwag ulug, waruk sabiren fam hwenanggeg anyo, walug, ap homi kwenangma yahainma hililoho feil lakiek,” ulug, hweag-esauk mu holdihik.

² Airoho hweag-esasi mu, malaikat enebe sabiren anyo eke atam on en Allah olok waruk fam hwenanggeg anyo walug, ap homi kwenangma enobam hililoho feil lasi mu, it ap homi olomene anyo omaliki ulug, unuk enelahama ane, enenggikmu a, lisu baleg wereg lit, ahut wal-heheg ilirangge buhundeg anyo apne wauk on enebene burag mun siag on saha uruk mu hauihik.

³Ai duruk mu hauihikdeg, malaikat enebe sabiren anyo eke bireneg on en Allah olok waruk fam hwenanggeg anyo walug, ik laut anyo fene hililoho feil lasi mu, ik anyo, ap enowatuk mu enamep orohole hag atsi mu, ik ahummu noruk angge mundoho warail lauk mu hauihik.

⁴ Ai en, malaikat enebe sabiren anyo eke henahaneg on en Allah olok waruk fam hwenanggeg anyo walug, ik eleruk fil inim, ik ambut fil inim, di ahaik su ahaik fam hililoho feil lasi men, ik mundoho mep neg atsi.

⁵Atsi mu, at malaikat ik hwalduk on en uruk kwit, “Atam welatihin, ketia welahen, hat Nenakni Allah siag duk fug angge mundoho heitog fano neg wereg lit, dipdoho neg debeseruk kahen ma, it siag duswa onggo holok en, enobam feseruk kahen su, fano duruk kahen hiihi.

⁶It demdoho boruk on hat homaliki inim, it hat hawene hweag-esauk enap nabi inim, enowatuk kwit, enamep hililoho fousa anyo, onggo ik nauk kamag ulug, ik mep apdoho feserihin fano. Enobabe en hihi,” ulug, isi.

⁷Airoho isi mu, Allah andomba waroho indok yaldukmu etmano, ele eke uruk kwit, “Demdoho eheik. Nenakni Tuhan Allah homamne along humon su, ap homi duruk esalug, enawene bilinggoho ayo wiroho en-enepuk kwit, demdoho neg, dipdoho neg, onggo debeseruk kahen ma, demdoho eheik,” ulug, uruk mu holdihik.

⁸Airoho uruk mu holdihikdeg, malaikat enebe sabiren anyo eke ohwaneg on en Allah olok waruk fam hwenanggeg anyo walug, hililoho mo fam monde fesi mu, mo olok en ap homi enahap hanonggo enebukwag ulug, mo anyo fut-nget humon atsi.

⁹Mo fut-nget atuk kwit, olok humon en ap homi enahap hanonggo enepsi men, ap homi en uruk kwit, “Allah en along wereg lit, di ouk su ouk nenobam feik wahasi mu, nit siag duruhuk anyo su, embeselug, at unuk leho foruk kamul,” uk fano famen, uk fug angge wereg lit, enesiag enenda hundig fam foroho lit, Allah unuk hururungdoho feheg neg duruk mu esauihik.

¹⁰ It malaikat enebe sabiren anyo eke foap on en Allah olok waruk fam hwenanggeg anyo walug, olomene ikman wilibik waharuk mu hauihik anyo en ap homi fahat-enesugmu takhta anyo fam inim, it ap homi at apma wereg lit, at ele wauk on inim, mundoho enobam hililoho feseil lasi. Enobam hililoho feseil lasi mu, o it weregma o hup atsi mu, it ap homi en ouk nenek duruk kwit, enambilik anggen enaeg en sahalduk katswa.

¹¹Ai en, iren, “Nit siag duruhuk anyo embesoukohon,” uk ale fano famen, uk fug angge wereg lit, enesiag enenda hundig fam foroho lit, burag siag on enebene saha eheg, ouk enebeheg, disi anyo fahet, Allah boholma wereg on hururungdoho feheg neg duruk mu esauihik.

¹² It malaikat enebe sabiren anyo eke folfalik on en Allah olok waruk fam hwenanggeg anyo walug, ik humon Efrat fam hililoho feil lasi. Hililoho feil lasi mu it ap enunuk bogdeg mo indip fil en dombon kwe ai fam wamag ulug, ik anyo mundoho firitog atuk mu hauihik.

¹³Ai hauihikdeg, manu humon anyo inim, olomene ikman wilibik waharuk mu hauihik anyo inim, ne, ap Allah wene hweag-esauk hag famen, seiale wene hweag-isil noruk on nabi palsu anyo inim, enambilikmen orohole yahaye hag mungguat siag on henahan wilibik waharuk mu hauihik.

¹⁴Enambilikmen wilibik waharuk mu hauihik ai, mungguat siag on enakol wereg on duk fug alereg on dil noruk on it. Ne, it ai dil noruk kwit, Nenakni Allah omamne along humon anyo o ahae fotogdoho duhu salim, inim dog abuhuk ulug, it ap homi kwenangma on enowesi enunuk bogdeg mundoho yonggo feseil noruk.

¹⁵ Ai en, ele eke en uruk kwit, “Yaho! Ap herahaik kuruk on enapeleg man kuruk anyo hag, hit ebereg eleg ma waharuk kahi. Ai halug, ap homi inil hanim henebienggohouk wereg ma hesalug, henenggali behep ha no en, an waharuk nealug, henape enggatdoho henesum dukdoho fahat-dalug hwal-dauk kwit, nangno-nusug welamuhup halug, henahayeg hahup,” ulug, uruk mu holdihik.

¹⁶ Ne, it mungguat yahaye hag anyo en ap kwenangma on enowesi enunuk bogdeg mundoho o unuk it Ibrani enele fam Harmagedon etmano kabog-enepuk mu hauihik.

¹⁷It malaikat enebe sabiren anyo eke sabit on en Allah olok waruk fam hwenanggeg anyo walug, o kolokwe hililoho feil lasi. Feil lasi mu, at Allah obam wirigmu Allah en ap homi fahat-enesugmu takhta fam etman ele mun humon fam uruk kwit, “Mun ahae fotogdoho debehi o,” ulug, isi.

¹⁸ Isi mu, oeal lepeng-heheg, ululu aplohok humon sipuk-deheg, ne, o walhilmu ap homi wal-enepfag hwili en bekit ketia, airoho eke disi fug famen, o meik humon nigon dil waharuk kwit, kwenang mun lang-fang deheg, duruk mu hauihik.

¹⁹ Ai duruk kwit, o kota humon anyo, kwenang belang-duruk kwit, o ebe minggiroho henahan aheg, di o su o kwenangma o kota mundoho meiyal-heg wambil laheg, duruk kweleg, at Allah en, “It ap homi o kota humon Babel anyo re, duruk katswa ale an den ebereg lahi mu, siag onggo an nolok humon en enobam feseruk kahi anyo ahalue hwenanggeg hag wereg ma, abirangge nowag,” ulug, isi mu, airoho og-esauk mu hauihik.

²⁰ Duruk kweleg, ik humon yenggeleg bul kwenang hukdeg pulau mundoho inim, dom mundoho inim, eleg atuk kweleg,

²¹ osit lumbiak anggen mun humon, anggin wal-hauk men 50 kilogram hag, boholman ap homi enobam enowarik wambik wahasi. Osit lumbiak mun nigon alongdoho enowarik wambik waharuk mu halug, it ap homi en Allah hururungdoho foruk mu hauihik.