Read Ninia Yali WAHYU 17 Bible Online

WAHYU 17 - Ninia Yali bible

WAHYU 17

¹ Ai duruk mu hauihikdeg, it malaikat enebe sabiren Allah olok waruk fam hwenanggeg hwalduk on anyo eke an nakit wahasireg, hweag-nutuk kwit, “O kota Babel ik mangno-durukmu o wirig ai, hwe hambena on hwerieg hag deg ma, ap homi kwenangma on enowesi enunuk bogdeg en yarohweik waheg, ne, ap homi ahalue siag on homoroho nalug, wenenebo duruk anyo hag, it di ap homi su ap homi o kwenangma suma wereg mundoho en hwe hambena on anyo inim duruk kwit, deheg, duswa ma, at Allah en hwe hambena on anyo siag onggo obam foruk mu hamihin en, ninim lakohon,” ulug, hweag-nutuk mu hauihik.

³ Hweag-nitsireg, Allah Aheime an nobam aik wahasi mu, malaikat anyo en an og-naplug o leimu ap homi elegma nobahaik lasi mu, olomene olok on eke oruk mebon, ne, unggul sabiren kweleg, andimuk numen wereg, ne, Allah unuk siahap-biahapdoho ulug, ebene unuk humdoho lisu baleg ma, hauihik. Ne, olomene su ambolowag fam hwe hambena on anyo hwerieg ma, hauihik.

⁴ Ne, hwe anyo asum orohole mebon inim, bolu wareg inim, wandoho, ne, alili angge bosie emas on inim, helep orohole ebe on inim, wirili orohole hag mutiara inim, humdoho lahaboho debelug wereg ma hauihik. Ne, airoho wereg lit, at di siag su siag dil lauk katsi on, Allah omaliki en ahaye deberuk on mundoho, waruk bosie emas fam buhundeg eke fam ahalue elesopdoho hwenanggeg hag, enggikmu foroho wereg lit, ap homi en yarog-nabik wamag en, “Di,” uruk mu hauihik.

⁵Ne, hwe anyo elahama, “Hwe hambena on mundoho inim, it di ap homi su ap homi kwenangma on en di siag su siag duruk mu, Allah omaliki ahaye debeseruk anyo inim, enisinga o kota humon Babel anyo an,” ulug, unuk lisu baleg welatsi. Unuk lisu baleg anyo, dot hwenaroho hag baleg ma, ap homi en furebouk fug alereg.

⁶It demdoho boruk on Allah omaliki, it Yesus duruk katsi wene furebelug embesouk fug angge higitdoho duruk katswa ma, hwe anyo en enoware folug enamep hililig fam, anggur ahalue homoroho nalug wenenebo duruk hag, duruk mu hauihik. Hwe anyo airoho wereg ma hauihikdeg humdoho yande-dirihik.

⁷Yande-dirihik men, malaikat og-naplug lasi on anyo en, “Nunggwe fahet yande-duruk kahen? At hwe anyo inim, olomene olok on unggul sabiren kweleg, andimuk numen wereg ma hehen anyo en ambolowag fam hwe walug noruk anyo inim, duruk ale hwenaroho hag wereg man, an fagdoho hweag-hirik.

⁸ Olomene olok on hehen anyo, atam welatfag famen, eleg atsireg, fobik en bohwe elma oholukmu mun yatdeg etman lahaik waruhuk ulug, duruk anyo, Allah en o ahae fotogdoho elehapdoho fohu en wereg. Ne, it ap homi o kwenangma suma wereg on, it o bohol kwenang wal-duk fug mu, enoluk welamuhup ulug, enunuk buku fam lisu baleg eleg on anyo en, olomene olok on anyo atam welatfag famen, eleg atsireg, nin fobik enam aik waruhu angge re, yande-duhup.

⁹It ap enenda wereg on en neg wene hweag-hirihi su furebouk alereg. Olomene unggul sabiren anyo, duk sabiren wal-heheg ulug wereg ma, hwe ai fam hwerieg wereg.

¹⁰Ne, olomene unggul sabiren ai, eke ap homi enowesi enunuk bogdeg enebe sabiren fahet wal-heheg ulug wereg. It enebe foaben ai, enunuk eleg atsi famen, misig eke fobik inaruhu. Ne, misig eke fobik inaruhureg, we dorangge neg welatlug, eleg aruhu.

¹¹Ne, olomene atam welatfag famen, eleg atsi ai, it ap enowesi enunuk bogdeg enebe sabiren anyo on famen, enobalma liginenam inaruhu mu, Allah en o ahae fotogdoho elehapdoho fohu en wereg.

¹² Ne, andimuk numen hehen ai, it ap enowesi enunuk bogdeg enebe numen famen, ap homi fahat-enesug lamag ulug owan unduhuk feseruk eleg. Aireg famen, fobik en enonggwareg unduhuk fesehu mu, olomene olok on anyo inim, it ap enowesi enunuk bogdeg lit, we jam misiham ap homi fahat-enesug welamuhup.

¹³Ne, ap homi fahat-enesug lit, it enunuk bogdeg enebe numen anyo en enenda misig debelug, olomene anyo boruk ale neg duhuk ulug enonggwareg en olomene apma sebele fahat-dahup.

¹⁴Ai en, it inim at olomene olok on inim en, Domba omalik waruhuk ulug, inim dog abik lahup men, Domba omalik anyo, ap homi enowesi fahat-enesug wereg on enakni inim, di ap su ap enunuk wereg on enowe bogdeg inim, at neg deg ma, at omaliki momal-enepsireg, eneyonggo fesi mu, inim furoho dil noruk on anyo, inim wilipuk kwit, olomene autsi inim mun sebele fesehup,” ulug, hweag-nutuk mu hauihik.

¹⁵Hweag-nutuk mu hauihikdeg, at malaikat anyo ekenim hweag-nutuk kwit, “Ik mangno-durukmu hwe hambena on hwerieg hag wereg ma hehen anyo ik ai, it ap homi enahap enemu domog inim, it ap homi humdoho kabogdeg anyo inim, it di obam su obam wereg on inim, it enele enemu hundomog inim, mundoho fahet wal-heheg, ulug, wereg.

¹⁶Ne, andimuk numen hehen anyo, it ap enowesi enunuk bogdeg enebe numen anyo, at Allah en wene ebag ale owan dip-uruk eleg kweleg, it enenda misig debelug, enonggwareg en olomene boruk ale neg duhuk ulug, olomene apma sebele fahat-dalug, Allah endaman wenggeloho febag ale neg dil lauk kamag ulug, it ap enowesi enunuk bogdeg ai enendama wenggel-esasi. Airoho enendama wenggel-esasi mu, it inim, olomene anyo inim en hwe hambena on enenda mundoho enerim boruk kwit, amunangge-manangge lik-loukdeg anyo horoho elehapdoho foruk kwit, ebe abienggohouk doho debelug, ino foma nenggeg, foma indok nowag ulug yaleheg, duhup.

¹⁸Ne, hwe hambena on hehen ai, o kota humon fahet wal-heheg ulug wereg ma, di ap su ap enunuk bogdeg o kwenangma suma wereg on mundoho en hwe su apma wereg lit, at ele holduk kwit wereg,” ulug, malaikat anyo en hweag-nutuk mu hauihik.