Read Ninia Yali WAHYU 21 Bible Online

WAHYU 21 - Ninia Yali bible

WAHYU 21

¹ Ai duruk mu hauihikdeg, bohol kwenang atam wal-debag anyo inim, ik laut anyo inim, mun eleg atsi mu, obalma bohol kwenang ket wal-disi anyo hauihik.

² Hauihikdeg, hwe eke ahun hwelamin ulug, alili angge, di angge su angge lik-loukdoho wan-debelug, fik-foukdoho wereg anyo hag, o kota Allah obahet eneg on o Yerusalem ket witsi anyo, Allah weregma boholman wambik waharuk mu, hauihik.

³ Hauihikdeg, ap homi fahat-enesugmu takhta etano en, ele humon eke en uruk kwit, “Allah en ap homi enesahalimu obam wirig hag welamag ulug, ebe wambik waharuk su, furiek. At obam ap homi inim femdoho wereg lit, iren at omaliki welaheg, ne, aren it enakni inim welaheg, duruk kamuhup.

⁴ Bohol kwenang atam wal-debag etmano wereg kweleg, ap homi en anggin on hauk katswa anyo, mundoho eleg atsi mu, at Allah en inil obaluk mundoho somag-esahu angge re, ap homi waraheg, fong wareheg, oba yareheg, ouk weheg, ekenim duk fug angge welamuhup,” ulug, uruk mu holdihik.

⁵Ai holdihikdeg, wereg kweleg, at ap homi fahat-enesugmu takhta fam hwerieg welatsi anyo en, an hweag-nutuk kwit, “Furin. An di angge su angge mundoho ket apdoho foruk kahi,” ulug, ekenim hweag-nutuk kwit, “Wene uruk mu holehen su, demdoho dip-uhu en neg uruk mu re, demdoho boukwag ulug lisu bale fein,” ulug, hweag-itsi.

⁶ Hweag-nitsireg, ekenim hweag-nutuk kwit, “Duhu ulug atam welatsi anyo, ketia o fotogdoho mun dip-eheik. O atam indip hag welatihik inim, fobik onggombi hag welaruhuk inim, an neg welahi. Ne, it ap homi en ik obok enepuk halug, an den ik oluk apdoho feseruk on ele urukmen onggoleg we og-esauk karuhuk.

⁷ It ap eke enenda habukdeg lit, di siag su siag sebeloho foruk halug, enebinggi angge og-esauk anyo hag, an den debesehuk berihik anyo higitdoho, an den it Enakni Allah aheg, ne, iren an nomaliki aheg, duhuk.

⁸Ai duhuk famen, it Allah wene foroho welam ale fahet enekol duruk on inim, it enerimdeg lit, demdoho bouk fug angge wereg on inim, it mun siagdeg ma ap homi en duruk ale duruk on inim, it enolok en binggi enowatuk on inim, it bamo watuk on inim, it kembu wire folug, enenda ai fam dipdeg lit dil noruk on inim, it seiale uruk on inim, it mundoho ik humon yenggeleg hag indok ambulbul ulog deheg, amben siag on orohole selon belerang deheg, durukmu etmano, birenam waramuhup en fesehuk,” ulug, hweag-nitsi.

⁹Ai hweag-nitsi mu, it malaikat enebe sabiren anyo, ap homi ouk anggin-fanggin enobam fesoukwag ulug, ouk indip waruk sabiren elesopdoho hwenanggeg hililik wahausa on anyo eke an nakit wahasireg, “At Domba omalik ohwe akdeg on hwelahu anyo, hil hamihin en ninim laul,” ulug, hweag-nitsi.

¹⁰ Hweag-nitsireg, Allah Aheime an nobam louk uruk kweleg, og-naplug dom yaron leho on fam nobahaik lahasireg, o kota Allah obahet eneko on Yerusalem anyo Allah weregma boholman wambik waharuk mu, unug-nitsi.

¹¹Unug-nitsi mu, at Allah leho lit, seleg helag-felag angge duruk anyo hag, helep orohole ebe on humdoho eleg ma onggo humon foruk anyo, inapumag orohole ik il wirik on hag o kota Yerusalem anyo aireg ma hauihik.

¹² Ne, helep fak lehet o kota maseroho oho anyo re, mun yatdoho leho wereg ma, sok kurukmu nesanggoen, ne, sok hwalduk kamag ulug, it malaikat enebe nesanggoen wereg ma esauihik. Ne, sok ebe fam, it ap homi Israel on enunggul unuk nesanggoen anyo, lisu baleg wereg ma hauihik.

