Read Ninia Yali WAHYU 18 Bible Online

WAHYU 18 - Ninia Yali bible

WAHYU 18

¹Ai hweag-nutuk mu holdihikdeg, malaikat amu on eke ele omamne fam hweag-esauk kamag ulug, unduhuk fesi mu wereg on anyo, o boholman wambik waharuk kwit, ambogbag helag-felag angge duruk men, o kwenangma mundoho selehap duruk mu hauihik.

² Wambik wahasireg, ele humon fam uruk kwit, “O kota humon Babel anyo mun lilibuk-lalabag aha! Mun lilibuk-lalabag aha su, hweing!” ulug, isireg, “It kota Babel wereg on ai, hwe hambena on hag deg ma, hwe anyo enda nauk kwit, Hambena nabik manik, uruk halug, it di obam su obam wereg on mundoho en, anggur ahalue homoroho nalug, wenenebo duruk anyo hag, hwe anyo inim hesangge dil laheg, di ap su ap enowesi enunuk bogdeg o kwenangma on en hwe hambena dik kweheg, ne, hwe ai hambena dik kuruk kwit, it di o su o toko hwalduk on uang og-esauk fam enenggik werehap deheg, duruk katswa. Airoho duruk katswa ma, o kota Babel lilibuk-lalabag aha ma, at Iblis autsi inim, di mungguat su mungguat inim, di suwe su suwe ap waratuk mu, na waharuk halug, ap homi enamelmel boruk on inim, mundoho it weregma atsi,” ulug, ele humon fam uruk mu holdihik.

⁴ Holdihikdeg, o boholman ele amu on eke en uruk kwit, “Hit an nomaliki on! O kota Babel siag duruk anyo obam loukdoho dil, bohol higitdeg dil laharuk mu, an Allah mundoho ebereg welahi mu, hit inim dil noruk hesalug, it siag duruk onggo enobam feseruk kwit, hit hinim henowarihi ha no, o etman embeselug, hinili oko wilibik manik.

⁶ It Babel on en hit henepuk katswa anyo, ketia onggo higitdoho debeseheg, ne, it siag dil noruk katswa anyo fahet, ketia hiren siag onggo birenam enobam feseheg, ne, it enolok, ik ale on hwenanggeg hag nowag ulug, misiham hwenanggeg og-hesausa famen, ketia onggo hit henolok, ik ale on hwenanggeg hag birenam nowag ulug, og-eseheg, duruk kamek.

⁷ It Babel on anyo hwe hambena on hag deg lit, enendaman, An hwe sohwe wereg lit en, nenda wat-dauk kwit, oba yatuk ale noluk aruhu fug. Ite, ap homi enisinga nunuk bogdeg wereg lit fahat-enesug lahi, ulug, enda winik-wonog uruk kwit boruk mu, at enda leho fahat-dil laheg, angge dindikdeg kweleg, enda seroho welaheg, duruk katsi anyo obalma, enda wat-dauk kwit, oba yareheg, ouk nenek dil laheg, duruk kamag ulug, anggin on obam foruk kamek.

⁸Ayo wiroho enetuk on Nenakni Allah omamne humdeg ma, at hwe anyo dil lauk ale bilingguruk kwit, it o Balel on dil lauk katsi onggo nukoho misiham anggin-fanggin enobam foruk kwit, siburu obok humon lahakeg, ouk nigon enobam feheg, enenda siag atlug oba yarukwag ulug debeseheg, duruk kweleg, o kota anyo mundoho harep fisaruhu,” ulug, uruk mu, holdihik.

⁹ Di ap su ap enowesi kwenangma on enunuk bogdeg anyo en, hwe hambena on anyo hambena dik kweheg, enenda nauk halug neg inim hesangge deheg, duswa anyo en, hwe hambena on o kota Babel anyo han nauk kwit, hobu laharuk mu inil fureg lit, oba yareheg, enenda wat-deheg, duhup.

¹⁰Ne, it airoho duruk kwit, o Babel han nauk kweleg, it ap homi etmano nenek duruk mu esalug, enakol en balohoma enemumu unduhuk lit, “Hit o kota Babel etano welahep on su, henelaheg! Henelaheg! Hit along humon, henenggik wereg kweleg famen, siag duruk katuhup onggo jam misiham henobam feik waha su!” ulug, uhup.

¹¹ Ne, it ap di o su o toko hwalduk on anyo mel, ap homi enengge di angge su angge mundoho enobam hundurik lauk kamuhup fug mu, o kota Babel han nauk mu, inil fureg lit, oba yareheg, fong wareheg, duruk kamuhup.

¹² Enengge hundutuk kamuhup fug ai, bosie emas inim, perak inim, helep orohole ebe on inim, wirili hag mutiara inim, sum mun kuron fanoroho yihig on kain lenan inim, sum orohole bolu wareg inim, bombalep ahalisa yihig on kain sutera inim, sum orohole mebon inim, di ahan su ahan amben fano on inim, solog hag gaja aeg fam buhundeg on inim, di angge su angge e fano on fam buhundeg inim, tembaga fam buhundeg inim, besi fam buhundeg inim, helep unuk pualam on inim,

¹³e kami ahap inim, hende inim, ahalue amben fano on inim, hendali hag ahalue amben fano mur [8] inim, hendali hag ahalue amben fano kemenyan inim, e anggur ahalue inim, wam ahalue inim, biye roti indip inim, gandum anggen inim, sapi domba inim, kuda inim, kuda en en lit-hil lauk on kereta inim, ap homi enemingming angge welamag ulug, enebe humdoho inim, di angge su angge mundoho su hundutuk kamuhup fug mu, it ap toko hwalduk on en oba yatuk kamuhup.

