Read Ninia Yali WAHYU 20 Bible Online

WAHYU 20 - Ninia Yali bible

WAHYU 20

¹Ai en, malaikat eke bohwe elma oholukmu mun yatdegma etmano sok laroho kelog-dukwag ulug, ki anggen inim, bosie sabu anggin on inim, enggikmu walug, boholman wambik waharuk mu hauihik.

² Wambik wahasireg, manu humon o endam et ap homi lal-faldoho enebil noruk katsi anyo unuk Iblis, eke unuk Setan anyo, 1.000 tahun welamag ulug, bosie sabu anyo fam hetdoho fesi.

³Ne, 1.000 tahun owan duruk kweleg, at ap homi di obam su obam wereg on ekenim lal-enebik noruk kam no ulug, malaikat anyo en bohwe elma belabe fesireg, at manu ebe ilonggoma wereg kweleg, sok laroho kelog-debeheg, sok husuk no ulug, ahalue enehaleroho dopno-debeheg, duruk mu hauihik. Ne, 1.000 tahun welatlug, dorangge sabu fisela-debehu en airoho belapuk mu hauihik.

⁴ Hauihikdeg, ap homi fahat-enesugmu takhta humdoho omano fam ap homi hwerieg wereg anyo en ap homi enewene bilingge folug ayo wiroho en-enepuk kamag ulug, unduhuk fesesi mu, wereg ma esauihik. Ai hauihikdeg, Allah wene inim, Yesus wene fagdoho hweag-esasi wene anyo inim, demdoho bolug, hweag-isil laheg, ne, olomene olok on anyo ebe inim ahut wal-heheg ilirangge buhundeg anyo inim apne wa fug angge wereg lit, at olomene omaliki ulug, unuk enelahama ane, enenggikmu a, lisu balukwag ulug, Nenerim, ulug, wa fug angge welaheg, duswa ma esalug, enanggolop kong-enepswa omano eneheime esauihik. Ne, it enoluk atlug Kristus inim leho lit, ap homi fahat-enesug lit, 1.000 tahun duruk mu hauihik.

⁵Atam dam enoluk apdoho unduhuk fesehu anyo it ai. (Ne, it waratswa anyo foma neg de, 1.000 tahun owan duruk eleg ma, enoluk amuhup fug, ulug, hauihik.)

⁶It atam enoluk apdoho feseruk on anyo siag eleg angge Allah obahet eneko wereg lit, enahayeg boruk kamuhup. It atam mun waratswa famen, birenam waramuhup fug. Nenakni Allah inim, Kristus inim en inil hanim imam wereg lamag ulug, eneko unduhuk fesehup mu, Kristus inim leho wereg lit, 1.000 tahun duruk kweleg, ap homi fahat-enesug lamuhup.

⁷Ai hauihikdeg, 1.000 tahun mun debelug, at Iblis anyo bohwe elma hetdoho belabeg wereg ma etano en fisela-duhu mu, wilibik waharuk kwit,

⁸ ap homi di obam su obam o kwenangma unggut foma-foma wereg anyo mundoho lal-enebil lamin ulug waharuk kwit, it enunggul unuk Gog inim, Magog inim, ik laut anyo inggimu ik inggi humdoho wereg anyo hag it enebe higitdoho, inim dog abik lowag ulug kabog-enepmin ulug, wilibik waruhu.

⁹Kabog-debeselug, o kwenangma suma sahail lauk kwit, it demdoho boruk on Allah omaliki kabogdeg ma, o kota Allah ahayeg weregma inim, dog abukoho lit, walinggoho mase-duswa famen, indok boholman ulog dil wambik waharuk kwit, it ap homi anyo mundoho elehapdoho feseruk mu hauihik.

¹⁰Ne, at ap homi lal-enebil noruk on Iblis anyo, indok ambulbul ulog deheg, amben siag angge orohole selon belerang deheg, durukmu, ik humon yenggeleg hag etano, olomene atam on inim, Allah wene hweag-esauk on hag seiale hweag-isil noruk on inim weregma etmano, nukoho hup anggo eleg am fug angge nenek duruk kamag ulug, belabik lauk mu hauihik.

¹¹ Ai duruk mu hauihikdeg, ap homi fahat-enesugmu takhta humon orohole kuron anyo fam ap eke hwerieg kweleg, olohotman bohol kwenang mundoho eleg atuk mu hauihik. Ne, eleg atsi mu, enobalma eleg ma, eke ha fug angge welatsi mu hauihik.

¹²Hauihikdeg, ap homi fahat-enesugmu takhta fam ap hwerieg anyo alukwe fil, di ap homi su ap homi waratswa, enunuk wereg on inim, enunuk eleg on inim unduhuk wereg kweleg, buku lisu baleg abirangge anyo fisela-duruk mu hauihik. Ne, buku eke, it enoluk mundoho welamuhup ulug enunuk lisu baleg wereg anyo inim fiselaroho folug, it ap homi waratswa on en enoluk wereg lit, duruk katswa ale, buku lisu baleg omano kumu hauk kwit, enewene bilinggoho ayo wiroho en-enepuk mu hauihik.

¹³Ik laut anyo en ap homi sal-enepsi mu, waratswa on eneheime inim, it ap homi waratlug laukmu erahamu eneheime wereg anyo inim, waratuk indip ap waratswa on eneheime foroho wereg anyo inim, enewene bilingge folug, ayo wiroho en-enebukwag ulug, fotog-esausa. Fotog-esausa ma, it enoluk wereg lit, duruk katswa ale, higitdoho enewene bilingge folug, ayo wiroho en-enepuk mu hauihik.

¹⁴Ai duruk mu hauihikdeg, ap homi waratlug laukmu erahamu inim, waratuk indip anyo inim indok ambulbul ulog durukmu, ik humon yenggeleg hag etmano, belabik lauk mu hauihik. Ne, birenam waramuhup uruk ai, indok ambulbul ulog durukmu belabik lahu anyo fahet uruk.

¹⁵Ne, it ap homi eke, it enoluk mundoho welamuhup ulug, enunuk buku lisu baleg anyo kumu hauk kwit, enunuk lisu baleg eleg ma halug, it indok ambulbul ulog durukmu, ik humon yenggeleg hag etmano, belap-enebik lauk mu hauihik.