Read Ninia Yali WAHYU 19 Bible Online

WAHYU 19 - Ninia Yali bible

WAHYU 19

¹Ai hauihikdeg, boholma ap homi mun humdoho kabogdeg lit, enele humon uruk hag, enemitmit duruk kwit, “Nenakni Allah mot-diek! Nit Nenakni Allah amu neg omamne humdeg lit, nenahap wendat-nenepuk anyo, mun leho wereg!

² At Allah en ap homi siag duruk esalug, enawene bilinggoho ayo wiroho en-enepuk kwit, demdoho neg, dipdoho neg debeseruk. Hwe hambena along on anyo en, Hambena nabik manik, ulug, di ap su ap o kwenangma suma wereg on mundoho hweag-esasi halug, hambena dik kweheg, duswa ma, siahap-enepuk katsi onggo obam feheg, ne, hwe anyo en Allah amingming angge binggi enowatsi mu, enunggulmu at wareheg, higitdoho debesi,” ulug, uswa.

³ Uswareg, ekenim birenam enele humon uruk kwit, “Nenakni Allah mot-diek! Hwe hambena on o kota anyo han nauk kwit, hobu eleg am fug angge hundig-hundig laharuk karuhu,” ulug, uswa.

⁴Uswa ma, it boholma on enowesi enebe 24 en inim, it ap homi enapeleg on enoluk wereg on enebe ohwan anyo inim, at ap homi fahat-enesugmu takhta fam hwerieg anyo, Nenakni Allah apma sebe ulug, “Demdoho, Nenakni Allah mot-dukohon,” ulug, uruk mu, holdihik.

⁵ Uruk mu holdihikdeg, fahat-enesugmu takhta etano en ele eke uruk kwit, “Hit Allah amingming angge, henunuk wereg on inim, henunuk eleg on inim, hit Allah anggilug boruk kahep on su, Nenakni Allah mot-duruk kamek,” ulug, isi.

⁶ Isi mu, ik hul humon wamburuk kwit, ele dung-dung eheg, ululu aplohok sipuk-deheg, duruk anyo hag, it ap homi mun humdoho kabogdeg lit, enele humon uruk hag, enemitmit duruk kwit, “At omamne along humon Nenakni Allah anyo ap homi di o su o fahat-enesug wereg ma, Allah mot-duruk kamul.

⁷At Domba omalik anyo ohwe inim seberuhup ulug soni esetuk li aik waha. Ne, ohwe anyo angge, di angge su angge lik-loukdoho duk-dalug wereg ma, nenahayeg humon boruk kwit, Nenakni Allah unuk leho foukohon!

⁸Ne, ohwe wan-dowag ulug, sum kuron fanoroho yihig on kain lenan orohole horeg lit, helag-felag angge duruk on og-itsi,” ulug, ele uruk mu holdihik. Ne, sum kuron fanoroho yihig anyo, it demdoho boruk on Allah omaliki siag duk fug angge fano neg dil lauk katswa anyo ulug hauihik.

⁹ Hauihikdeg, malaikat anyo en, ekenim an hweag-nutuk kwit, “Domba omalik ohwe inim seberuruk kwit, soni osoho inim na wamag ulug, eneyonggo fesi anyo, enahayeg boruk kamuhup,” ulug, “Wene su Allah en demdoho isi angge re, lisu balin,” ulug, hweag-nitsi.

¹⁰Ai hweag-nutuk mu holdihikdeg, at apma sebe ulug, mot-dimin ulug dirihik men, aren, “Airoho duk fug. At Yesus wahasireg, Allah airoho wereg, ulug, fagdoho hweag-hesasi wene hat hori hinim wauhupdeg hweag-esauk kahep hag, an oho Allah amingming angge welahi mu, an mot-nabuk fug. Allah apma sebe ulug, at neg mot-duruk kamin,” ulug, hweag-nutuk mu holdihik. Ne, at Yesus en fagdoho wene hweag-nesasi wene ai, Allah Aheime en Allah wene hweag-esauk kamag ulug, hweag-esebag wene anyo misig neg.