¹⁴Ne, duruk kwit, “Hat di angge su angge suahi boruk kwit, henda nauk katihin anyo eleg aha. Henggik dindikdoho welaheg, hebe leho welaheg, welatihin anyo mundoho, eke am fug angge eleg aha,” ulug, hwe hambena on fam uruk mu holdihik.

¹⁵ Ne, it ap toko hwalduk on hwe hambena on inim enengge su on hundutuk kwit, enenggik werehap dausa anyo, hwe hambena on o Babel anyo han nauk kweleg, it ap homi etano nenek duruk mu esalug, enakol en balohoma enemumu unduhuk lit, oba yareheg, fong wareheg, duruk kamuhup.

¹⁶Airoho duruk kwit, iren, “Hat o kota humon Babel su, helaheg! Hasum mun kuron fanoroho yihig inim, sum orohole bolu wareg inim, sum orohole mebon inim, wandeg lit, bosie emas inim, helep orohole ebe on inim, wirili hag mutiara inim, halili angge lik-loukdoho lahaboho wereg latihin famen,

¹⁷ di angge su angge henggik wereg latsi anyo mundoho, jam misig fam eleg aha ma, helaheg e!” uhup. Ne, it ap kapal walug hwaldil noruk on enowesi inim, it inim kapal fam noruk on inim, it kapal hwalduk on inim, ne, onggo hwelahuk ulug, kapal fam noruk on mundoho inim, mundoho balohoma enemumu unduhuk lit,

¹⁸ hwe hambena on o kota Babel anyo han nauk kwit, hobu laharuk mu inil fureg lit, enele humon uruk kwit, “O kota humon ebe su hag eke eleg ma, yaho hwi!” ulug,

¹⁹ kwenang ololo angge enebene lahap-dauk kwit, enele humon fam, “Hat o kota humon su, helaheg! It di ap su ap onggo hwelahup en, di obam su obam en di angge su angge kapal fam walug wamag ulug, kapal mondotuk katswa anyo, hat henggik wereg en hangge hundutuk men, it enenggik werehap dausa famen, di angge su angge hat henggik wereg latsi anyo jam misig fam mundoho eleg aha ma, helaheg e!” ulug, uruk kwit, oba yareheg, fong wareheg, duhup.

²⁰ Airoho duhup ale na og-hauihikdeg, ele eke uruk kwit, “Hit o boholma on anyo en, henahayeg boruk kamek. Hit demdoho boruk on Allah omaliki inim, hit Yesus wene hweag-isil noruk kamag ulug, mon-henepsi on rasul inim, hit Allah wene hweag-esauk katuhup on nabi anyo inim, hwe hambena on su en henowatuk katsi anyo henunggulmu Allah en siag onggo obam feheik ma, henahayeg boruk kamek,” ulug, uruk mu holdihik.

²¹ Ai holdihikdeg, owan na og-hauk kwit, malaikat along on eke en helep humon, helep sowabuk bereloho menenduk on mun humon anyo hag, hamboko ik laut fam hwikdoho belapuk kwit, “Helep belabihi su hag, o kota humon Babel airoho neg lilibuk-lalabagdoho fohu angge re, ap homi en, “O kema wirig latsi e?” ulug, hweahauk fug angge hera-duhup.

²² Hit o Babel welahep su, kitar kecapi kweng-duruk on inim, suni felaloho uruk on inim, bururum hilinggig seruling fam ele fururuk on inim, bohweap trompet ele fururuk on inim, enele uruk mu holeheg, di ap su ap enenggik buhun fam di angge su angge buhun-duruk mu hweag-enebeheg, sowabuk helep humon fam bereloho menenduk kwit, aplohok duruk mu holeheg,

²³eral fisako seleg enobam fisag-enebeheg, ap ohwe inim sebe-enebukoho lit, soni esetuk kwit, enahayeg duruk mu holeheg, o kota Babel lilibuk-lalabagdoho fohu angge re, henesahalimen ekenim duhup fug. It ap toko hwalduk on hiron anyo en di o su o hundutil lauk kwit, mun along wereg lit, hiren hwal ale duruk kwit, it ap homi di obam su obam wereg on mundoho lal-enepuk katuhup,” ulug, malaikat anyo en uruk mu holdihik.

²⁴ Ne, it Allah wene hweag-esauk katfag enap nabi anyo inim, it demdoho boruk on Allah omaliki inim, it di ap homi su ap homi o kwenangma suma binggi enowatswa anyo mundoho, enamep hwe hambena on o kota Babel enggikmu wereg ale en, Allah en siag onggo obam foruk mu, hauihik.