¹³Helep fak lehet oho anyo o mo indip timur fil etma sok ebe henahan, mo obuk uruk fil barat fil etma sok ebe henahan, ne, iliko utara fil etma sok ebe henahan, ne, wiriko selatan fil etma sok ebe henahan, o unggut ohwan foma-foma sok henahan neg wereg ma hauihik.

¹⁴Ne, helep fak lehet o kota maseroho oho anyo, helep oboule nesanggoen anyo fam at Domba omalik mon-enepsi on rasul enebe nesanggoen enunuk baleg wereg ma hauihik.

¹⁵ Ne, at wene hweag-nutuk katsi anyo en, o kota inim, sok kurukmu anyo inim, helep fak lehet oho anyo inim, ilit-dil lowag ulug, ilirangge domuk emas on enggikmu foroho wereg ma hauihik.

¹⁶O kota ebe unggut ohwan fomat-fomat, ilihig wirihig inim, nunggulig inim higitdoho neg wereg ma, an nil hauk kweleg, at anyo en, o kota ilirangge fam ilit-dil lauk kwit, unggut ilihig wirihig inim, unggut nunggulig inim, ne, helep fak lehet oho lahabeg anyo inim, higitdoho neg 2.400 kilometer [9] ilit-dil lauk mu hauihik.

¹⁷O kota ebe ilit-dil lasireg, ai en, helep fak lehet oho anyo ilit-duruk kwit, nit ap homi nenenggik fam wal-hauk kahe on leho ale,[10] 60meter [11] hag, at malaikat anyo en ilit-duruk mu hauihik.

¹⁸ Ne, helep fak lehet oho anyo helep orohole ebe on fam oho kweleg, o kota ebe neg de emas ebe on inapumag orohole ik il wirik on hag anyo fam wirig latsi, hauihik.

¹⁹O kota ebe maseroho helep fak lehet oho welatsi helep oboule anyo domog helep orohole ebe on onggo humon foruk on anyo re, misig eke helep baiduri pandan, bireneg on de, helep nilam, henahaneg on de, helep yakut, ohwaneg on de, helep zamrud,

²⁰foap on de, helep baiduri sepah, folfalik on de, helep delima, sabit on de, helep ratna cempaka, ligin on de, helep pirus, soho on de, helep topas, num on de, helep krisopras, nanggolop on de, helep lazuardi, nesanggo on de, helep kecubung, anyo fam, helep oboule hundomog buhundoho doaleg ma hauihik.

²¹Ne, sok kurukmu sok nesanggoen omano amu hundomog wirili hag mutiara fam hilinggig, ne, o kota ai kwe lauk kwe emas ebe on orohole inapumag ik il wirik on hag doaleg wereg ma hauihik.

²²O kota ebe airoho hauihik famen, at omamne along humon wereg Nenakni Allah inim, amloho Domba omalik inim, ap homi enesahalimu wereg ma, Allah ninim wereg boukwag ulug, Allah obam wirig eke hauihik fug.

²³ At Allah mun leho lit, seleg helag-felag angge duruk anyo fam, o kota anyo seleg aheg, ne, eral fisaho hag, Domba omalik anyo en fisareheg, duruk mu, it ap homi o kota etmano wereg on en, “Mo inim bigalem inim yatuk kalep aho,” ulug, bouk fug angge wereg ma hauihik.

²⁴ Ne, o kota anyo en selehap enepuk kweleg, it ap homi di obam su obam wereg on anyo seleg ai fam laheg, ne, it di ap su ap o kwenangma enowesi enunuk bogdeg anyo en, o seleg ai fam welamag ulug, it leho lit enengge di angge su angge foroho wereg anyo walug kwik waheg, duhup ulug, wereg ma hauihik.

²⁵ O kota etma o hup atlug mum aheg, duk fug angge, o nukoho neg welaruhu angge re, sok anyo laruk fug angge, husig neg welaruhu ulug hauihik.

²⁶It ap homi di obam su obam wereg on mundoho anyo en, leho lit enengge di angge su angge foroho wereg anyo, o kota etmano welamag ulug, Allah anggilug duruk kwit, walug kwik wamuhup famen,

²⁷ it enenda siag horeg eleg on inim, siag deg ma ap homi en duruk eleg on siag hesangge dil noruk on inim, seiale uruk on inim, mundoho kuhup fug. Ite, it ap homi enoluk mundoho welamuhup ulug enunuk buku fam lisu baleg anyo, Domba omalik en foroho wereg halug neg de, kuhup ulug wereg ma hauihik.