Read Ninia Yali WAHYU 2 Bible Online

WAHYU 2 - Ninia Yali bible

WAHYU 2

¹Hweag-nutuk mu, hauihik men, ekenim hweag-nutuk kwit, “Yesus omaliki o Efesus kabogdeg fahat-enesug on malaikat anyo en it hweag-esowag ulug, lisu baliyug. An nenggik bekit fil sohwalanggen sabiren foroho wereg lit, lampu owag emas fam buhundeg on anggelegma noruk kahi anyo en nele hweag-hesauk kahi su.

²Hit Yesus omaliki o Efesus henap en dil noruk kahep anyo an nolukdeg. Hit henenda hambukdeg lit, bok am fug angge henemurururoho duruk kwit, ap siag hesangge dil noruk on anyo, Dia nenesahalimu welatmisi fug, ulug, mun henerim beheg, Allah en mon-enebik wahasi fug on seiale il waharuk on enabut bal-enebeheg,

³an nunuk fam ouk-bouk henepuk kweleg, henenda hambuk debelug bik bok wereg lit, ko-henebuk fug angge weheg, duruk kahep mundoho an nolukdeg.

⁴Ai famen de, atam an ninim henenda hundig napuk kwit, duruk katuhup anyo embeselug, amu atuhup su neg de an mun nerim boruk kahi on hweag-hesa.

⁵Atam an ninim henenda hundig boruk kwit, duruk katuhup anyo embeseruk kwit, bule yatdoho wamburuhupdeg welahep anyo eberiyug. Siag duruk kahep su, henenda wenggele folug, embeseruk kwit, atam dil noruk katuhup ale duruk kamuhup. Henenda wenggele folug siag duruk kahep su, embeseruk eleg halug neg de, an henekit folo-folo waruhukdeg, henelampu owag wereg anyo, obalman lisoho wahuk.

⁶Ai famen de, an it ap Nikolaus ele wauk on en dil lauk ale anyo nerim boruk kahi higitdoho, hiren oho henerim boruk kahep ma, misig ai neg de fano duruk kahep ma hesauk kahi.

⁷ At Allah Aheime en Yesus omaliki di o su o kabog-duruk on hweag-esauk anyo, enesanggo holuk alereg halug, furoho holduk kamag. Ap eke enda hambukdeg lit, di siag su siag sebeloho foruk halug, at e anggen ap homi eneluk apdoho feseruk on Allah eyabukmu etano wereg on nowag ulug og-uruhuk angge re, nele hweag-hirihi su hweag-esowag ulug baliyug,” ulug, hweag-nutuk mu, hauihik.

⁸ Ekenim hweag-nutuk kwit, “Yesus omaliki o Smirna kabogdeg fahat-enesug on malaikat anyo en it hweag-esowag ulug, lisu baliyug. An indip inim, onggombi inim, welahi anyo waratihikdeg famen, noluk atlug inatihik on anyo en, nele hweag-hesauk kahi su.

⁹Anggin-fanggin henobam henobaharuk mu heheg, henenggik elehapdoho henobaharuk kweleg, henenggik wereg hag welaheg, ne, it Iblis omaliki en famen, we seiale uruk kwit, Nit Yahudi on, il lauk kwit, hit henunuk siahapdoho bilip-henepuk kweleg welaheg, duruk kahep anyo mundoho an noluk.

¹⁰Horog ketia siahap-biahapdoho henobahaukoho duruk kweleg, henakol bouk fug. At Iblis en henabut balikoho hit foma sabu hetdoho kwelabe feserukmu kwelabe henobahakup en duhu. Duruk kweleg, henenggik numenam anggin-fanggin henobam henobaharuk kweleg, hahup men, eleg aruhu. Hiren, Nenepuk kweleg, Kristus obahet waramuhuk fano, ulug, henembong seroho bok welamek. Airoho welamuhup halug de, ap buroho lauk on along atuk mu onggo og-esauk anyo hag, waramuhup famen, an den onggo nabelal-habelal henebuhuk.

¹¹ At Allah Aheime en Yesus omaliki di o su o kabog-duruk on hweag-esauk anyo, enesanggo holuk alereg halug, furoho holduk kamag. Ap eke enda hambukdeg lit, di siag su siag sebeloho foruk halug, at birenam wararuhu fug angge re, nele hweag-hirihi su hweag-esowag ulug baliyug,” ulug, hweag-nutuk mu hauihik.

¹²Ekenim hweag-nutuk kwit, “Yesus omaliki o Pergamus kabogdeg fahat-enesug on malaikat anyo en it hweag-esowag ulug, lisu bal-itmihin en hweag-hirik. An karog yaron aeg foma-foma maho on foroho lahi anyo en nele hweag-hesauk kahi su.

¹³Hit Yesus omaliki o Pergamus henap en duruk kahep anyo an noluk. It ap homi en Iblis apma wereg lit, siag duruk anyo enesahalimu welahep an nolukdeg. Ne, an namloho Antipas at Iblis obam wereg lit en nobam dip-nobaharuk kwit, bok am fug angge nabug fag-dil noruk katsi on anyo, henesahalimen watswa famen, deg kweleg, hiren an nobam dip-nobaharuk kwit, Nit Yesus nenapeleg, ulug, awea wauhup fug.