¹¹ Ai holdihikdeg, ai en boholma sok husig mu, kuda oruk kuron hauihik. Ne, ap eke unuk Demdoho Neg Uruk On, eke, Dipdoho Neg Duruk On, anyo kuda ambolowag fam hwerieg lit, dipdoho neg dil lauk kwit, ap enewene bilinggoho ayo wiroho en-enebil laheg, dog abil laheg, duruk on anyo hauihik.

¹² At il anyo re, indok ambulbul ulog duruk hag deheg, ne, unggulmu kware-kware mahkota humdoho bug-deheg, deg lit, at unuk soaleg ebene lisu baleg wereg anyo ap homi en furebouk fug angge deg kweleg, at onggwareg neg olukdeg.

¹³At unuk eke “Allah Wene” uruk mu hauihik. Ne, asum yaron lahabeg on anyo ap homi enamep are isi on wan-debelug lauk kweleg,

¹⁴it sehen foroho on boholma wereg on anyo, enesum kuron fanoroho yihig on kain lenan orohole horeg lit, helag-felag angge duruk on wan-debelug, esan humdoho enemu domog kuda kuron ambolowag fam hweriako at mutlug lauk mu esauihik.

¹⁵ At kuda oruk kuron ambolowag hweriako lauk mu hauihik anyo, di ap homi su ap homi, di obam su obam sebeloho feseil lauk kamag ulug, ambilikmen karog yaron aeg foma-foma maho on wilibik waharuk mu hauihik. Ne, domuk bosie on enggikmu foroho lit, di ap homi su ap homi apma feselug fahat-enesug wereg lit, anggur ahalue eneyog en berelduk anyo hag, at omamne along humon Nenakni Allah olok humon boruk anyo aren ap homi berel-enebil lauk mu hauihik.

¹⁶Ne, at unuk eke, “Di ap su ap enunuk wereg on Enowe unuk bogdeg raja,” ne, unuk eke, “Ap homi enowesi fahat-enesug wereg on Enowe Tuhan,” ulug, asum fene inim, ahoma inim lisu baleg wereg ma hauihik.

¹⁷ Hauihikdeg, malaikat eke mo bulmu unduhuk lit, di suwe su suwe bohol kolokwe darulug noruk on anyo, ele humon fam hwi-enepuk kwit, “It ap enunuk bogdeg inim, ap sehen foroho on enowesi panglima on inim, it ap sehen anggen on inim, kuda inim, it kuda fam hweriako lauk on inim, di ap su ap we hesangge on inim, ap homi enamingming angge inim, it enunuk eleg on inim, it enunuk wereg on inim, soni osoho nahup en, Allah en henobahet it waroho fesesi su, enino na wamluhup en kabog-dik manik,” ulug, hwi-enepuk mu hauihik.

¹⁹Hwi-enepuk mu hauihikdeg, olomene olok on anyo inim, di ap su ap enowesi kwenangma on enunuk bogdeg enautsi esan humdoho inim en at kuda ambolowag fam hwerieg on anyo autsi inim dog abuhuk ulug, kabog-debelug wereg ma esauihik.

²⁰ Hauihikdeg, at olomene olok humon atam lahaik wahasi anyo inim, ne, olomene fobik lahaik wahasireg, ap Allah wene hweag-esauk on hag famen, seiale hweag-isil noruk kwit, olomene atam on il hanim, enakol wereg on duk fug alereg on dil lauk kwit, ap homi olomene atam on omaliki ulug, unuk enelahama ane, enenggikmu a, lisu bale folug olomene ahut wal-heheg ilirangge buhundeg anyo apne wauk kamag ulug, lal-enepsi anyo inim, enebe biren su sene feselug, indok ambulbul ulog deheg, amben siag angge orohole selon belerang deheg, durukmu, ik humon yenggeleg hag etmano, belap-enebik lauk mu hauihik.

²¹Belap-enebik lauk mu hauihikdeg, enautsi foma anyo at kuda ambolowag fam hwerieg on anyo karog yaron ambilikmen wilibik waharuk anyo famen enowatil lasi mu, it di suwe su suwe at malaikat hwi-enepsi on wahausareg, ap homi enebe wareg enino anyo homoroho nauk kwit, anog en enahum buag-bising uruk mu esauihik.