¹⁴ Ai famen, hit duruk kahep ale foma eke nerim boruk kahi on hweag-hesa. At Bileam en ap Balak wene hweag-etfag ma, it ap homi Israel on en Allah wene embeselug, kembu owam waroho nenggeg, homi hesangge enebeheg, duhup en, at Balak en it ap homi Israel on yomaroho fesebag anyo wene, hit hinim wereg on foman Bileam awene ai weheg,

¹⁵ne, eke higitdoho, foman Nikolaus awene weheg, duruk mu hesauk kahi.

¹⁶Aireg ma, henenda wenggele folug, siag duruk kahep ai embeseiyek. Embeseruk eleg halug neg de, an folo-folo henekit waruhukdeg, karog yaron an nambilikmen wilibik waharuk on ai fam hit ap homi ai on henowatil waruhuk.

¹⁷ Allah Aheime en Yesus omaliki di o su o kabog-duruk on hweag-esauk anyo, enesanggo holuk alereg halug, furoho holduk kamag. Ap eke enda hambukdeg lit, di siag su siag sebeloho foruk halug, an den siburu boholma on manna herako wereg anyo og-ereheg, ne, at unuk ket soaleg on ap amu on enapeleg at amu oluk aruhu on helep mun kuron fam lisu baloho og-ereheg, duhuk angge re, nele hweag-hirihi su hweag-esowag ulug, baliyug,” ulug, hweag-nutuk mu, hauihik.

¹⁸Ekenim hweag-nutuk kwit, “Yesus omaliki o Tiatira kabogdeg on fahat-enesug on malaikat anyo en hweag-esowag ulug, lisu bal-itmihin en hweag-hirik. An Allah Amloho indok ulog duruk hag, an nil anggen de airoho deheg, ne, bosie tembaga orohole mun fano amag ulug indokma amorolengdoho yalduk men, helag-felag angge duruk hag, an neyog de airoho deheg, duruk kahi anyo en nele hweag-hesauk kahi su.

¹⁹Hit Yesus omaliki o Tiatira dil noruk kahep anyo an noluk. Henenda hundig beheg, henenda demdoho bolug nobam dip-nobahakeg, Allah obahet duruk kahe, ulug, henori henerekwi let-enebil laheg, siahap-henepuk kweleg, henenda hambukdeg lit welaheg, atam we dorangge hag duruk katuhup famen, ketia duruk kahep anyo alongdoho deheg, duruk kahep anyo mundoho an nolukdeg.

²⁰ Famen de, hit duruk kahep ale misig eke nerim boruk kahi on hweag-hesa. Hwe Izebel anyo en, An Allah wene hweag-esauk on welahi, ulug, an namingming angge lal-enebil lauk kwit, homi hesangge enebeheg, ne, kembu owam waroho nenggeg, dil lauk kamag ulug, hweag-esauk kweleg, hiren siag bouk fug angge embeselug welahep ai nerim.

²¹At hwe anyo enda wenggele folug, siag duruk anyo embesoukwag ulug nangno-hauk katihik famen, siag hesangge duruk ale fahet aren, An duruk kahi ale embesehuk fug, ulug, hundig neg duruk.

²²Aireg ma, it foma hwe ai inim hambena dil lauk anyo, enenda wenggele folug, it siag neg duruk ale embeseruk eleg halug, ouk bouk hauk kamag ulug, anggin sahali-fahaliroho enobam fesehuk.

²³ At hwe ai omaliki inim duruk on anyo re binggi enowaruhuk mu, it an nomaliki di o su o kabogdeg on mundoho en inil halug, Nit nenendaman wenggel-hauk kahe inim, nenenda boruk kahe inim, mun fu nenobahalug, dil lauk kahe onggo higitdoho nenobam domog nenobaharuk on at, ulug, an nebe enoluk amuhup.

²⁴Ai famen de, hit Tiatira welahep on foma neg de, hwe anyo en hweag-hesauk wene anyo wauk kahep fug on inim, ne, hit foman Iblis awene herako wereg uruk on anyo wa fug angge welahep inim ai, an den hit henobam anggin on eke henobahakuk, ulug, hweag-hesauk kahi fug.

²⁵Ite, an waruhuk ale anyo ketia owan deg lahi mu, hit demdoho bolug wauhup anyo bug-bagdoho foroho welamek, ulug, ai neg hweag-hesauk kahi.

²⁶ At ap eke enda hambukdeg lit, di siag su siag sebeloho feheg, an duhuk boruk kahi ale dil laheg, dil-dil o ahae fotog salim duruk mu hahukdeg, an Nakni Allah en di ap homi su ap homi enunggul unuk domog fahat-enesug welamag ulug unduhuk nobahasi anyo hag, unduhuk fohuk. Unduhuk fohuk mu, fahat-enesug lit de, waruk kwenang dangge buhundeg on erap-duruk men, lilibuk-lalabagdoho dil lauk hag, enggikmu domuk bosie on foroho lit, debeseil lauk kamag ulug, an den unduhuk feheg,

²⁸ne, eke sohwalanggen wap o sekan dikoho ma enam atuk anyo, ap ai og-ereheg, duhuk.

²⁹At Allah Aheime en Yesus omaliki di o su o kabog-duruk on hweag-esauk anyo, enesanggo holuk alereg halug, furoho holduk kamag, ulug, nele hweag-hirihi su hweag-esowag ulug, baliyug,” ulug, hweag-nutuk mu hauihik.